Salman Khan: સલમાન ખાનના ઘરની બહાર અજાણ્યા હુમલાખોરો દ્વારા કરવામાં આવેલા ફાયરિંગથી તેના ચાહકો ચિંતિત છે. આ ઘટનામાં ગેંગસ્ટર લોરેન્સ બિશ્નોઈ અને તેના ગુરગાઓ સામેલ હોવાનું પ્રાથમિક પોલીસ તપાસમાં બહાર આવ્યું છે. દરેક લોકો આ ઘટનાની ટીકા કરી રહ્યા છે અને ગુનેગારો સામે કડક કાર્યવાહીની માંગ કરી રહ્યા છે. આ ઘટના બાદ સલમાનના ચાહકો અને સેલેબ્સે સલમાન ખાન વિશે ચિંતા વ્યક્ત કરી હતી, જો કે આ ઘટનાને લઈને ઘણા સાચા અને ખોટા દાવા કરવામાં આવી રહ્યા છે, જેના પર સલમાન ખાનના ભાઈ અરબાઝે એક નિવેદન જાહેર કર્યું છે. નોધનીય છે કે રવિવારે સલમાન ખાનના ઘરની બહાર ફાયરિંગ થયું હતું. સૂત્રોનું કહેવું છે કે સલમાન ફાયરિંગની ઘટના પર ધ્યાન નથી આપવા માંગતા કારણ કે તેમને લાગે છે કે હુમલાખોરનો હેતુ એક્ટરને શાંતીથી ઘરે બેસાડવાનો હતો.
શું કહ્યુ અરબાઝ ખાને
અરબાઝ ખાને ઘરની બહાર ફાયરિંગ પર એક લાંબી નોટ લખી છે, જે તેણે ઈન્સ્ટાગ્રામ પર શેર કરી છે. તેણે પોસ્ટમાં લખ્યું છે કે, 'મોટરસાઇકલ પર સવાર બે અજાણ્યા હુમલાખોરોએ ગેલેક્સી એપાર્ટમેન્ટ પર ગોળીબાર કર્યો, જેના કારણે અમારો પરિવાર ખૂબ જ પરેશાન છે. આ ઘટનાથી પરિવાર આઘાતમાં છે. કમનસીબે કેટલાક લોકો પરિવારની નજીક હોવાનો દાવો કરી રહ્યા છે અને પ્રવક્તા બનીને મીડિયા સમક્ષ બેજવાબદાર નિવેદનો આપી રહ્યા છે.
વધુ વાંચો: એક્ટ્રેસે અન્ય ધર્મના બૉયફ્રેન્ડ સાથે લગ્ન કરતા થઇ ટ્રોલનો શિકાર, કહ્યું 'ટ્રોલિંગે મને વધારે...'
પબ્લિસિટી સ્ટંટ
અરબાઝ ખાને નિવેદનમાં આગળ લખ્યું, 'તેઓ કહી રહ્યા છે કે આ બધો પબ્લિસિટી સ્ટંટ હતો અને તેનાથી પરિવાર પર કોઈ અસર થઈ નથી, જે બિલકુલ યોગ્ય નથી. આવા નિવેદનોને ગંભીરતાથી ન લો. સલીમ ખાનના પરિવારના કોઈ સભ્યએ મીડિયા સમક્ષ જઈને આ ઘટના અંગે કોઈ નિવેદન આપ્યું નથી. હાલ પરિવાર પોલીસને ઘટનાની તપાસમાં સહકાર આપી રહ્યો છે. અમને મુંબઈ પોલીસ પર વિશ્વાસ છે. અમને ખાતરી આપવામાં આવી છે કે તેઓ પરિવારની સુરક્ષા માટે બધું જ કરશે. તમારા પ્રેમ અને સમર્થન માટે આપ સૌનો આભાર.' તમને જણાવી દઈએ કે 'બ્લેક ડીયર કેસ'ના કારણે ગેંગસ્ટર લોરેન્સ બિશ્નોઈ સલમાન ખાનથી નારાજ છે અને પોતાને બિશ્નોઈ સમુદાયનો પ્રતિનિધિ માને છે. ગેંગસ્ટર ઈચ્છે છે કે સલમાન ખાન બિશ્નોઈ સમુદાયની માફી માંગે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
