બિઝનેસ / હવે રેલવે સેક્ટરમાં આવ્યા ગૌતમ અદાણી: સીધી જ IRCTC ને આપશે ટક્કર, જુઓ કઈ મોટી ડીલ કરવાની તૈયારીમાં

• ટ્રેન ટિકિટના ઓનલાઈન બુકિંગ બિઝનેસમાં પ્રવેશ કરશે ગૌતમ અદાણી 
• અદાણી એન્ટરપ્રાઈઝ ટૂંક સમયમાં IRCTCને આપશે ટક્કર 
• અદાણીએ આ કંપનીનો  100% હિસ્સો ખરીદ્યો

અદાણી એન્ટરપ્રાઈઝ ટૂંક સમયમાં જ ટ્રેન ટિકિટના ઓનલાઈન વેચાણના બિઝનેસમાં પ્રવેશ કરવા જઈ રહી છે. આ સાથે અદાણી જૂથ ઓનલાઈન ટ્રેન ટિકિટ બુકિંગ બિઝનેસમાં ઈન્ડિયન રેલવે કેટરિંગ એન્ડ ટુરિઝમ કોર્પોરેશન (IRCTC)ની ઈજારાશાહીને પડકારશે. જણાવી દઈએ કે અદાણી એન્ટરપ્રાઇઝિસે શેરબજારને તેના આ પગલાં વિશે સૂચના આપી દીધી છે. કંપનીએ માહિતી આપી હતી કે તેણે સ્ટાર્ક એન્ટરપ્રાઈઝ પ્રાઈવેટ લિમિટેડ પાસેથી ઓનલાઈન ટ્રેન ટિકિટ બુકિંગ પ્લેટફોર્મ ટ્રેનમેનમાં 100 ટકા હિસ્સો મેળવવા માટે શેર ખરીદી કરાર પર હસ્તાક્ષર કર્યા છે.

અદાણીએ  100% હિસ્સો ખરીદ્યો
અદાણી એન્ટરપ્રાઇઝે શેરબજારને કરાર અંગે માહિતી આપી છે. સ્ટાર્ક એન્ટરપ્રાઇઝ પ્રાઇવેટ લિમિટેડમાં 100% હિસ્સો ખરીદવાના સંબંધમાં શેર ખરીદી કરાર વિશે માહિતી આપતાં, અદાણી એન્ટરપ્રાઇઝે માહિતી આપી હતી કે અદાણી ડિજિટલ લેબ્સ પ્રાઇવેટ લિમિટેડ (ADL) જે કંપનીની સંપૂર્ણ માલિકીની પેટાકંપની છે સ્ટાર્ક એન્ટરપ્રાઈઝ પ્રાઈવેટ લિમિટેડ (SEPL) સાથે તેણે હિસ્સો ખરીદી કરારમાં પ્રવેશ કર્યો છે.  100% હિસ્સાના સૂચિત સંપાદનના સંબંધમાં એક શેર ખરીદી કરાર પર હસ્તાક્ષર કરવામાં આવ્યા છે. 

હિન્ડેનબર્ગ આંચકા પછી 100% રિકવરી 
ફેબ્રુઆરી 2023ના અંતે હિંડનબર્ગ રિસર્ચ રિપોર્ટના કારણે ભારે વેચાણને પગલે NSE પર અદાણી એન્ટરપ્રાઈઝના શેર લગભગ 1195ની નીચી સપાટીએ પહોંચ્યા હતા. તેના વર્ષ-દર-વર્ષના નીચા સ્તરેથી રિકવરી થઈને, અદાણી એન્ટરપ્રાઈઝના શેરની કિંમત ગયા સપ્તાહે શુક્રવારે લગભગ 2505ના સ્તરે હતી. કંપનીએ ચાર મહિના કરતાં ઓછા સમયમાં 100 ટકાથી વધુ વૃદ્ધિ નોંધાવી છે.