- ખેડામાં CCCના બોગસ સર્ટીફિકેટ મામલે કાર્યવાહી
- મહેમદાવાદના 111 પ્રાથમિક શિક્ષકોને નોટિસ પાઠવાઇ
- શિક્ષકોને સાત દિવસમાં જ ખુલાસો કરવા આદેશ
CCCના ખોટા સર્ટીફિકેટના કૌભાંડમાં બનાસકાંઠા બાદ હવે ખેડાના મહેમદાવાદ તાલુકાના શિક્ષકો સૌથી વધુ સામેલ છે. બોગસ CCC અને CCC+ના પ્રમાણપત્ર મામલે ખેડા જિલ્લાના પ્રાથમિક શિક્ષણ વિભાગે મહેમદાવાદના 111 પ્રાથમિક શિક્ષકોને નોટિસ પણ ફટકારી છે.
ખોટા પુરાવાના લીધે પ્રાથમિક શિક્ષકોએ છેતરપિંડી કર્યાનો ખુલાસો થયો
શિક્ષકોએ ગર્લ્સ પોલિટેક્નિક અમદાવાદના બોગસ પ્રમાણપત્રો રજૂ કર્યા હતા. આ બોગસ સર્ટીના આધારે શિક્ષકોએ પ્રથમ, બીજા અને ત્રીજા ઉચ્ચતર પગારનો લાભ લીધો હતો. આથી
ખોટા પુરાવાના લીધે પ્રાથમિક શિક્ષકોએ છેતરપિંડી કર્યાનો ખુલાસો થયો હતો. જોકે ખેડા જિલ્લાના પ્રાથમિક શિક્ષણ વિભાગે શિક્ષકોને સાત દિવસની અંદર આ મામલે ખુલાસો કરવા આદેશ આપ્યો છે. તમને જણાવી દઇએ કે, ગુજરાતમાં સૌથી વધુ બોગસ પ્રમાણપત્ર ખેડા જિલ્લામાંથી સામે આવ્યા છે. એક જ તાલુકામાં એક-સાથે મોટા પ્રમાણમાં નોટીસ આપ્યાનો આ પ્રથમ બનાવ છે. મહુધા, કઠલાલ, કપડવંજ અને ગળતેશ્વરમાં પણ બોગસ સર્ટી કેસો સામે આવ્યા છે.
બનાસકાંઠામાં પણ 22 પ્રાથમિક શાળાના શિક્ષકોએ બોગસ સર્ટી રજૂ કર્યા હતા
મહત્વનું છે કે, આ કૌભાંડમાં 69 શિક્ષકોએ 9 અને 31 વર્ષનો ઉચ્ચતર પગારનો લાભ નથી લીધેલો. જ્યારે બાકીના 42 શિક્ષકોએ લાભ લીધો હોવાનું માલુમ પડતાં આ સમગ્ર મામલે તપાસ હાથ ધરાઇ હતી. આમાંથી કેટલાક શિક્ષકો તો પગારનો લાભ લઈને નિવૃત્ત પણ થઈ ચૂક્યા છે. ઉલ્લેખનીય છે કે, બનાસકાંઠામાં પણ 22 પ્રાથમિક શાળાના શિક્ષકોએ બોગસ સર્ટી રજૂ કર્યા હતા.
