સોનીપત / VIDEO : પિતાના અંતિમ સંસ્કારમાં ન આવી 3 દીકરીઓ, વીડિયો કોલ પર જોયા, 5100 મોકલીને કહ્યું- ગંગામાં પધરાવી દેજો અસ્થિ

હરિયાણાના સોનીપતથી બદલાયેલા સંબંધોની એક ઈમોશનલ કહાની સામે આવી છે. સોનીપતમાં એક જમાનાના કાપડાના વેપારી રહેલા શિવચરણ રામરતન ગુપ્તાનું જ્યારે અવસાન થયું ત્યારે તેમની 3 દીકરીઓમાંથી એક પણ દીકરી પિતાના અંતિમ સંસ્કારમાં ન આવી, ઉલટાનું તેમણે વીડિયો કોલ પર પિતાના અંતિમ સંસ્કાર જોયા અને જાણે પોતે પિતા માટે કંઈક કરી છૂટતી હોય તેમ અંતિમ સંસ્કારના સામાન માટે રુપિયા પણ મોકલાવ્યાં પરંતુ વૃદ્ધાશ્રમે તેમને એક મોટી લપડાક આપી અને તેમણે પૈસા પાછા આપ્યાં અને પોતાની રીતે અંતિમ સંસ્કાર કર્યા.

વીડિયો કોલ પર જોયા અંતિમ સંસ્કાર

શિવચરણ રામરતન ગુપ્તાએ તેમની ત્રણ પુત્રીઓને ભણાવી-ગણાવી અને પગભર કરી પરંતુ દીકરીઓ સાસરે જતા રહેતા અંતિમ સમયમાં તેમને વૃદ્ધાશ્રમમાં રહેવાની ફરજ પડી હતી. સૌથી દુઃખદ વાત એ છે કે તેમની માંદગી અને મૃત્યુના સમાચાર મળ્યા છતાં, તેમની કોઈ પુત્રી તેમના અંતિમ દર્શન કરવા પહોંચી ન હતી. અંતિમ સંસ્કાર પણ આશ્રમ મેનેજમેન્ટની દેખરેખ હેઠળ કરવામાં આવ્યા હતા, અને ત્રણેય પુત્રીઓએ તેમના પિતાની અંતિમ વિદાય વીડિયો કોલ દ્વારા જોઈ હતી.

મોટી દીકરીએ 5100 રુપિયા મોકલ્યાં

શિવચરણના અવસાન બાદ તેમની ત્રણ પુત્રીઓને ફરીથી જાણ કરવામાં આવી અને અંતિમ સંસ્કારમાં હાજરી આપવા વિનંતી કરવામાં આવી. જોકે, તેમણે દૂર હોવાનું બહાનું કાઢીને આવવાનું ટાળ્યું. મોટી પુત્રી, અનિતા, જે નેપાળમાં શિક્ષિકા છે, તેણે ઓનલાઈન 5,100 રૂપિયા મોકલ્યા અને તેમના પિતાના અંતિમ સંસ્કાર સન્માન સાથે કરવા વિનંતી કરી હતી. આશ્રમ મેનેજમેન્ટના જણાવ્યા અનુસાર, ત્રણેય પુત્રીઓએ તેમના પિતાની અંતિમ વિદાય વીડિયો કોલ દ્વારા જોઈ હતી. બાદમાં, તેઓએ અંતિમ સંસ્કારનો વિડિઓ માંગ્યો અને રાખના વિસર્જન વિશે પૂછપરછ કરી. જોકે, આશ્રમે મોકલેલા 5,100 રૂપિયા પરત કર્યા અને અંતિમ સંસ્કારની બધી વ્યવસ્થા જાતે કરી. જીવતા ત્યારે રોજ વીડિયો કોલ પર પિતા સાથે વાતો કરતી હતી.

ક્યાં રહે છે કપાતર દીકરીઓ

શિવચરણને ત્રણ દીકરીઓ હતી. એક નેપાળમાં, એક સુરતમાં અને એક ઉત્તર પ્રદેશમાં રહેતી હતી. બે શિક્ષિકા હતી, જ્યારે એક HDFC બેંકમાં કામ કરતી હતી. શિવચરણ તેની દીકરીઓ સાથે દિવસમાં બે થી ત્રણ વાર વીડિયો કોલ દ્વારા વાત કરતો હતો. તે નાની-મોટી દરેક વિગતો તેમની સાથે શેર કરતો હતો અને હંમેશા પરિવારને ફરીથી જોડવા માંગતો હતો.

વધુ વાંચો : VIDEO : ગાંધીનગરમાં કાર રેલિંગ સાથે જોરદાર ટકરાઈને પલટી મારી ગઈ, ચાલક જીવતો નીકળ્યો

કપડાના વેપારમાં નુકસાન બાદ વૃદ્ધાશ્રમમાં રહેવા મજબૂર

અપના ઘર આશ્રમના ડિરેક્ટર સારિકા કાલરાએ જણાવ્યું હતું કે શિવચરણ રામરતન ગુપ્તા મૂળ મહારાષ્ટ્રના હતા. તેમના સંબંધીઓ સોનીપતના કાકરોઈ ગામમાં રહેતા હતા , તેથી તેઓ ત્યાં ગયા અને 2024 માં અપના ઘર આશ્રમમાં રહેવાની ઇચ્છા વ્યક્ત કરી. તેમણે સમજાવ્યું કે તેમના કપડાના વ્યવસાયમાં નોંધપાત્ર નુકસાન થયા પછી તેઓ આર્થિક અને કૌટુંબિક સમસ્યાઓનો સામનો કરી રહ્યા હતા. થોડા સમય પછી, શિવચરણ તેમની પત્ની મીના ગુપ્તાને આશ્રમમાં લાવ્યા. 12 ઓક્ટોબર, 2024 ના રોજ, મીના ગુપ્તાનું આશ્રમમાં અવસાન થયું. આશ્રમ મેનેજમેન્ટે તેમની ત્રણ પુત્રીઓને જાણ કરી, પરંતુ તેમાંથી કોઈ પણ હાજર ન રહી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ