રાજકારણ / નીતિશ કુમારે MLC પદેથી આપ્યું રાજીનામું, બિહાર રાજકારણમાં નવી ચળવળ

Nitish Kumar Bihar Politics: બિહારના મુખ્યમંત્રી નીતિશ કુમારે વિધાન પરિષદ (MLC) ના સભ્યપદેથી રાજીનામું આપી દીધું છે. જોકે આ અંગેની સત્તાવાર જાહેરાત હજુ થવાની બાકી છે. છતાં રાજકીય વર્તુળોમાં આ સમાચારને લઈને ભારે ચર્ચા ચાલી રહી છે. માહિતી અનુસાર, તેમણે મુખ્યમંત્રી નિવાસસ્થાનેથી સીધા વિધાન પરિષદના અધ્યક્ષ અવધેશ નારાયણ સિંઘને પોતાનું રાજીનામું સુપરત કર્યું હતું. 2006થી સતત પરિષદના સભ્ય રહેલા નીતિશ કુમારે આ પગલું રાજ્યસભામાં તેમની નવી ભૂમિકા ધ્યાનમાં રાખીને લીધું હોવાનું માનવામાં આવે છે.

રાજ્યસભા તરફ પગલું, નવી સરકારની ચર્ચા તેજ

નીતિશ કુમારના આ નિર્ણય બાદ બિહારના રાજકારણમાં નવા ફેરફારોના સંકેતો મળી રહ્યા છે. તેઓ તાજેતરમાં રાજ્યસભા માટે ચૂંટાયા છે અને એવી ધારણા છે કે તેઓ ટૂંક સમયમાં મુખ્યમંત્રી પદેથી પણ રાજીનામું આપી શકે છે. રાજ્યમાં નવી સરકાર રચવાના પ્રયાસો પણ શરૂ થઈ ગયા હોવાની ચર્ચા છે. આ વચ્ચે, જેડીયુના અનેક નેતાઓ મુખ્યમંત્રી નિવાસસ્થાને પહોંચી રહ્યા છે, જે રાજકીય ગતિવિધિઓને વધુ તેજ બનાવે છે. રવિવારે સાંજે પણ ઘણા અગ્રણીઓએ તેમની મુલાકાત લીધી હતી, જેનાથી રાજકીય સમીકરણોમાં બદલાવની શક્યતા વધુ મજબૂત બની છે.

નીતિન નબીનનું પણ રાજીનામુ

આ સમગ્ર ઘટનાક્રમ દરમિયાન ભાજપના નેતા નીતિન નબીનએ પણ ધારાસભ્ય પદેથી રાજીનામું આપવાની જાહેરાત કરી છે. તેઓ બાંકીપુર મતવિસ્તારનું પ્રતિનિધિત્વ કરતા હતા. રાજ્યસભા માટે ચૂંટાયા બાદ તેમણે પોતાની નવી જવાબદારી માટે આ પગલું લીધું છે. ભાજપના પ્રદેશ પ્રમુખ સંજય સરાઓગીએ પણ આ બાબતની પુષ્ટિ કરી છે. નીતિન નબીન હાલમાં આસામ પ્રવાસે હોવાથી તેમણે પોતાના રાજીનામાની પ્રક્રિયા સમયસર પૂર્ણ થાય તે માટે પહેલેથી જ સોંપી દીધું હતું.

આ પણ વાંચો: દેશભરમાં 1100 ઇમેઇલથી બોમ્બની ધમકીઓ ફેલાવનાર આરોપીની મૈસુરમાંથી ધરપકડ

રાજ્યસભા શપથ અને રાજકીય સફર

નીતિશ કુમાર 2006થી વિધાન પરિષદના સભ્ય તરીકે સતત સેવા આપી રહ્યા હતા અને 2024માં તેઓ ચોથી વખત ચૂંટાયા હતા, જેમનો કાર્યકાળ 2030 સુધીનો હતો. પરંતુ 16 માર્ચ 2026ના રોજ રાજ્યસભામાં ચૂંટાયા બાદ તેમને નિયમ મુજબ પરિષદનું સભ્યપદ છોડવું જરૂરી બન્યું. એવી અપેક્ષા છે કે તેઓ 10 એપ્રિલે રાજ્યસભાના સભ્ય તરીકે શપથ લેશે. તેમની રાજકીય સફર ખૂબ લાંબી અને અનુભવી રહી છે. તેઓ દસ વખત બિહારના મુખ્યમંત્રી રહી ચૂક્યા છે અને અનેક વખત લોકસભામાં પણ સાંસદ તરીકે સેવા આપી છે. હવે ફરી એકવાર રાષ્ટ્રીય રાજકારણમાં તેમની એન્ટ્રી થવા જઈ રહી છે. જે બિહાર અને દેશની રાજનીતિમાં મહત્વપૂર્ણ ફેરફારો લાવી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ