હવામાન અપડેટ / આગામી અઠવાડિયુ પણ રહેશે ભારે! ગુજરાત-મહારાષ્ટ્ર સહિતના રાજ્યોમાં ભારે વરસાદની ચેતવણી

Weather News: દેશના હવામાનમાં સતત પલટો આવી રહ્યો છે. આ વખતે ચોમાસાની ઋતુમાં દેશના વિવિધ ભાગોમાં સારો વરસાદ થયો છે. ઉત્તર-પશ્ચિમ ભારતમાં ભારે વરસાદે તબાહી મચાવી છે. ઉત્તરાખંડ, જમ્મુ અને કાશ્મીર, હિમાચલ પ્રદેશ અને પંજાબ જેવા રાજ્યોમાં મોટા પાયે વિનાશ થયો છે. દિલ્હી-એનસીઆરમાં પણ આ સિઝનમાં અત્યાર સુધીમાં ભારે વરસાદ પડ્યો છે. દરિયામાં બદલાતી પરિસ્થિતિઓને કારણે, દરિયાકાંઠાના વિસ્તારો સહિત ઘણા રાજ્યોમાં ભારેથી અતિ ભારે વરસાદની શક્યતા છે.

ભારતીય હવામાન વિભાગ (IMD) અનુસાર, અરબી સમુદ્રમાં હલચલ છે, જે ડિપ્રેશનમાં ફેરવાયું નથી અને તે પશ્ચિમ તરફ આગળ વધી રહ્યું છે. આ સિસ્ટમ ગુજરાતના દરિયાકાંઠાના વિસ્તાર, ગુજરાતના નલિયાથી 570 કિમી પશ્ચિમ-ઉત્તરપશ્ચિમમાં સ્થિત છે. આગામી થોડા કલાકોમાં તે લો-પ્રેશર સિસ્ટમમાં ફેરવાય તેવી પ્રબળ શક્યતા છે. બીજી તરફ, બંગાળની ખાડીમાં એક નવી લો-પ્રેશર સિસ્ટમ બનવાની શક્યતા છે. જેને લીધે આગામી દિવસોમાં પશ્ચિમ અને પૂર્વ ભારતના હવામાનમાં પલટો આવી શકે છે. ભારતીય હવામાન વિભાગે પૂર્વ અને ઉત્તરપૂર્વ ભારતના ઘણા રાજ્યોમાં ભારેથી અતિ ભારે વરસાદની આગાહી કરી છે.

આગામી 4-5 દિવસ ભારે વરસાદની સંભાવના

ભારતીય હવામાન વિભાગ (IMD) એ આગામી 4 થી 5 દિવસ માટે પૂર્વી અને દ્વીપકલ્પીય ભારતમાં વ્યાપક વરસાદની ચેતવણી આપી છે. હવામાન વિભાગના જણાવ્યા પ્રમાણે, આ દરમિયાન, ઘણા રાજ્યોમાં ભારેથી અતિ ભારે વરસાદ થવાની સંભાવના છે, જ્યારે ઉત્તર-પૂર્વ અને પશ્ચિમ ભારતના કેટલાક ભાગોમાં પણ વરસાદની અસર જોવા મળશે. હવામાન વિભાગ દ્વારા 16 સપ્ટેમ્બર સુધી અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં સતત વરસાદની આગાહી કરવામાં આવી છે. હવામાન વિભાગે ચેતવણી આપી છે કે 12 થી 16 સપ્ટેમ્બર દરમિયાન અરુણાચલ પ્રદેશ અને નાગાલેન્ડ, મણિપુર, મિઝોરમ અને ત્રિપુરામાં ખૂબ જ ભારે વરસાદ પડી શકે છે. જ્યારે 13 થી 16 સપ્ટેમ્બર વચ્ચે આસામ અને મેઘાલયમાં ભારેથી અતિ ભારે વરસાદ થવાની સંભાવના છે.

પૂર્વ અને મધ્ય ભારતમાં ભારે વરસાદની શક્યતા

ઉપ-હિમાલય પશ્ચિમ બંગાળ અને સિક્કિમમાં 15 સપ્ટેમ્બર સુધી સતત વરસાદ થશે અને 13 સપ્ટેમ્બરે અહીં ખૂબ જ ભારે વરસાદ થવાની સંભાવના છે. 11 અને 12 સપ્ટેમ્બરે ઓડિશામાં ભારે વરસાદની આગાહી છે, જ્યારે બિહાર અને છત્તીસગઢમાં 14 સપ્ટેમ્બર સુધી ભારે વરસાદ પડી શકે છે. ઝારખંડમાં 11 સપ્ટેમ્બરે ભારે વરસાદ થવાની સંભાવના વ્યક્ત કરાઇ છે. જ્યારે ઉત્તર પ્રદેશના પૂર્વી ભાગોમાં 11, 12, 15 અને 16 સપ્ટેમ્બરે ભારે વરસાદ થઈ શકે છે, જ્યારે પશ્ચિમી ઉત્તર પ્રદેશમાં 12 સપ્ટેમ્બરે વરસાદ પડશે. આ ઉપરાંત, હિમાચલ પ્રદેશ અને જમ્મુ-કાશ્મીરમાં પણ 13-14 સપ્ટેમ્બરે વરસાદ પડશે. ઉત્તરાખંડમાં 12 થી 15 સપ્ટેમ્બર સુધી વરસાદની ચેતવણી જાહેર કરવામાં આવી છે.

આ પણ વાંચો: ધનબાદમાં મોટી દુર્ધટના, બિલ્ડિંગની છત ધરાશાયી થતા 3 બાળકોના મોત, ચારની હાલત ગંભીર

મહારાષ્ટ્ર અને પશ્ચિમ ભારતમાં ભારે વરસાદ

મહારાષ્ટ્રમાં 13 થી 16 સપ્ટેમ્બર દરમિયાન વરસાદની તીવ્રતા વધશે. જ્યારે 12 થી 16 સપ્ટેમ્બર દરમિયાન મધ્ય મહારાષ્ટ્ર અને મરાઠાવાડમાં ભારે વરસાદની સંભાવના છે. 13 સપ્ટેમ્બરે મરાઠાવાડમાં અને 14 સપ્ટેમ્બરે કોંકણ-ગોવા અને મધ્ય મહારાષ્ટ્રમાં અતિ ભારે વરસાદ થવાની સંભાવના છે. ગુજરાતમાં પણ 14 થી 16 સપ્ટેમ્બર સુધી વરસાદ થશે. જ્યારે દક્ષિણ ભારતના રાજ્યોમાં પણ વરસાદની અસર જોવા મળશે. 11 સપ્ટેમ્બરે તમિલનાડુમાં ભારે વરસાદ પડી શકે છે. 10 સપ્ટેમ્બરે કેરળ, માહે અને દક્ષિણ આંતરિક કર્ણાટકમાં વરસાદ થવાની સંભાવના છે તો આંધ્રપ્રદેશ, તેલંગાણા અને રાયલસીમામાં આગામી પાંચ દિવસ સુધી ભારે પવન સાથે વરસાદ પડવાની સંભાવના છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ