મહારાષ્ટ્ર / ઉદ્ધવ-ફડણવીસની બંધ રૂમમાં 20 મિનિટ સુધી મુલાકાત... CMએ ગઈકાલે જ સાથે જોડાવાની કરી હતી ઓફર

Maharashtra Politics : મહારાષ્ટ્રથી એક મોટા સમાચાર સામે આવ્યા છે. વાસ્તવમાં આજે મહારાષ્ટ્ર વિધાનસભામાં મહત્વપૂર્ણ રાજકીય હલચલ જોવા મળી. મુખ્યમંત્રી દેવેન્દ્ર ફડણવીસ અને શિવસેના (ઉદ્ધવ જૂથ)ના વડા ઉદ્ધવ ઠાકરેએ બંધ રૂમમાં મુલાકાત કરી. આ મુલાકાત વિધાન પરિષદના અધ્યક્ષ રામ શિંદેના ચેમ્બરમાં લગભગ 20 મિનિટ ચાલી હતી. આ બેઠકમાં આદિત્ય ઠાકરે પણ હાજર હતા. આ બેઠક એવા સમયે થઈ છે જ્યારે એક દિવસ પહેલા જ દેવેન્દ્ર ફડણવીસે ઉદ્ધવ ઠાકરેને સરકારમાં જોડાવા માટે આમંત્રણ આપ્યું હતું.

આ મુદ્દાઓ પર ચર્ચા થઈ

સૂત્રોના જણાવ્યા અનુસાર આ બેઠકમાં ઘણા મુદ્દાઓ પર ચર્ચા થઈ હતી. વિધાનસભામાં વિરોધ પક્ષના નેતાનું પદ, રાજ્યમાં ત્રિભાષા નીતિ જેવા મહત્વપૂર્ણ મુદ્દાઓ પર ચર્ચા થઈ હતી.

શું રાજ્યમાં નવા રાજકીય સમીકરણો રચાઈ રહ્યા છે?

જોકે આ મુલાકાત અંગે બંને નેતાઓ તરફથી કોઈ સત્તાવાર નિવેદન આવ્યું નથી પરંતુ આ મુલાકાતને મહારાષ્ટ્રના રાજકારણમાં સંભવિત નવા સમીકરણોના સંકેત તરીકે જોવામાં આવી રહી છે.

ફડણવીસે ગઈકાલે જ ઓફર આપી હતી

નોંધનીય છે કે બુધવારે મહારાષ્ટ્રના મુખ્યમંત્રી દેવેન્દ્ર ફડણવીસે તેમના જૂના સાથી ઉદ્ધવ ઠાકરેને વિધાન પરિષદમાં શાસક પક્ષમાં જોડાવાનો પ્રસ્તાવ મૂક્યો હતો. જોકે આખા ગૃહે આ પ્રસ્તાવની ટીકા કરી હતી, પરંતુ શિવસેના (UBT)ના વડા ચૂપ રહ્યા.

ઉદ્ધવે શું કહ્યું?

જોકે ફડણવીસની આ ઓફર પર ઉદ્ધવ ઠાકરેએ પાછળથી મીડિયાને કહ્યું કે, કેટલીક બાબતોને મજાક તરીકે લેવી જોઈએ.

આ પણ વાંચો : પ્રિયંકા ગાંધીનાં પતિની વધી મુશ્કેલી, ED દ્વારા રોબર્ટ વાડ્રા સામે ચાર્જશીટ દાખલ, કરોડોની મિલકતો જપ્ત

શું હતું ફડણવીસનું આખું નિવેદન ?

દેવેન્દ્ર ફડણવીસે વિધાન પરિષદમાં વિપક્ષના નેતા અંબાદાસ દાનવેના કાર્યકાળના અંત પ્રસંગે આયોજિત વિદાય સમારંભ દરમિયાન આ નિવેદન આપ્યું હતું. ઉદ્ધવને શાસક પક્ષમાં જોડાવાનો પ્રસ્તાવ મૂકતા મુખ્યમંત્રીએ કહ્યું હતું કે, 'જુઓ ઉદ્ધવ જી, 2029 સુધી અમારા માટે ત્યાં (વિપક્ષમાં) આવવાની કોઈ તક નથી... પરંતુ તમે અહીં (શાસક પક્ષમાં) આવી શકો છો, આનો વિચાર કરી શકાય છે. અમે આનો અલગ રીતે વિચાર કરી શકીએ છીએ. પરંતુ અમારા માટે ત્યાં જવાનો કોઈ વિકલ્પ બચ્યો નથી.' તેમણે એમ પણ કહ્યું કે અંબાદાસ દાનવે જ્યાં પણ (શાસક પક્ષમાં કે વિપક્ષમાં) છે, તેમના વાસ્તવિક વિચારો રાષ્ટ્રવાદી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ