હવામાન અપડેટ / દેશના અનેક રાજ્યોમાં અંગ દઝાડતી ગરમી તો પાંચ રાજ્યોમાં વરસાદની શક્યતા

Weather Forecast : ગુજરાત સહીત દેશના ઘણા વિસ્તારોમાં હવે ગરમી ધીમે ધીમે વધતી જઈ રહી છે. ખાસ કરીને ઉત્તર પશ્ચિમ ભારતના મેદાની વિસ્તારોમાં તાપમાનમાં વધારો નોંધાઈ રહ્યો છે. IMD દ્વારા જાહેર કરાયેલી આગાહી મુજબ આગામી સાત દિવસ દરમિયાન મહત્તમ તાપમાનમાં 3 થી 5 ડિગ્રી સેલ્સિયસ સુધીનો વધારો થઈ શકે છે. આ તરફ ગુજરાત અને મહારાષ્ટ્રમાં પણ આવનારા દિવસોમાં ગરમી વધવાની શક્યતા દર્શાવવામાં આવી છે.

ક્યાં પડશે વરસાદ?

IMDના અનુમાન મુજબ બે પશ્ચિમી વિક્ષેપોના કારણે 27-28 ફેબ્રુઆરી અને 2 થી 4 માર્ચ દરમિયાન જમ્મુ કાશ્મીર, હિમાચલ પ્રદેશ અને ઉત્તરાખંડના કેટલાક વિસ્તારોમાં હળવો વરસાદ અને ઊંચાઈવાળા વિસ્તારોમાં હિમવર્ષા થઈ શકે છે. ઉપરાંત ઉપ-હિમાલયન પશ્ચિમ બંગાળ અને સિક્કિમમાં પણ વાવાઝોડા સાથે હળવાથી મધ્યમ વરસાદની શક્યતા વ્યક્ત કરવામાં આવી છે.

દિલ્હીમાં તાપમાન વધશે

રાજધાની દિલ્હીમાં માર્ચની શરૂઆત સુધી આકાશ મોટાભાગે સ્વચ્છ રહેવાની ધારણા છે. દિવસ દરમિયાન તાપમાન 29 થી 32 ડિગ્રી સેલ્સિયસ સુધી પહોંચી શકે છે. સવારે હળવું ધુમ્મસ રહેવાની શક્યતા છે, પરંતુ દિવસ દરમિયાન તડકો વધુ રહેશે.

આ પણ વાંચો : જવાહરલાલ નેહરુ યુનિવર્સિટીમાં વિદ્યાર્થીઓનું પ્રદર્શન, રાત્રિભર વિરોધ, UGC નિયમો અમલની માંગ

ઉત્તર પ્રદેશમાં શુષ્ક હવામાન

ઉત્તર પ્રદેશમાં આગામી સાત દિવસ સુધી વરસાદની શક્યતા નથી. પૂર્વ અને પશ્ચિમ બંને વિસ્તારોમાં હવામાન સુકું અને સ્વચ્છ રહેશે. દિવસ દરમિયાન તેજ તડકાને કારણે ગરમી વધુ અનુભવાશે. તાપમાન સામાન્ય કરતાં 2-3 ડિગ્રી વધુ રહી શકે છે. લખનૌમાં મહત્તમ તાપમાન આશરે 31 ડિગ્રી અને લઘુત્તમ 16 ડિગ્રી આસપાસ રહી શકે છે. હમીરપુર જિલ્લામાં સૌથી વધુ ગરમી નોંધાઈ હતી, જ્યારે અયોધ્યા સૌથી ઠંડો જિલ્લો રહ્યો. બિહારમાં માર્ચની શરૂઆત સાથે તાપમાનમાં લગભગ 4 ડિગ્રી સુધીનો વધારો થઈ શકે છે. હાલ તો હવામાન સ્થિર છે અને વરસાદ અંગે કોઈ ખાસ ચેતવણી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ