ગુજરાત / સુરતમાં ‘અવધ યુટોપિયા’ ક્લબમાં ગરબાના નામે બોલિવૂડ ગીતો વગાડતા બજરંગ દળ મેદાને, પછી જે થયું...!

નવરાત્રિ એટલે માતાજીની આરાધના, ભક્તિ અને પરંપરાગત ગરબાનો ઉત્સવ. ગુજરાતમાં આ પર્વ દરમિયાન ખેલૈયાઓ ગરબાના તાલે ઝૂમીને માતાજીની ભક્તિ કરે છે. પરંતુ સુરતના ડુમસ વિસ્તારમાં આવેલા અવધ યુટોપિયામાં આયોજિત નવરાત્રિના કાર્યક્રમને લઈને વિવાદ ઊભો થયો છે. અહીં ગરબાના નામે બોલિવૂડનાં દ્વિઅર્થી અને અસભ્ય ગીતો મોટા અવાજે વગાડીને યુવાધન પાસે ડિસ્કો ડાન્સ કરાવવામાં આવતો હોવાનો આક્ષેપ કરવામાં આવ્યો છે. આ ઘટનાનો વીડિયો સોશિયલ મીડિયા પર વાયરલ થતાં જ ગરબા પ્રેમીઓ અને ધર્મપ્રેમી લોકોમાં ભારે રોષ જોવા મળ્યો હતો. લોકોએ સવાલ ઉઠાવ્યો હતો કે માતાજીની આરાધનાના પવિત્ર તહેવારને ક્લબ કલ્ચરમાં ફેરવીને ધાર્મિક લાગણીઓને ઠેસ પહોંચાડવામાં આવી રહી છે કે કેમ?

વીડિયો વાયરલ થતાં બજરંગ દળ મેદાનમાં ઊતર્યું

અવધ યુટોપિયાના કાર્યક્રમનો વીડિયો સોશિયલ મીડિયા પર વાયરલ થયા બાદ મામલો વધુ ગરમાયો હતો. વીડિયોમાં ગરબાના નામે બોલિવૂડનાં દ્વિઅર્થી અને અસભ્ય ગીતો વગાડવામાં આવતા હોવાનો આક્ષેપ થતાં બજરંગ દળના હોદ્દેદારો અને કાર્યકરો સ્થળ પર પહોંચ્યા હતા. કાર્યકરોએ કાર્યક્રમમાં વગાડવામાં આવતા ગીતો સામે સખત વિરોધ નોંધાવ્યો હતો અને ડીજે બંધ કરાવ્યો હતો. આ દરમિયાન બજરંગ દળના કાર્યકરોએ આયોજકોનો ઘેરાવ કરીને સવાલો પૂછ્યા હતા. તેમનો મુખ્ય વિરોધ એ હતો કે નવરાત્રિ માતાજીની આરાધના અને પરંપરાગત ગરબા માટેનો તહેવાર છે, તો પછી આવા કાર્યક્રમમાં અસભ્ય ગીતો વગાડીને ડિસ્કો ડાન્સ શા માટે કરાવવામાં આવે છે? અચાનક થયેલા વિરોધને કારણે કાર્યક્રમના સ્થળે દોડધામ મચી ગઈ હતી અને વાતાવરણ તંગ બન્યું હતું. ગરબાના કાર્યક્રમમાં થયેલા આ વિરોધને કારણે સમગ્ર મામલો ચર્ચાનો વિષય બન્યો હતો.

બજરંગ દળે આયોજકોને પૂછ્યા આકરા સવાલો

કાર્યકરોએ આયોજકોને ઘેરાવ કરીને નવરાત્રિના કાર્યક્રમની પદ્ધતિ સામે વાંધો ઉઠાવ્યો હતો. તેમણે સવાલ કર્યો હતો કે નવરાત્રિ માતાજીની ભક્તિ માટે છે કે પછી ડિસ્કો અને અસભ્યતાને પ્રોત્સાહન આપવા માટે? ગરબા પ્રેમીઓ અને ધર્મપ્રેમી લોકોમાં પણ આ ઘટનાને લઈને નારાજગી જોવા મળી હતી. લોકોનો આક્ષેપ હતો કે માતાજીની આરાધના સાથે જોડાયેલા પવિત્ર તહેવારમાં પરંપરાગત ગરબાના બદલે બોલિવૂડનાં દ્વિઅર્થી ગીતો વગાડવા યોગ્ય નથી. સોશિયલ મીડિયા પર વીડિયો વાયરલ થયા બાદ આ મુદ્દે લોકોમાં ચર્ચા અને વિરોધ વધ્યો હતો.

આયોજકોએ સ્વીકારી ભૂલ, પરંપરાગત ગરબાની આપી ખાતરી

બજરંગ દળના કાર્યકરોના ઉગ્ર વિરોધ અને સ્થળ પર વાતાવરણ ગરમાતાં આખરે આયોજકોએ પોતાની ભૂલ સ્વીકારી હતી. આયોજકોએ ખાતરી આપી હતી કે ભવિષ્યમાં નવરાત્રિના કાર્યક્રમમાં આ પ્રકારનાં અસભ્ય કે બોલિવૂડનાં ગીતો વગાડવામાં નહીં આવે. તેમણે સ્પષ્ટ બાંહેધરી આપી હતી કે હવે પછી કાર્યક્રમમાં માત્ર પરંપરાગત ગરબા જ રમાડવામાં આવશે. સાથે જ હિન્દુઓની ધાર્મિક ભાવનાઓ દુભાય નહીં તેનું ધ્યાન રાખવામાં આવશે તેવી ખાતરી પણ આપી હતી. આયોજકોની ખાતરી બાદ મામલો શાંત પડ્યો હતો. જોકે, આ ઘટનાએ નવરાત્રિના કાર્યક્રમોમાં પરંપરા અને મનોરંજન વચ્ચેની મર્યાદા અંગે ચર્ચા જગાવી છે.

આ પણ વાંચો : અમદાવાદમાં મંડળી ગરબામાં અચાનક બબાલ! પ્રવેશ મુદ્દે લાકડીઓ અને તલવારો ઉડતાં ખેલૈયાઓમાં ફફડાટ

નવરાત્રિની પરંપરા જાળવવા અંગે ચર્ચા

ગુજરાતમાં નવરાત્રિ માત્ર નૃત્યનો ઉત્સવ નથી, પરંતુ માતાજીની ભક્તિ અને પરંપરા સાથે જોડાયેલું પર્વ છે. આવા સમયે ગરબાના કાર્યક્રમોમાં કયા પ્રકારનાં ગીતો વગાડવામાં આવે છે અને આયોજનમાં પરંપરાનું કેટલું ધ્યાન રાખવામાં આવે છે તે મુદ્દે લોકોની અપેક્ષાઓ પણ જોડાયેલી હોય છે. સુરતના અવધ યુટોપિયાની આ ઘટના બાદ આયોજકોએ ભવિષ્યમાં માત્ર પરંપરાગત ગરબા કરાવવાની ખાતરી આપી છે. હવે કાર્યક્રમોમાં આ ખાતરીનું પાલન થાય છે કે નહીં તે જોવાનું રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ