- ભારતના એક યુવકને પાકિસ્તાની યુવતી સાથે પ્રેમ થયો
- 7 વર્ષના લાંબી રાહ બાદ બને એક થયા.
- ભારત-પાકિસ્તાન વચ્ચેની દુશ્મનીને કારણે નમન અને શહલીનને એક થવામાં આવી અનેક અડચણો
કહેવાય છે કે પ્રેમને કોઇ સરહદ હોતી નથી, આ વાતને સાર્થક કરતી ઘટના સામે આવી છે જેમાં ભારતના એક યુવકને પાકિસ્તાની યુવતી સાથે પ્રેમ થઇ ગયો હતો. ભારતના નમન લુથરા અને પાકિસ્તાનની શહલીન જાવેદની પ્રેમ કહાનીએ ભારે ચર્ચા જગાવી છે. 7 વર્ષ પહેલા બંનેની મુલાકાત થઇ હતી. ભારત-પાકિસ્તાન વચ્ચેની દુશ્મનીને કારણે નમન અને શહલીનને એક થવામાં અનેક અડચણો પણ આવી, જો કે બંનેનો પ્રેમ સાચો હોવાથી 7 વર્ષ સુધી રાહ જોયા બાદ આજે બંને એક થઇ ગયા છે. ફિલ્મો જેવી લાગતી આ પ્રેમ કહાની વિશે નમનના માતા-પિતાએ જ જાહેર કર્યો અને તેમાંથી કેટલાક રોચક કિસ્સાઓ પણ જણાવ્યા છે.
.jpg)
પંજાબના બટાલામાં રહેતો નમન વર્ષ 2015માં પોતાના સંબંધીઓને મળવા માટે પાકિસ્તાનના લાહોરમાં ગયો હતો. આ પ્રવાસ દરમિયાન જ તેની મુલાકાત ત્યાં રહેતી શહલીન સાથે થઇહતી. બંનેને એકબીજાને જોતા જ દિલ દઇ બેઠ્યા હતા. ત્યારબાદ સોશિયલ મીડિયાની મદદથી બંને વધુ નજીક આવ્યા અને વાત સગાઇ સુધી પહોંચી ગઇ. 2016માં બંનેની સગાઇ પણ થઇ ગઇ. આ સગાઇનું ફંક્શન પાકિસ્તાનમાં જ રાખવામાં આવ્યું હતું.
પ્રેમ આગળ પરિવારજનો પણ ઝૂકી ગયા
ત્યારબાદ પહેલીવાર શહલીન 2018માં ભારત આવી હતી. શહલીને નમનના પરિવારજનો સાથે મુલાકાત પણ કરી. વાતચીત અને એકબીજાનો સ્વભાવ મળી જતાં પ્રેમ આગળ પરિવારજનો પણ ઝૂકી ગયા અને વાત લગ્ન સુધી પહોંચી ગઇ. જો કે નમન અને શહલીન જાણતા હતા કે બંનેનું ઝડપથી એક થવું સરળ નહીં હોય. તમને જણાવી દઇએ કે શહલીન એક ઇસાઇ ધર્મની યુવતી છે અને નમન હિન્દુ. ભારત-પાકિસ્તાન વચ્ચેના ખરાબ સંબંધોને કારણે બંનેના લગ્નમાં અનેક અડચણો પણ આવી હતી.
કંઇપણ થાય હું નમન સાથે જ લગ્ન કરીશ અને ભારતમાં જ રહીશ
અધૂરામાં પૂરું 2020માં તો કોરોના મહામારી પણ ફેલાઇ અને લગ્ન પાછા ઠેલાયા, ત્યારબાદ 2021 અને 2022માં શહલીનના પરિવારજનોએ ભારતના વિઝા માટે અરજી કરી જે નકારી દેવામાં આવી હતી. શહલીન અને નમનની સાથે તેમના પરિવારજનો પણ નારાજ થયા જો કે સોશિયલ મીડિયા પર બંને કોન્ટેક્ટમાં રહ્યાં હતા અંતે તેમની આતૂરતાનો અંત આવ્યો અને 2023માં માર્ચમાં શહલીનના પરિવારમાંથી ત્રણ લોકોના વિઝા મંજૂર થયા અને તેઓ એપ્રિલમાં ભારત આવ્યા હતા. આ અંગે શહલીને જણાવ્યું કે મેં મનમાં વિચારી જ લીધું હતું કે કંઇપણ થાય હું નમન સાથે જ લગ્ન કરીશ અને ભારતમાં જ રહીશ.
પાકિસ્તાની યુવતી સાથે લગ્ન કરવા માટે પરિવારજનો કેમ થયા રાજી
અનોખી પ્રેમ કહાની વિશે નમનની માતાએ જણાવ્યું કે જ્યારે પુત્રએ પાકિસ્તાની યુવતી સાથે લગ્નની વાત કરી તો થોડો સમય અમે બધા અચરજમાં મૂકાઇ ગયા હતા. શરૂઆતમાં નમનના પિતા આ વાતથી રાજી ન હતા. પરંતુ નમનનો પ્રેમ જોઇને અમે રાજી થઇ ગયા. તો સામા પક્ષે શહલીનના માતા-પિતા પણ શરૂઆતમાં આ લગ્ન માટે રાજી ન હતા, પરંતુ દીકરીની જીદ આગળ નતમસ્તક થઇ ગયા. ભારતમાં શહલીન અને નમનના લગ્નની વિધિ પાંચ દિવસ સુધી ચાલી હતી. ત્યારે આ પ્રેમ કહાનીથી લોકોનું કહેવું છે કે સાચો પ્રેમ હોય તો ગમે તેટલી મુશ્કેલી આવે પણ એક થતાં કોઇ રોકી શકતું નથી.
