- ટીમ ઈન્ડીયાનો બેટ્સમેન મયંક અગ્રવાલ પિતા બન્યો
- ટ્વિટ કરીને આપી જાણકારી
- પુત્રનું નામ રાખ્યું આયાંશ
- 2018માં મયંકે બાળપણની ફ્રેન્ડ આશિતા સૂદ સાથે કર્યાં હતા લગ્ન
ટીમ ઇન્ડિયામાંથી બેટ્સમેન મયંક અગ્રવાલ પિતા બન્યો છે. તેમણે ટ્વીટ કરીને ફેન્સને આ જાણકારી આપી હતી. આ સાથે જ તેણે પુત્રનું નામ પણ દુનિયાની સામે જાહેર કર્યું હતું. મયંકે ટ્વિટર પર એક તસવીર શેર કરી છે, જેમાં તેની પત્ની અને તે પોતાના પુત્રને હાથમાં પકડેલા જોવા મળી રહ્યા છે. આ સાથે જ તેમણે લખ્યું છે કે, "અમારૂ દિલ આભારથી ભરેલું છે અને અમે તમારા માટે આયાંશ લાવી રહ્યા છીએ. પ્રકાશનું પહેલું કિરણ, આપણો ભાગ અને ભગવાનની ભેટ. મયંકના પુત્રનો જન્મ 8 ડિસેમ્બરે થયો હતો અને હવે તેણે પુત્રની પહેલી તસવીર શેર કરી છે.
મયંક અગ્રવાલે તેની બાળપણની મિત્ર આશિતા સૂદ સાથે લગ્ન કર્યા હતા
મયંક અગ્રવાલે તેની બાળપણની મિત્ર આશિતા સૂદ સાથે લગ્ન કર્યા હતા, જે વ્યવસાયે વકીલ છે, જૂન 2018 માં. સ્કૂલના દિવસોથી જ બંને મિત્રો હતા અને ધીરે ધીરે આ મિત્રતા પ્રેમમાં બદલાઈ ગઈ. આશિતાના પિતા પ્રવીણ સૂદ હાલ કર્ણાટકના ડીજીપી છે. મયંક હાલમાં ટીમ ઇન્ડિયાની બહાર છે. આઈપીએલની મિની હરાજી પહેલા તેને પંજાબ કિંગ્સે રિલીઝ કરી દીધો છે. આઇપીએલ 2022 પહેલા પંજાબ કિંગ્સે તેને 14 કરોડમાં રિટેન કર્યો હતો, પરંતુ આ વર્ષની મિની હરાજી પહેલા તેને રિલીઝ કરી દીધો હતો.
પંજાબ કિંગ્સે મયંક અગ્રવાલને ટીમમાંથી છૂટો કર્યો હતો
2022માં કેએલ રાહુલ નવી ફ્રેન્ચાઇઝી લખનઉ સુપર જાયન્ટ્સમાં ગયા બાદ પંજાબ કિંગ્સે મયંકને ટીમનો કેપ્ટન બનાવ્યો હતો. પરંતુ, મયંકની સાથે ગત આઇપીએલમાં પંજાબ કિંગ્સનું પ્રદર્શન પણ કંગાળ રહ્યું હતું. આ પછી, આ ફ્રેન્ચાઇઝીએ શિખર ધવનને આઈપીએલ 2023 માટે ટીમનો કેપ્ટન બનાવ્યો અને મયંકને મુક્ત કર્યો. મયંકનું તાજેતરનું ફોર્મ બહુ સારું નહોતું. તેણે તાજેતરમાં જ પુરી થયેલી વિજય હઝારે ટ્રોફીની 9 મેચમાં 26ની સરેરાશથી 211 રન ફટકાર્યા હતા. તેના બેટમાંથી માત્ર 3 અડધી સદી જ નીકળી હતી. આ સાથે જ સૈયદ મુસ્તાક અલી ટી20 ટ્રોફીમાં તેનું બેટ મૌન રહ્યું હતું. તેણે 8 મેચમાં 165 રન બનાવ્યા હતા. તે એક પણ અડધી સદી ફટકારી શક્યો નહતો.
