- રાજસ્થાનમાં સેનાનુ વિમાન ક્રેશ
- રાજસ્થાનમાં મિગ-21 વિમાન ક્રેશ થયુ
- દુર્ઘટનામાં 2 નાગરિકોના મોત
- ઘરની છત પર પડ્યુ વિમાન
- રાજસ્થાનના હનુમાનગઢમાં વિમાન પડ્યુ
રાજસ્થાનની એક દુ:ખદ સમાચાર સામે આવ્યા છે. વાત જાણે એમ છે કે, રાજસ્થાનનાં હનુમાનગઢમાં એરફોર્સનું મિગ-21 વિમાન ક્રેશ થયું છે. પ્રાથમિક વિગતો મુજબ ઘરની છત પર વિમાન પડ્યું હતું. આ દુર્ઘટનામાં 2 ગ્રામીણ નાગરિકોના મોત થયાનું પણ સામે આવ્યું છે.
ભારતીય વાયુસેનાનું મિગ-21 ફાઈટર એરક્રાફ્ટ રાજસ્થાનના હનુમાનગઢ પાસે ક્રેશ થયું હતું. આ વિમાને સુરતગઢથી ઉડાન ભરી હતી. અહીં વાયુસેનાનું મિગ-21 વિમાન ક્રેશ થયું અને રહેણાંક વિસ્તારમાં પડ્યું હતું. આ અકસ્માતમાં બે મહિલાઓના મોત થયા હતા. જ્યારે એક વ્યક્તિ ઘાયલ છે. જોકે બંને પાયલોટ સુરક્ષિત છે.
નોંધનીય છે કે, આ પહેલા જુલાઈ 2022માં રાજસ્થાનના બાડમેર પાસે એક મિગ-21 એરક્રાફ્ટ ટ્રેનિંગ ફ્લાઇટ દરમિયાન ક્રેશ થયું હતું. આ અકસ્માતમાં ભારતીય વાયુસેના (IAF)ના બે પાયલોટ શહીદ થયા હતા.
1960માં કાફલામાં જોડાયું હતું મિગ 21
મિગ-21 દુર્ઘટનાની આજની ઘટનાએ સોવિયેત મૂળના મિગ-21 એરક્રાફ્ટ પર ફરી એકવાર સવાલો ઉભા કર્યા છે. 1960ના દાયકાની શરૂઆતમાં ભારતીય વાયુસેનાના કાફલામાં મિગ-21 એરક્રાફ્ટનો સમાવેશ કરવામાં આવ્યો હતો અને 2022 સુધીમાં મિગ-21 વિમાનથી લગભગ 200 અકસ્માતો થયા છે.
મિગ-21 લાંબા સમયથી ભારતીય વાયુસેનાનો મુખ્ય આધાર હતો. જોકે એરક્રાફ્ટનો સેફ્ટી રેકોર્ડ ખૂબ જ ખરાબ છે. વિમાન દુર્ઘટનાઓમાં પણ અનેક લોકોના જીવ ગયા છે. ગયા વર્ષે માર્ચમાં સંરક્ષણ રાજ્ય પ્રધાન અજય ભટ્ટે રાજ્યસભામાં જણાવ્યું હતું કે, છેલ્લા પાંચ વર્ષમાં ત્રણેય સેવાઓના એરક્રાફ્ટ અને હેલિકોપ્ટર સાથે સંકળાયેલા અકસ્માતોમાં 42 સંરક્ષણ કર્મચારીઓ મૃત્યુ પામ્યા છે. છેલ્લા પાંચ વર્ષમાં કુલ 45 હવાઈ અકસ્માતો થયા છે, જેમાંથી 29 IAF પ્લેટફોર્મ સામેલ છે.
