નેશનલ / 'બ્રેક કામ નથી કરતી...', કહેતા-કહેતા કોલકાતા-સૈરંગ એક્સપ્રેસના 5 ડબ્બા પાટા પરથી ઉતરી પડ્યાં

ટ્રેનમાં મુસાફરી કરતા લોકો માટે એક ચોંકાવનારા સમાચાર સામે આવ્યા છે. આસામના ડિગારુ રેલવે સ્ટેશન પાસે કોલકાતા-સૈરંગ એક્સપ્રેસ ટ્રેન સાથે અકસ્માત થયો હતો. આ દુર્ઘટના પહેલાંનો કથિત વીડિયો હવે સોશિયલ મીડિયા પર વાયરલ થઈ રહ્યો છે. વીડિયોમાં લોકો પાયલટ ટ્રેન રોકવાનો પ્રયાસ કરતા હોવા છતાં બ્રેક કામ ન કરતી હોવાની વાત કહેતા સંભળાય છે. જોકે બ્રેકિંગ સિસ્ટમમાં ખરેખર ખામી હતી કે નહીં તે અંગે રેલવે તરફથી હજુ સત્તાવાર પુષ્ટિ કરવામાં આવી નથી.

શું છે સમગ્ર ઘટના?

આસામના કામરૂપ મેટ્રો જિલ્લામાં ગુવાહાટી નજીક આવેલા ડિગારુ રેલવે સ્ટેશન પાસે બુધવારે સવારે કોલકાતા-સૈરંગ એક્સપ્રેસ ટ્રેન દુર્ઘટનાનો ભોગ બની હતી. મિઝોરમના સૈરંગ જઈ રહેલી ટ્રેન નંબર 13125નું એન્જિન અને પાંચ ડબ્બા પાટા પરથી ઉતરી ગયા હતા. સવારે લગભગ 6:54 વાગ્યે આ અકસ્માત થયો હતો. દુર્ઘટના બાદ રેલવે તંત્રમાં દોડધામ મચી ગઈ હતી અને તરત જ રાહત તથા બચાવ કામગીરી શરૂ કરવામાં આવી હતી.

At least six coaches of the Kolkata–Sairang Express (13125) derailed at Digaru station near Guwahati, Assam, around 6.54am Wednesday. The loco pilot reportedly failed to control the train's speed while allowing another train to pass. https://t.co/B4hbIKKcSS

— Arvind Chauhan (@Arv_Ind_Chauhan) November 11, 2026

અકસ્માત પહેલાંનો વીડિયો વાયરલ

આ દુર્ઘટના પહેલાંની કેટલીક ક્ષણોનો વીડિયો સોશિયલ મીડિયા પર ચર્ચામાં છે. આ વીડિયો ટ્રેનના એન્જિનની અંદરથી રેકોર્ડ કરવામાં આવ્યો હોવાનું કહેવાય છે. તેમાં લોકો પાયલટની વાતચીત સંભળાય છે. તે વારંવાર સિગ્નલ રેડ હોવાની અને ઇમરજન્સી બ્રેક લગાવવા છતાં ટ્રેન અટકતી ન હોવાની વાત કરી રહ્યો છે. ત્યારબાદ અચાનક જોરદાર અવાજ સંભળાય છે અને ટ્રેન બેરિકેડ સાથે અથડાય છે. આ દરમિયાન ટ્રેનનું એન્જિન અને પાંચ ડબ્બા પાટા પરથી ઉતરી જાય છે.

વીડિયોમાં લોકો પાયલટે શું કહ્યું?

વાયરલ વીડિયોમાં લોકો પાયલટ કહેતા સંભળાય છે કે 'સિગ્નલ રેડ છે... ઇમરજન્સી લગાવ્યું છે, પરંતુ કામ નથી કરી રહ્યું. કંઈ જ કામ નથી કરી રહ્યું.' તેની વાત પરથી અંદાજ આવે છે કે ટ્રેનની ગતિ ઓછી કરવામાં મુશ્કેલી પડી રહી હતી. લોકો પાયલટ દ્વારા વારંવાર બ્રેક કામ ન કરતી હોવાની વાત કહેવામાં આવી રહી છે. જોકે, આ વીડિયો કથિત છે અને તેમાં સંભળાતી વાતોની સત્તાવાર પુષ્ટિ હજુ થઈ નથી. આથી માત્ર વીડિયોના આધારે અકસ્માતનું ચોક્કસ કારણ નક્કી કરી શકાય નહીં.

આ પણ વાંચોઃ PM મોદી ફરીવાર આવશે ગુજરાત, કરશે માં અંબાના દર્શન, જાણો ક્યારે?

બીજા ટ્રેનને રસ્તો આપવા માટે સ્ટેશન પર લેવામાં આવી રહી હતી એક્સપ્રેસ

રેલવેની પ્રાથમિક માહિતી મુજબ ડિગારુ સ્ટેશન પર બીજી ટ્રેનને આગળ જવા માટે રસ્તો આપવા કોલકાતા-સૈરંગ એક્સપ્રેસને સ્ટેશન પર લેવામાં આવી રહી હતી. આ દરમિયાન ટ્રેનની ગતિ નિયંત્રિત થઈ શકી નહોતી અને અકસ્માત સર્જાયો હતો. પરિણામે એન્જિન સહિત પાંચ ડબ્બા પાટા પરથી ઉતરી ગયા હતા. હવે વાયરલ વીડિયોમાં બ્રેક અને સિગ્નલ અંગે જે વાતો સામે આવી છે તેની તપાસ પણ મહત્વની બની છે.

રેલવેએ શું આપી માહિતી?

પૂર્વોત્તર સીમા રેલવેના મુખ્ય જનસંપર્ક અધિકારી કે.કે. શર્માએ જણાવ્યું હતું કે આ અકસ્માતમાં તમામ મુસાફરો સુરક્ષિત છે. કોઈ મુસાફરને ઈજા થઈ હોવાની માહિતી સામે આવી નથી. મુસાફરોને તેમના ગંતવ્ય સુધી પહોંચાડવા માટે વૈકલ્પિક ટ્રેનની વ્યવસ્થા કરવામાં આવી રહી છે. અકસ્માતની જાણ થતાં જ રાહત અને બચાવ કામગીરી શરૂ કરી દેવામાં આવી હતી. રેલવેના મહાપ્રબંધક સહિતના વરિષ્ઠ અધિકારીઓ પણ ઘટનાસ્થળે પહોંચવા રવાના થયા હતા, જેથી બચાવ કામગીરી અને પરિસ્થિતિ પર નજર રાખી શકાય.

અનેક ટ્રેનોની અવરજવર પર અસર

ડિગારુ સ્ટેશન પાસે થયેલા અકસ્માતની અસર અન્ય ટ્રેનોની અવરજવર પર પણ પડી હતી. ગૌહાટી-જોરહાટ ટાઉન જનશતાબ્દી એક્સપ્રેસ (ટ્રેન નંબર 12067)ને પનબારી ખાતે રોકવામાં આવી હતી. જ્યારે કોઈમ્બતુર-સિલચર એક્સપ્રેસ (ટ્રેન નંબર 15627)ને પાણીખૈતી ખાતે રોકવામાં આવી હતી. અકસ્માતને કારણે રેલવેના સામાન્ય સંચાલન પર અસર થઈ હતી. બીજી તરફ, રેલવેની ટીમો ટ્રેક પરની સ્થિતિ સુધારીને ટ્રેન વ્યવહાર ફરી શરૂ કરવા માટે કામે લાગી હતી.

ખરેખર બ્રેક ફેલ થઈ હતી? તપાસ બાદ જ થશે ખુલાસો

આ અકસ્માત બાદ સૌથી મોટો સવાલ એ છે કે શું ખરેખર ટ્રેનની ઇમરજન્સી બ્રેક કામ કરતી બંધ થઈ ગઈ હતી? વાયરલ વીડિયોમાં લોકો પાયલટ બ્રેક કામ ન કરતી હોવાની વાત કહેતા સંભળાય છે. બીજી તરફ, રેલવેની પ્રાથમિક માહિતીમાં ટ્રેનની ગતિ નિયંત્રિત ન થઈ શકવાને અકસ્માતનું કારણ ગણાવવામાં આવ્યું છે. આ બંને બાબતો વચ્ચે શું સંબંધ છે તે ટેક્નિકલ તપાસ બાદ જ સ્પષ્ટ થશે. હાલમાં બ્રેકિંગ સિસ્ટમમાં ખામી હતી કે અન્ય કોઈ કારણસર ટ્રેન બેરિકેડ સાથે અથડાઈ તે અંગે અંતિમ માહિતી સામે આવી નથી. જોકે, અકસ્માત પહેલાંનો આ વીડિયો ટ્રેનની સુરક્ષા વ્યવસ્થા અને ઇમરજન્સી બ્રેકિંગ સિસ્ટમ અંગે અનેક સવાલો ઊભા કરી રહ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ