IPL 2026 / જેસન હોલ્ડરનો કેચ કે ચીટિંગ? ભૂતપૂર્વ અમ્પાયર અનિલ ચૌધરીએ પુરાવા સાથે પાટીદારને ગણાવ્યા નોટ આઉટ

IPL 2026 માં ગુજરાત ટાઇટન્સ અને RCB વચ્ચેની મેચમાં જેસન હોલ્ડરે રજત પાટીદારનો જે કેચ પકડ્યો હતો તેને લઈને મોટો વિવાદ થયો છે. ભૂતપૂર્વ અમ્પાયર અનિલ ચૌધરીએ વીડિયો દ્વારા સમજાવ્યું છે કે હોલ્ડરની આંગળીઓ બોલની નીચે નહોતી અને બોલ જમીનને સ્પર્શતો હોવાનું જણાય છે, તેથી પાટીદાર નોટ આઉટ હોવા જોઈતા હતા. વિરાટ કોહલીએ પણ આ અંગે મેદાન પર ચોથા અમ્પાયર સાથે ઉગ્ર દલીલ કરી હતી. અનિલ ચૌધરીએ મેદાન પરના અમ્પાયરો દ્વારા ટીવી અમ્પાયરને રેફરલ ન મોકલવા બદલ પણ આશ્ચર્ય વ્યક્ત કર્યું છે.

અમદાવાદના નરેન્દ્ર મોદી સ્ટેડિયમમાં રમાયેલી આ મેચ દરમિયાન અર્શદ ખાનના બોલ પર જેસન હોલ્ડરે રજત પાટીદારનો કેચ ઝડપ્યો હતો. આ કેચ જોયા બાદ મેદાન પરના અમ્પાયરોએ પાટીદારને આઉટ જાહેર કર્યા હતા, જેનાથી આરસીબી કેમ્પમાં ભારે નારાજગી જોવા મળી હતી. સ્ટાર બેટ્સમેન વિરાટ કોહલી આ નિર્ણયથી એટલો ગુસ્સે હતો કે તે બાઉન્ડ્રી લાઇન પર ઉભેલા ચોથા અમ્પાયર પાસે પહોંચી ગયો હતો અને લાંબા સમય સુધી દલીલ કરતો જોવા મળ્યો હતો. સોશિયલ મીડિયા પર પણ આ કેચને લઈને ક્રિકેટ ચાહકો બે ભાગમાં વહેંચાઈ ગયા છે, પરંતુ અનિલ ચૌધરીના નિવેદને આ ચર્ચાને નવો વળાંક આપ્યો છે.

View this post on Instagram

A post shared by Anil Chaudhary (@anilchaudhary.13)

અનિલ ચૌધરીએ પોતાના ઇન્સ્ટાગ્રામ પર શેર કરેલા વીડિયોમાં જણાવ્યું હતું કે ક્રિકેટના નિયમો અનુસાર, જ્યારે કોઈ ફિલ્ડર કેચ પકડે છે ત્યારે તેનો બોલ પર અને પોતાના શરીરના હલનચલન પર સંપૂર્ણ નિયંત્રણ હોવું જોઈએ જ્યાં સુધી કેચ પૂર્ણ ન થાય. વીડિયોના ફ્રેમ્સ બતાવીને તેમણે સમજાવ્યું કે હોલ્ડરની તર્જની આંગળી બોલની ઉપર હતી અને અંગૂઠો સાઈડમાં હતો, જ્યારે હથેળી પાછળના ભાગમાં હતી. જો હથેળી ઉપરની તરફ હોત અને આંગળીઓ બોલની નીચે હોત તો જ તેને ક્લીન કેચ માની શકાય. ચૌધરીના મતે, ઉપલબ્ધ પુરાવાઓ જોતા સ્પષ્ટ હતું કે બોલ જમીનને અડી રહ્યો હતો, તેથી બેટ્સમેનને નોટ આઉટ આપવો જોઈતો હતો.

અનિલ ચૌધરીએ વધુમાં ઉમેર્યું કે આટલા મહત્વના નિર્ણય વખતે ફિલ્ડ અમ્પાયરોએ ટીવી અમ્પાયરની મદદ લેવી જોઈતી હતી. જો આ નિર્ણય થર્ડ અમ્પાયર પાસે ગયો હોત, તો ઓડિયો દ્વારા લોકોને પણ સમજાયું હોત કે અમ્પાયર કયા આધારે આઉટ કે નોટ આઉટ આપી રહ્યા છે. તેમણે પાટીદાર સામેના આ નિર્ણયને 'હાર્શ' એટલે કે કઠોર ગણાવ્યો હતો. મેચની સ્થિતિ વિશે વાત કરીએ તો, આરસીબીએ પ્રથમ બેટિંગ કરતા 155 રન બનાવ્યા હતા, જેમાં દેવદત્ત પડિક્કલે 40 અને કોહલીએ 28 રન નોંધાવ્યા હતા. રજત પાટીદાર માત્ર 19 રન બનાવીને પેવેલિયન પરત ફર્યા હતા.

આ પણ વાંચોઃ અમદાવાદમાં ગુજરાત ટાઇટન્સએ બેંગલુરુને હરાવ્યું

લક્ષ્યાંકનો પીછો કરવા ઉતરેલી ગુજરાત ટાઇટન્સની ટીમે માત્ર 16 મી ઓવરમાં જ 6 વિકેટ ગુમાવીને જીત હાંસલ કરી લીધી હતી. કેપ્ટન શુભમન ગિલે 43 અને જોસ બટલરે 39 રન ફટકારીને ટીમને મજબૂત શરૂઆત અપાવી હતી. ગુજરાત માટે આ જીત મહત્વની રહી હતી, પરંતુ ક્રિકેટ જગતમાં મેચના પરિણામ કરતા હોલ્ડરનો એ વિવાદાસ્પદ કેચ અને અમ્પાયરિંગના સ્તર પર વધુ સવાલો ઉઠી રહ્યા છે. અનિલ ચૌધરી જેવા અનુભવી અમ્પાયરના આ ખુલાસા બાદ હવે બીસીસીઆઈ અને આઈપીએલ કમિટી આ અંગે કોઈ સત્તાવાર નિવેદન આપે છે કે કેમ તેના પર સૌની નજર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ