ભ્રષ્ટાચારીઓને સકંજામાં લેવા આઇટી વિભાગે કમર કસી છે. અમદાવાદ બાદ વડોદરામાં IT વિભાગે સર્ચ ઓપરેશન શરુ કર્યુ છે. ભ્રષ્ટાચારીઓને ઝડપી પાડવા માટે વડોદરામાં આઇટી વિભાગે 35 જગ્યાએ તપાસનો ધમધમાટ તેજ કર્યો છે. એક બાદ એક મહાનગરોમાં ઇન્કમ ટેક્સ વિભાગે રેડ પાડતા મોટા માથાઓમાં ફફડાટનો માહોલ જોવા મળી રહ્યો છે
વડોદરામાં 35 જગ્યાએ ITની તપાસ
વડોદરામાં આઇટી વિભાગે દર્શનમ ગ્રુપ, વિહાવ ગ્રુપ, સમૃદ્ધિ ગ્રુપ, સાંઇ રૂચિ ગ્રુપમાં દરોડા પાડીને તમામ કાર્યવાહી હાથ ધરી છે. પોલીસની હાજરીમાં આઇટીની ટીમ દ્વારા તપાસ કરવામાં આવી રહી છે. આ તમામ ગ્રુપ સાથે સંલગ્ન બેંક એકાઉન્ટ, નાણાકીય વ્યવહારો, લોકરો તથા જમીનના દસ્તાવેજોની ચકાસણી કરવામાં આવી રહી છે. બેંક લોકરમાંથી રોકડ અને જ્વેલરી મળી આવી છે. કુલ રુ.50 કરોડની બિનહિસાબી આવક ઝડપાઇ છે.
આર્કિટેક રુચિર શેઠને ત્યાં દરોડા
વડોદરના નામાંકિત આર્કિટેક્ટ રુચિર શેઠને ત્યાં પણ આઇટીની ટીમ ત્રાટકી છે. રુચિર શેઠની ઓફિસ તથા બંગ્લોમાં તપાસ કરવામાં આવી રહી છે. બેંક એકાઉન્ટ, બેનામી વ્યવહારો, અપ્રમાણસર મિલકત તથા દસ્તાવેજોને લઇને હાલમાં ચકાસણી કરવામાં આવી રહી છે.. વહેલી સવારથી જ પોલીસ પ્રોટેક્શન સાથે આઇટીના અધિકારીઓ તપાસ કરી રહ્યા છે.
અમદાવાદમાં 31 સ્થળોએ દરોડા
અમદાવાદમાં પણ સોમવારે ઇન્કમટેક્સ વિભાગ દ્વારા મેગા સર્ચ ઓપરેશન હાથ ધરવામાં આવ્યુ હતું. અમદાવાદના લગભગ 31 સ્થળો પર આઇટી દ્વારા સર્ચ ઓપરેશન હાથ ધરવામાં આવ્યુ હતું. બાગબાન ગ્રુપ પર આઇટીની ટીમ ત્રાટકી હતી.આ ગ્રુપ જર્દા, પેકેજિંગ,કન્સ્ટ્રકશન અને FMCG સાથે સંકળાયેલું છે. કૌશિક, રાજેન્દ્ર અને તેજસ મજેઠિયાને ત્યાં તપાસ કરવામાં આવી હતી. સિંધુભવન પર આવેલી ઑફિસ અને બંગલામાં પણ આઇટીની ટીમ તપાસ કરવામાં આવી હતી.
