- અમેરિકાના વિદેશ મંત્રી એન્ટની બ્લિંકન ગઈકાલે રાત્રે દિલ્હી આવ્યા
- આજે ભારત-યુએસ “ટુ પ્લસ ટુ” વિદેશ અને રક્ષા મંત્રી સ્તરની વાતચીત થશે
- ભારતીય પક્ષનું નેતૃત્વ રાજનાથ સિંહ અને એસ. જયશંકર કરશે
અમેરિકાના વિદેશ મંત્રી એન્ટની બ્લિંકન ગુરુવારે રાત્રે ભારત-યુએસ “ટુ પ્લસ ટુ” વિદેશ અને રક્ષા મંત્રી સ્તરની વાતચીત ભાગ લેવા દિલ્હી પહોંચ્યા હતા. અમેરિકાના રક્ષા મંત્રી લોયડ ઓસ્ટિન પહેલા જ દિલ્હી પહોંચી ચૂક્યા હતા. એવામાં આજે એટલે કે શુક્રવારે ‘ટુ પ્લસ ટુ’ વાતચીત થશે.
આ વાતચીતમાં ભારતીય પક્ષનું નેતૃત્વ રક્ષા મંત્રી રાજનાથ સિંહ અને વિદેશ મંત્રી એસ. જયશંકર કરશે. વિદેશ મંત્રાલયના પ્રવક્તા અરિંદમ બાગચીએ 'X' પર જણાવ્યું હતું કે, "પાંચમી ભારત-યુએસ '2+2' મંત્રી સ્તરીય વાતચીતની સહ-અધ્યક્ષતા કરવા માટે નવી દિલ્હીમાં આગમન પર અમેરિકી વિદેશ મંત્રી એન્ટની બ્લિંકનનું ઉષ્માભર્યું સ્વાગત છે."
આ મુદ્દાઓ પર થઈ શકે છે વાતચીત
વિદેશ મંત્રાલયે આ મહિનાની શરૂઆતમાં કહ્યું હતું કે યુએસ સ્ટેટ સેક્રેટરી એન્ટની બ્લિંકન અને રક્ષા મંત્રી લોયડ ઓસ્ટિન એ આ અઠવાડિયે વિદેશ મંત્રી એસ. જયશંકર અને રક્ષા મંત્રી રાજનાથ સિંહ સાથે પાંચમી 'ટુ પ્લસ ટુ' મંત્રી સ્તરીય વાટાઘાટો માટે ભારત આવશે. મંત્રાલયે કહ્યું કે બ્લિંકન અને ઓસ્ટિન અન્ય વરિષ્ઠ ભારતીય અધિકારીઓ સાથે દ્વિપક્ષીય અને વૈશ્વિક ચિંતાઓ અને ઈન્ડો-પેસિફિકમાં ચાલી રહેલી ગતિવિધિઓ અંગે ચર્ચા કરશે. સાથે જ બંને પક્ષો ગાઝામાં હમાસ-ઈઝરાયેલ યુદ્ધનો મુદ્દો પણ ઉઠાવી શકે છે. તેને કેવી રીતે નિયંત્રિત કરવું, જેથી તે મોટો મુદ્દો ન બને. રશિયા-યુક્રેન યુદ્ધ અને વૈશ્વિક સુરક્ષા પરિદ્રશ્ય પર તેની અસર પર પણ બેઠકમાં ચર્ચા થવાની સંભાવના છે.
ભારત અને અમેરિકા વચ્ચેના રક્ષા અને વિદેશ સંબંધોને એક નવું સ્તર આપવા માટે આ વાતચીત થવા જઈ રહી છે. જેના કારણે ચીન અને પાકિસ્તાન જેવા ભારતના દુશ્મનો અસુરક્ષિત અનુભવવા લાગ્યા છે. અમેરિકા હવે ભારતનું વ્યૂહાત્મક ભાગીદાર બની ગયું છે. આવી સ્થિતિમાં બંને દેશો વચ્ચેના સંબંધો સતત ગાઢ અને મજબૂત થઈ રહ્યા છે. અમેરિકી રાષ્ટ્રપતિ જો બાયડન અને ભારતના વડાપ્રધાન નરેન્દ્ર મોદીએ બંને દેશો વચ્ચેના મજબૂત સંબંધો પર ઘણું ધ્યાન કેન્દ્રિત કર્યું છે.
અમેરિકાના એક ભૂતપૂર્વ વરિષ્ઠ રક્ષા અધિકારીએ બુધવારે જણાવ્યું હતું કે અમેરિકા-ભારત સંરક્ષણ સંબંધ "સાચી દિશામાં" છે અને '2+2' વિદેશ અને સંરક્ષણ મંત્રી સ્તરની મંત્રણા એ એક ઉત્તમ ઉદાહરણ છે કે બંને પક્ષો તેને કેવી રીતે આગળ લઈ ગયા છે. ભારત અને યુએસ આજે અહીં '2 પ્લસ 2' વિદેશ અને સંરક્ષણ મંત્રી સ્તરીય વાતચીતની આગામી આવૃત્તિમાં તેમના ઝડપથી વધી રહેલા વ્યૂહાત્મક સંબંધોની વ્યાપક સમીક્ષા કરશે.
