- ભારતીય હોકીના ખેલાડી વરુણ કુમારની સામે રેપનો ગુનો દાખલ
- 17 વર્ષની સગીરાએ રેપની ફરીયાદ નોંધાવી
- બેંગ્લુરુમાં લગ્નની લાલચ આપીને અનેક વાર આચર્યું દુષ્કર્મ
ભારતીય હોકી ખેલાડી વરુણ કુમાર સામે પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સિસ (પોક્સો) એક્ટ હેઠળ ગુનો દાખલ કરવામાં આવ્યો છે. હવે 22 વર્ષની મહિલાનો આરોપ છે કે છેલ્લા 5 વર્ષમાં લગ્નની લાલચ આપીને વરુણે તેની સાથે અનેક વાર રેપ કર્યો હતો તે વખતે તેની ઉંમર 17 વર્ષની હતી.
ઈન્સ્ટાગ્રામ પર કોન્ટેક્ટ પછી પાંચ વર્ષ સુધી રેપ
એરલાઇન કંપનીમાં નોકરી કરતી આ મહિલાએ દાવો કર્યો હતો કે 2017માં જ્યારે તે અર્જુન એવોર્ડ વિજેતા વરુણના સંપર્કમાં આવી ત્યારે તેની ઉંમર 17 વર્ષની હતી. એ સમયે વરુણ અહીંના સ્પોર્ટ્સ ઓથોરિટી ઓફ ઇન્ડિયા (એસએઆઈ)ના બેંગ્લુરુ સેન્ટરમાં ટ્રેનિંગ લઈ રહ્યો હતો. એફઆઇઆરમાં મહિલાએ આરોપ લગાવ્યો હતો કે વરુણે ઇન્સ્ટાગ્રામ દ્વારા તેનો સંપર્ક સાધ્યો હતો અને તેને મળવાનો આગ્રહ કર્યો હતો. તે તેને મળવા માટે મેસેજ કરતો રહ્યો, પરંતુ જ્યારે તેણે કોઈ જવાબ ન આપ્યો, ત્યારે તેણે તેના મિત્રોને તેને મનાવવા કહ્યું. મળતા જ વરુણે કહ્યું કે તે તેને પસંદ કરે છે. તેઓ મિત્રો રહ્યા અને ધીમે ધીમે તેમની વચ્ચે એક સંબંધ વિકસ્યો. જુલાઈ 2019માં તે મહિલાને બેંગ્લુરુના જયનગરની હોટલમાં લઈ ગયો હતો અને સગીર વયની હોવાની જાણ હોવા છતાં તેની સાથે શારીરિક સંબંધો બાંધ્યા હતા. જ્યારે મહિલાએ તેને રોકવાની કોશિશ કરી તો તેણે તેની સાથે લગ્ન કરવાનું વચન આપ્યું.
લગ્નનું દબાણ કર્યું તો અશ્લીલ તસવીરો વાયરલની ધમકી આપી
પીડિતાનો એક પણ આરોપ છે કે લગ્નના બહાને વરુણે તેની સાથે અનેક વાર શારીરિક સંબંધ બાંધ્યા હતા. બાદમાં, વરુણે તેનાથી અંતર જાળવવાનું શરું કર્યું હતું અને
મહિલાના કોલ અને સંદેશાઓનો જવાબ આપવાનું બંધ કરી દીધું. જો તેણીએ તેની સાથે લગ્ન કરવા માટે દબાણ કર્યું તો તેણે તેની તસવીરો સોશિયલ મીડિયા પર અપલોડ કરવાની ધમકી પણ આપી હતી. એફઆઈઆર મુજબ મહિલાએ વરુણ પર છેતરપિંડીનો પણ આરોપ લગાવ્યો હતો. એક વરિષ્ઠ પોલીસ અધિકારીએ જણાવ્યું હતું કે, "મહિલાની ફરિયાદના આધારે, અમે સોમવારે હોકી ખેલાડી સામે પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સિસ એક્ટની યોગ્ય કલમો અને ભારતીય દંડ સંહિતાની કલમ 376 (બળાત્કાર) અને 420 (છેતરપિંડી અને અપ્રમાણિકતા) હેઠળ કેસ નોંધ્યો છે.
કોણ છે વરુણ કુમાર
હિમાચલ પ્રદેશના રહેવાસી વરુણે 2017માં ભારતમાં ડેબ્યૂ કર્યું હતું. ભારતીય પુરુષ હોકી ટીમે 2020ના ટોકિયો ઓલિમ્પિકમાં બ્રોન્ઝ મેડલ જીત્યા બાદ હિમાચલ પ્રદેશ સરકારે પણ વરુણને એક કરોડ રૂપિયાનું ઈનામ આપવાની જાહેરાત કરી હતી. તે 2022ની બર્મિંઘમ કોમનવેલ્થ ગેમ્સમાં સિલ્વર મેડલ જીતનારી ભારતીય ટીમમાં પણ સામેલ હતો.
