- હરમનપ્રીત કૌર મેદાન પરના વર્તનને કારણે હેડલાઈન્સમાં આવી
- આઉટ થયા બાદ હરમનપ્રીતે સ્ટમ્પ પર તેનું બેટ ફટકાર્યું હતું
- ભારતીય ચાહકોએ પણ હરમન પર બેન મૂકવાની માંગ શરૂ કરી
ભારતીય મહિલા ક્રિકેટ ટીમની કેપ્ટન હરમનપ્રીત કૌર શનિવારે (22 જુલાઈ) ના રોજ તેના મેદાન પરના વર્તનને કારણે હેડલાઈન્સમાં આવી ગઈ હતી. ઢાકાના શેરે બાંગ્લા નેશનલ સ્ટેડિયમ ખાતે બાંગ્લાદેશ સામેની ત્રીજી અને અંતિમ ODI દરમિયાન એલબીડબ્લ્યુ આઉટ થયા બાદ હરમનપ્રીતે તેના પરથી કાબૂ ગુમાવ્યો હતો અને સ્ટમ્પ પર બેટ ફટકાર્યું હતું. આ મામલો ભારતીય ઇનિંગ્સની 34મી ઓવરનો છે, જ્યારે હરમનપ્રીતે નાહિદા અખ્તર સામે સ્વીપ કરવાનો પ્રયાસ કર્યો અને બોલ તેના પેડ સાથે અથડાયો અને સ્લિપ તરફ ગયો.
બાંગ્લાદેશ સામેની ODI મેચ દરમિયાન હરમનપ્રીત કૌરે બેટ ફટકારીને સ્ટમ્પ વેરવિખેર કર્યા હતા. અને પછી અમ્પાયરને પણ કંઈક કહ્યું. આ સાથે તેણે ભીડ તરફ ઈશારો પણ કર્યો. અને આ મામલો જોઈને ચાહકો ગુસ્સે થઈ ગયા. ટ્વિટર પર ભારતીય ચાહકોએ પણ હરમન પર બેન મૂકવાની માંગ શરૂ કરી હતી. હરમનપ્રીત 34મી ઓવરમાં નાહિદાની બોલિંગમાં આઉટ થઈ ગઈ હતી. જોકે શરૂઆતમાં અમ્પાયરે હરમનને LBW આઉટ આપી હતી પણ બાદમાં આ કેચ આઉટ લખવામાં આવ્યું હતું. આ નિર્ણયથી હરમન ગુસ્સે થઈ થઈ ગઈ હતી.
થયું એવું કે નાહિદા અને અન્ય બાંગ્લાદેશના ખેલાડીઓએ LBW માટે અપીલ કરી અને અમ્પાયરે આંગળી ઉંચી કરી. કૌર આ નિર્ણયથી ગુસ્સે થઈ ગઈ હતી અને સ્ટમ્પ પર બેટ ફટકાર્યું હતું એ બાદ તે પેવેલિયન પરત ફરતી વખતે તેણે અમ્પાયરને ઈશારો કર્યો કે બોલ બેટ સાથે અથડાયા બાદ પેડ પર વાગી ગયો હતો. જણાવી દઈએ કે બાંગ્લાદેશ અને ભારતની મહિલા વનડે સીરીઝમાં કોઈ ડીઆરએસ નથી, આવી સ્થિતિમાં હરમનપ્રીત કૌરને પેવેલિયન પરત ફરવું પડ્યું હતું. હરમનપ્રીત પર ગુસ્સો દર્શાવવા બદલ એક્શન નક્કી છે. તેમને દંડ થઈ શકે છે. તે બે ચોગ્ગાની મદદથી 21 બોલમાં 14 રન બનાવીને આઉટ થઈ ગઈ હતી.
બાંગ્લાદેશ અને ભારત વચ્ચે રમાયેલી મહિલા ODIની મેચ ટાઈ થઈ હતી. છેલ્લી મેચમાં આજે બાંગ્લાદેશે 225 રન કર્યા હતા. જેના જવાબમાં ઉતરેલી ટીમ ઇન્ડિયાએ પણ 225 રન બનાવતા મેચ ટાઈ થઈ હતી. જેને પગલે ત્રણ મેચની શ્રેણી 1-1 થી બરાબર થઈ હતી.
