કામની વાત / માત્ર 9 દિવસ બાકી! ફટાફટ ફાઇલ કરી દો તમારું IT રિટર્ન, નહીંતર હેરાન થઇ જશો!

જો તમને માસિક પગાર મળતો હોય, તમે પેન્શનર હોય અથવા મિલકત કે શેરના વેચાણથી નફો મેળવતા હોય, તો ITR ફાઇલ કરવું એ તમારી જવાબદારી છે.

એસેસમેન્ટ યર 2026-27 (નાણાકીય વર્ષ 2025-26) માટે આવકવેરા રિટર્ન (ITR) ભરવાની અંતિમ તારીખ 31 જુલાઈ, 2026 છે. આવકવેરાના ઈ-ફાઈલિંગ પોર્ટલ પર 14 કરોડથી વધુ નોંધાયેલા કરદાતાઓ છે. 21 જુલાઈ સુધીના આંકડા મુજબ, આ કરદાતાઓમાંથી 3.15 કરોડ કરદાતાઓ તેમના રિટર્ન પહેલેથી જ ભરી ચૂક્યા છે. બાકીના કરદાતાઓ પાસે હવે રિટર્ન ભરવા માટે માત્ર નવ દિવસ બાકી છે.

આ નિયમનું રાખો ધ્યાન

ઇનકમ ટેક્સના નિયમો અનુસાર, હવે ITR ફાઇલ કરતી વખતે તમારે તમારા તમામ એક્ટિવ ખાતાઓની વિગતો આપવી ફરજિયાત છે. આમાં બચત ખાતા, ચાલુ ખાતા, ઓવરડ્રાફ્ટ ખાતા, કેશ ક્રેડિટ ખાતા અને નોન-રેસિડેન્ટ ઓર્ડિનરી (NRO) ખાતાઓનો સમાવેશ થાય છે. જો તમે આમ કરવામાં નિષ્ફળ જાઓ અને ત્યારબાદ આવકવેરા વિભાગને એવા કોઈ ખાતા વિશે જાણ થાય જેની માહિતી ફાઇલિંગ પ્રક્રિયા દરમિયાન આપવામાં આવી ન હતી, તો તમને પ્રતિ ખાતું 10,000 રુપિયા સુધીનો દંડ થઈ શકે છે.

અટકી શકે છે રિફન્ડ

ટેક્સ રિફંડ મેળવવા માટે, આવકવેરા પોર્ટલ પર તમારું બેંક ખાતું અગાઉથી વેલિડેટ થયેલું હોવું આવશ્યક છે. જો તમારા પ્રાથમિક ખાતામાં કોઈ સમસ્યા ઊભી થાય, તો આવકવેરા વિભાગ રિફંડની રકમ તમારા અન્ય કોઈ પ્રમાણિત ખાતામાં ટ્રાન્સફર કરી શકે છે; જો કે, જો તમે તમારા તમામ ખાતાઓની વિગતો જાહેર કરવામાં નિષ્ફળ જશો, તો રિફંડની ચુકવણી અટકી શકે છે.

ડેડલાઇન ચૂકી ગયા તો...?

તમે 31 જુલાઈની અંતિમ તારીખ પછી પણ તમારું આવકવેરા રિટર્ન ફાઇલ કરી શકો છો. આવકવેરા કાયદાની કલમ 139(4) તમને 'વિલંબિત રિટર્ન' ફાઇલ કરવાની મંજૂરી આપે છે, પરંતુ આ માટે તમારે 'લેટ ફી' (મોડા ફાઇલ કરવા બદલની ફી) ચૂકવવી પડે છે. જો તમારી વાર્ષિક આવક 5 લાખ રુપિયાથી વધુ હોય, તો લેટ ફી 5,000 રુપિયા સુધી હોઈ શકે છે; અને જો તમારી વાર્ષિક આવક 5 લાખ રુપિયા કે તેથી ઓછી હોય, તો લેટ ફી 1,000 રુપિયા હોય છે.

આ પણ વાંચોઃ 14થી 16 દિવસમાં જ ફેંસલો, કંઇક આ રીતે ભારતમાં કામ કરે છે 'ફાસ્ટ ટ્રેક' કોર્ટ

નવી નહીં જૂના કાયદાથી લોકો ભરી રહ્યા છે ITR

નવો આવકવેરા કાયદો વર્ષ 2025માં લાગુ થવા છતાં, લોકો હજુ પણ 'આવકવેરા અધિનિયમ, 1961' હેઠળ તેમના ટેક્સ રિટર્ન ભરી રહ્યા છે. તેનું કારણ એ છે કે જે આવક માટે અત્યારે રિટર્ન ભરવામાં આવી રહ્યું છે તે પાછલા વર્ષ (1 એપ્રિલ, 2025 થી 31 માર્ચ, 2026) ને લગતી છે. આ સમયગાળો જૂના કાયદાના દાયરામાં આવતો હોવાથી, આ રિટર્ન પર 'આવકવેરા અધિનિયમ, 1961'ના તમામ નિયમો લાગુ થશે. નવો આવકવેરા કાયદો, 2025, 1 એપ્રિલ 2026થી અમલમાં આવ્યો છે. આ નવો કાયદો ચાલુ નાણાકીય વર્ષ 2026-27 દરમિયાન મેળવેલી આવકને લાગુ પડશે. આનો અર્થ એ છે કે જ્યારે જુલાઈ 2027માં આવકવેરા રિટર્ન (ITR) ભરવામાં આવશે, ત્યારે તે નવા નિયમો અનુસાર હશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ