નેશનલ / PM મોદીના એલાન બાદ દેશના આ 4 રાજ્યોમાં શરૂ થશે ફાસ્ટ ટ્રેક કોર્ટ, જુઓ ક્યાં

NEET પેપર લીક વિવાદ બાદ કેન્દ્ર સરકાર એક્શન મોડમાં આવી ગઈ છે. વડાપ્રધાન નરેન્દ્ર મોદીની કડક કાર્યવાહીની જાહેરાત પછી હવે કેસોની સુનાવણી ઝડપથી પૂર્ણ થાય તે માટે ખાસ યોજના તૈયાર થઈ રહી છે. નવા જાહેર પરીક્ષા કાયદા હેઠળ આરોપીઓ સામે કેસ ચલાવવામાં આવશે અને ચાર રાજ્યોમાં વિશેષ ફાસ્ટ ટ્રેક કોર્ટ સ્થાપવાની તૈયારી ચાલી રહી છે.

નવા કાયદા હેઠળ થશે કાર્યવાહી

કેન્દ્ર સરકાર હવે NEET પેપર લીક કેસમાં જાહેર પરીક્ષા (અનુચિત સાધનોની રોકથામ) અધિનિયમ, 2024 હેઠળ કાર્યવાહી કરશે. આ કાયદો જાહેર પરીક્ષાઓમાં પેપર લીક, નકલ, સોલ્વર ગેંગ અને ટેક્નોલોજીના દુરુપયોગ સામે કડક સજા માટે બનાવવામાં આવ્યો છે. સરકારનો હેતુ આરોપીઓને ઝડપથી સજા અપાવવાનો છે.

ચાર રાજ્યોમાં ફાસ્ટ ટ્રેક કોર્ટની તૈયારી

સૂત્રોના જણાવ્યા મુજબ સરકાર સંબંધિત રાજ્ય સરકારો અને હાઈકોર્ટને વિશેષ ફાસ્ટ ટ્રેક કોર્ટ સ્થાપવા માટે વિનંતી કરશે. આ કોર્ટમાં NEET પેપર લીક સંબંધિત કેસોની રોજિંદી સુનાવણી થશે, જેથી તપાસ અને ટ્રાયલમાં વિલંબ ન થાય અને ઝડપથી ચુકાદો આવી શકે.

આ પરીક્ષાઓ પર પણ લાગુ પડે છે કાયદો

21 જૂન 2024થી અમલમાં આવેલા આ કાયદાનો વ્યાપ માત્ર NEET પૂરતો મર્યાદિત નથી. UPSC, SSC, RRB, IBPS તેમજ કેન્દ્ર સરકારના વિભાગોની ભરતી પરીક્ષાઓ અને NTA દ્વારા લેવામાં આવતી તમામ પ્રવેશ અને ભરતી પરીક્ષાઓ પર પણ આ કાયદો લાગુ પડે છે.

અત્યાર સુધી ચાર FIR નોંધાઈ

સૂત્રોના જણાવ્યા મુજબ NEET પેપર લીક કેસમાં આ કાયદા હેઠળ અત્યાર સુધી ચાર FIR નોંધાઈ ચૂકી છે. આ કેસોની સુનાવણી માટે બોમ્બે, કલકત્તા, દિલ્હી અને મધ્ય પ્રદેશ હાઈકોર્ટના અધિકારક્ષેત્રમાં ફાસ્ટ ટ્રેક કોર્ટ બનાવવાનો પ્રસ્તાવ તૈયાર કરવામાં આવ્યો છે. જેમાંથી બે કેસ બોમ્બે હાઈકોર્ટના ક્ષેત્રમાં આવે છે.

આ પણ વાંચોઃ પેપર લીકના દોષીઓને સજા, ફાસ્ટ ટ્રેકમાં સુનાવણી, જાણો PM મોદીના એલાનની 5 મોટી વાતો

પારદર્શિતા વધારવાનો સરકારનો પ્રયાસ

સરકારનું માનવું છે કે વિશેષ કોર્ટની રચનાથી આરોપીઓ સામે કાનૂની કાર્યવાહી ઝડપી બનશે. સાથે જ જાહેર પરીક્ષાઓની વિશ્વસનીયતા વધશે અને ભવિષ્યમાં પેપર લીક તથા સંગઠિત નકલ જેવા ગુનાઓ પર અસરકારક નિયંત્રણ લાવવામાં મદદ મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ