સાવધાન / 'ફ્રી મૂવી' જોવાની ઘેલછામાં ખાલી થઈ જશે બેંક એકાઉન્ટ! NetMirror ના નામે સાયબર ફ્રોડ

ઓટીટી (OTT) પ્લેટફોર્મ્સના મોંઘા સબ્સ્ક્રિપ્શન ખરીદવાથી બચવા માટે અનધિકૃત સ્ત્રોતોમાંથી 'ફ્રી મૂવીઝ' અને નવી વેબ સિરીઝ જોવાનો શોર્ટકટ રસ્તો અપનાવવો હવે ભારતીય યુઝર્સ માટે અત્યંત જોખમી સાબિત થઈ શકે છે. ભારત સરકારના ગૃહ મંત્રાલય હેઠળની સાયબર સુરક્ષા એજન્સી CyberDost (I4C) એ સોશિયલ મીડિયા પર એલર્ટ જારી કરીને લોકોને ચેતવ્યા છે કે NetMirror જેવી લોકપ્રિય ફ્રી સ્ટ્રીમિંગ સર્વિસના નામે સાયબર અપરાધીઓ ફેક એપ્સ અને નુકસાનકારક APK ફાઇલો ઇન્ટરનેટ પર ફેલાવી રહ્યા છે. આજકાલ દરેક વ્યક્તિ નવી ફિલ્મો કે સિરીઝ જોવા માંગે છે, પરંતુ પૈસા બચાવવાની લાલચમાં લોકો સોશિયલ મીડિયા કે મેસેજિંગ એપ્સ પર મળતી અજાણી લિંક્સ પરથી સીધી એપ ડાઉનલોડ કરી લે છે. સ્ક્રીન પર દેખાતો 'ફ્રી' નો મેસેજ યુઝરના પર્સનલ ડેટા અને નાણાકીય સુરક્ષા પર મોટો પ્રહાર કરી શકે છે.

NetMirror ના નામે સાયબર ઠગાઈની નવી ટ્રીક

CyberDost (I4C) ના ટ્વીટ (X પોસ્ટ) અનુસાર, સાયબર ઠગો NetMirror નું નામ વટાવીને નકલી એપ્સ અને માલવેર યુક્ત APK ફાઇલો ફેલાવી રહ્યા છે. જ્યારે પણ કોઈ યુઝર આવી ફેક એપને પોતાના સ્માર્ટફોનમાં ઇન્સ્ટોલ કરે છે, ત્યારે તેઓ અજાણતા જ સાયબર ક્રિમિનલને પોતાના આખા ફોનનો એક્સેસ અને કંટ્રોલ સોંપી દે છે.

ચોરી થઈ શકે છે તમારો ખાનગી ડેટા

આવી નકલી એપ્સ ફોનમાં ઇન્સ્ટોલ થતાં જ બેકગ્રાઉન્ડમાં સક્રિય થઈ જાય છે અને યુઝરનો પર્સનલ ડેટા ચોરી લે છે. આ પ્રક્રિયાથી યુઝર્સના પ્રાઇવેટ ફોટોઝ, કાળજીપૂર્વક રાખેલા લોગિન ક્રેડેન્શિયલ્સ (આઇડી-પાસવર્ડ) અને બેંક એકાઉન્ટની વિગતો સીધી જ સાયબર અપરાધીઓના હાથમાં જતી રહે છે, જેનાથી મોટા નાણાકીય ફ્રોડનું જોખમ ઊભું થાય છે.

આ પણ વાંચોઃ પેપર લીક કરનારાઓ હવે નહીં બચે! PM મોદીએ કરી ફાસ્ટ ટ્રેક કોર્ટની જાહેરાત, ઝડપથી મળશે કડક સજા

તમારા સ્માર્ટફોનને સાયબર એટેકથી કેવી રીતે સુરક્ષિત રાખવો?

APK ફાઇલ્સ ડાઉનલોડ કરવાથી બચો: તમારા ફોનનો ડેટા સુરક્ષિત રાખવા માટે કોઈપણ અજાણ્યા સ્ત્રોત પરથી એપ્લિકેશન ડાઉનલોડ ન કરો. ખાસ કરીને વોટ્સએપ ગૃપ, ટેલિગ્રામ ચેનલો કે અજાણી વેબસાઇટ્સ પર મોકલાતી APK લિંક્સ પર ક્યારેય ક્લિક ન કરો.

ઓફિશિયલ એપ સ્ટોરનો જ ઉપયોગ કરો: હંમેશા ગૂગલ પ્લે સ્ટોર (Google Play Store) અથવા એપલ એપ સ્ટોર (Apple App Store) પરથી જ ચકાસાયેલી અને ઓથેન્ટિક એપ્સ ઇન્સ્ટોલ કરો.

બિનજરૂરી પરમિશન આપવાનું ટાળો: જો કોઈ સામાન્ય મૂવી કે એન્ટરટેઇનમેન્ટ એપ તમારી પાસે કોન્ટેક્ટ્સ, SMS અથવા લોકેશનની પરમિશન માંગે, તો તરત જ સાવધ થઈ જાઓ.

એન્ટીવાયરસ અને સિક્યોરિટી અપડેટ્સ: તમારા સ્માર્ટફોનની ઓપરેટિંગ સિસ્ટમને હંમેશા અપ-ટુ-ડેટ રાખો અને ફોનમાં ગુણવત્તાયુક્ત મોબાઇલ સિક્યોરિટી અથવા એન્ટીવાયરસ એપનો ઉપયોગ કરો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ