ઓટો / વરસાદના પાણીમાં કાર ડૂબે તો હવે ઈન્સ્યોરન્સ ક્લેઇમ મળશે કે નહીં? જાણો ઈન્સ્યોરન્સનો નિયમ

દક્ષિણ ગુજરાતમાં વરસાદને કારણે ઘરોમાં પાણી ઘૂસી ગયા છે. બીજી તરફ, સોસાયટીના પાર્કિંગ અને રસ્તાઓ પર પાર્ક કરાયેલી અનેક કાર આંશિક અથવા સંપૂર્ણપણે પાણીમાં ડૂબી ગઈ છે. આવી સ્થિતિમાં કાર માલિકો સામે હવે એક મોટો સવાલ છે—પૂરના પાણીમાં ડૂબેલી કારનું નુકસાન ઈન્સ્યોરન્સ કંપની ભરપાઈ કરશે કે નહીં?

જો તમારી કાર પણ ભારે વરસાદ કે પૂરનાં પાણીમાં ફસાઈ ગઈ હોય, તો ઈન્સ્યોરન્સ ક્લેઇમ કરતાં પહેલાં કેટલીક મહત્વની બાબતો જાણવી જરૂરી છે.

કોમ્પ્રિહેન્સિવ કાર ઈન્સ્યોરન્સમાં શું કવર થાય છે?

સામાન્ય રીતે કોમ્પ્રિહેન્સિવ કાર ઈન્સ્યોરન્સ પોલિસીમાં પૂર, ભારે વરસાદ, વાવાઝોડું અને અન્ય કુદરતી આફતોને કારણે વાહનને થયેલા નુકસાનનું કવર મળે છે. કારની બોડી, લાઈટ્સ અને કેટલાક ઈલેક્ટ્રિકલ પાર્ટ્સને થયેલા નુકસાન માટે પોલિસીની શરતો મુજબ ક્લેઇમ મળી શકે છે.

પરંતુ કારના એન્જિનને થયેલા નુકસાનના મામલે નિયમો અલગ હોઈ શકે છે

જો પૂરનું પાણી એન્જિનમાં ઘૂસી જાય અને એન્જિનને નુકસાન થાય, તો કેટલીક પરિસ્થિતિમાં તેને 'કન્સિક્વેન્શિયલ લોસ' તરીકે ગણવામાં આવી શકે છે. ખાસ કરીને જો કાર માલિકે પાણી ભરાયેલા રસ્તા પર કાર ચલાવવાનો પ્રયાસ કર્યો હોય અથવા પાણીમાં બંધ પડી ગયેલી કારને ફરીથી સ્ટાર્ટ કરી હોય, તો ક્લેઇમને લઈને મુશ્કેલી ઊભી થઈ શકે છે.

એન્જિનના નુકસાનનો ખર્ચ પણ મોટો હોઈ શકે છે. કારના મોડલ અને નુકસાનની ગંભીરતા પ્રમાણે રિપેરિંગનો ખર્ચ હજારો રૂપિયાથી લઈને લાખો રૂપિયા સુધી પહોંચી શકે છે.

પાણીમાં ડૂબેલી કારને ભૂલથી પણ સ્ટાર્ટ ન કરો

જો તમારી કાર પાણીમાં ફસાઈ ગઈ હોય તો સૌથી પહેલી અને મહત્વની વાત એ છે કે તેને સ્ટાર્ટ કરવાનો પ્રયાસ ન કરો.

પાણીમાં ડૂબેલી અથવા પાણીથી ભરાયેલી કારને સ્ટાર્ટ કરવાથી એન્જિનમાં પાણી પ્રવેશી શકે છે અને ગંભીર નુકસાન થઈ શકે છે. આવી સ્થિતિમાં કારને સ્ટાર્ટ કરવાનો પ્રયાસ કરવો ક્લેઇમ માટે પણ મુશ્કેલી ઊભી કરી શકે છે.

કાર ડૂબી ગઈ હોય તો તરત શું કરવું?

કાર સ્ટાર્ટ ન કરો:

પાણીમાં ફસાયેલી કારને સેલ્ફ મારીને ચાલુ કરવાનો પ્રયાસ ન કરો. કારને જ્યાં છે ત્યાં જ રહેવા દો અને નિષ્ણાતની મદદ લો.

ફોટો અને વીડિયો લો:

કાર કયા સ્થળે અને કેટલી ઊંડાઈ સુધી પાણીમાં ડૂબી છે તેના ફોટા અને વીડિયો બનાવી રાખો. આ પુરાવા ક્લેઇમ પ્રક્રિયા દરમિયાન ઉપયોગી થઈ શકે છે.

ઈન્સ્યોરન્સ કંપનીને તાત્કાલિક જાણ કરો:

ઘટના બાદ શક્ય તેટલી વહેલી તકે ઈન્સ્યોરન્સ કંપનીને જાણ કરો. કંપનીની માર્ગદર્શિકા મુજબ આગળની કાર્યવાહી કરો.

પોતાની રીતે કાર ન ખેંચો:

કારને જાતે ખેંચીને ગેરેજ સુધી લઈ જવાને બદલે ઈન્સ્યોરન્સ કંપનીની અધિકૃત ટોઇંગ સર્વિસ અથવા તેમની સૂચના મુજબની સર્વિસનો ઉપયોગ કરો.

પોલિસીની શરતો તપાસો:

દરેક ઈન્સ્યોરન્સ પોલિસીની શરતો અલગ હોઈ શકે છે. તેથી ક્લેઇમ કરતાં પહેલાં તમારી પોલિસીમાં પૂર અને એન્જિન ડેમેજ માટે શું કવર છે તે તપાસવું જરૂરી છે.

ક્લેઇમ પાસ થશે કે નહીં?

કાર પાણીમાં ડૂબી ગઈ એટલે ક્લેઇમ આપોઆપ પાસ થશે કે રિજેક્ટ થશે એવું કહી શકાય નહીં. ક્લેઇમ પોલિસીની શરતો, નુકસાનનું કારણ અને કાર માલિકે ઘટનાની પહેલાં કે પછી શું કર્યું તેના આધારે નક્કી થાય છે.

પૂર અથવા ભારે વરસાદને કારણે કારને થયેલું નુકસાન સામાન્ય રીતે કોમ્પ્રિહેન્સિવ પોલિસી હેઠળ કવર થઈ શકે છે, પરંતુ એન્જિન ડેમેજ માટે વધારાનું કવર જરૂરી હોઈ શકે છે. તેથી કાર માલિકોએ પોતાની પોલિસીના નિયમો ધ્યાનથી તપાસવા જોઈએ.

ચોમાસામાં પાણી ભરાયેલા રસ્તા પર કાર ચલાવવાનું ટાળવું અને પાણીમાં ફસાયેલી કારને ફરીથી સ્ટાર્ટ ન કરવી—આ બંને બાબતો તમને મોટા આર્થિક નુકસાનથી બચાવવામાં મદદ કરી શકે છે.