- સમગ્ર ઉત્તર ભારતમાં ચોમાસાએ દસ્તક આપી, રાજસ્થાનમાં ભારે વરસાદ
- ચોમાસાના આગમન બાદ દેશના અનેક વિસ્તારોમાં પૂર જેવી સ્થિતિ
- રાજસ્થાનમાં વરસાદની સાથે વીજળી પડતાં 86 પશુઓના મોત
સમગ્ર ઉત્તર ભારતમાં ચોમાસાએ દસ્તક આપી છે. આ તરફ ચોમાસાના આગમન બાદ લોકોને ગરમીમાંથી રાહત મળી છે પરંતુ અનેક ખેડૂતો માટે આ ચોમાસું આફત સમાન બની ગયું છે. ચોમાસાના આગમન બાદ દેશના અનેક વિસ્તારોમાં પૂર જેવી સ્થિતિ રહે છે. હવે જ્યાં એક તરફ કમોસમી વરસાદે તારાજી સર્જી છે તો બીજી તરફ રાજસ્થાનમાં વરસાદની સાથે વીજળી પડતાં 86 પશુઓના મોત થયા છે.
પશ્ચિમ રાજસ્થાનમાં ચોમાસાના આગમનની સાથે જ ઘણા વિસ્તારોમાં ભારે વરસાદ જોવા મળી રહ્યો છે. સોમવારે (26 જૂન) સાંજે લગભગ 6 વાગ્યે વરસાદ દરમિયાન જેસલમેર જિલ્લાના નોખા ગામથી 2 કિમી દૂર એક નિર્જન જગ્યાએ વીજળી પડી જેના કારણે ત્યાં હાજર 86 પ્રાણીઓના મોત થયા છે.
વરસાદની સાથે આકાશમાંથી વીજળી પડી
વિગતો મુજબ વરસાદની સાથે આકાશમાંથી વીજળી પડી તે સમયે ઓમર ખાન પોતાના તમામ ઘેટા-બકરા સાથે એક ઝાડ નીચે ઊભો હતો. જ્યારે આકાશમાંથી ઝાડ પર વીજળી પડી તો ઉમર ખાન તેમાંથી દૂર ગયો. આ દરમિયાન ઝાડ નીચે ઉભેલા 86 પશુઓના મોત થયા હતા. જો કે આ સમયગાળા દરમિયાન ઉમર ખાન બચી ગયો હતો. હાલ આ ઘટના બાદ વિસ્તારના ગ્રામજનો ભયભીત છે.
પીડિતે વહીવટીતંત્ર પાસે માંગી મદદ
આ દરમિયાન હવે ઘટનાની જાણ થતા નોક પોલીસ સ્ટેશન અને વહીવટીતંત્રની ટીમ સાથે મામલતદાર અશોક કુમાર ઘટનાસ્થળે પહોંચ્યા અને નિરીક્ષણ કર્યું. આ કેસમાં ગ્રામજનોએ પીડિત ઉમર ખાન માટે વહીવટીતંત્ર પાસે મદદની પણ માંગ કરી છે.
