- પાકિસ્તાનના પૂર્વ વડાપ્રધાન ઈમરાન ખાનને મોટો ઝટકો
- ચૂંટણી પંચે કરી આકરી કાર્યવાહી
- ચૂંટણી પંચે ઈમરાન ખાનની સંસદની સદસ્યતા રદ્દ કરી
પાકિસ્તાનના પૂર્વ વડાપ્રધાન ઈમરાન ખાનને મોટો ઝટકો લાગ્યો છે. ચૂંટણી પંચે ઈમરાન ખાનની સંસદની સદસ્યતા રદ્દ કરી દીધી છે. પાકિસ્તાનના પૂર્વ વડાપ્રધાન ઈમરાન ખાન હવે ચૂંટણી લડી શકશે નહીં.તોશખાના મામલે મળેલી ફરિયાદ બાદ ચૂંટણી પંચે આ નિર્ણય લીધો છે. કહેવામાં આવી રહ્યું છે કે ઈમરાન ખાન પર ખોટો જવાબ દાખલ કરવાનો આરોપ લાગ્યો હતો.
ચૂંટણી પંચની ઓફિસની વધારી દેવાઈ સુરક્ષા
પાકિસ્તાનના મુખ્ય ચૂંટણી કમિશનર સિકંદર સુલતાન રઝાની અધ્યક્ષતાવાળી 4 સભ્યોની બેંચે આ નિર્ણય સંભળાવ્યો છે. આ નિર્ણય બાદ ચૂંટણી પંચની ઓફિસની સુરક્ષા વધારી દેવામાં આવી છે.
અરજી દાખલ કરી લગાવ્યો હતો આ આરોપ
પાકિસ્તાનમાં સત્તાધારી ગઠબંધનના સાંસદોએ ચૂંટણી પંચમાં એક અરજી દાખલ કરી હતી, જેમાં આરોપ લગાવ્યો હતો કે ઈમરાન ખાને તોશખાનામાં જમાં ગિફ્ટ્સને સસ્તામાં ખરીદી હતી અને તેને ઊંચા ભાવે વેચી દીધી હતી. આ મામલે ચૂંટણી પંચે તમામ પક્ષકારોને સાંભળ્યા બાદ નિર્ણય સુરક્ષિત રાખ્યો હતો.
આરબ દેશોની મુલાકાત દરમિયાન મળી હતી મોંઘી ભેટો
ઈમરાન ખાન 2018માં પીએમ બન્યા હતા. તેમને આરબ દેશોની મુલાકાત દરમિયાન તેમને ત્યાંના શાસકો દ્વારા મોંઘી ભેટો મળી હતી. ઈમરાન ખાને તેને તોશખાનામાં જમા કરાવી દીધી હતી. પરંતુ બાદમાં ઈમરાન ખાને તેને તોશખાનામાંથી સસ્તા ભાવે ખરીદી હતી અને તેને ઊંચા ભાવે વેચી દીધી હતી. આ સમગ્ર પ્રક્રિયાને તેમની સરકાર દ્વારા કાયદાકીય પરવાનગી આપવામાં આવી હતી.
આ ગિફ્ટ્સને રૂ. 2.15 કરોડમાં ખરીદી હતી
પૂર્વ વડાપ્રધાને સુનાવણી દરમિયાન ચૂંટણી પંચને કહ્યું હતું કે, રાજ્ય તિજોરીમાંથી તેમણે આ ગિફ્ટ્સને રૂ. 2.15 કરોડમાં ખરીદી હતી અને આ ગિફ્ટ્સ વેચીને તેમને 5.8 કરોડ રૂપિયા મળ્યા હતા. આ ગિફ્ટ્સમાં એક Graff ઘડિયાળ, કફલિંકની જોડી, એક મોંઘી પેન, એક વીંટી અને ચાર રોલેક્સ ઘડિયાળોનો સમાવેશ થાય છે. આરોપ છે કે, ઈમરાન ખાને ઈન્કમ ટેક્સ રિટર્નમાં આ ગિફ્ટ્સનું વેચાણ નથી દર્શાવ્યું. વિપક્ષી સાંસદોએ અરજી દાખલ કરી ઇમરાન ખાનની સદસ્યતા રદ કરવાની માંગ કરી હતી.
