- યોગ દિવસ નિમિત્તે જાણો વાળ ખરતા અટકાવવામાં મદદ રૂપ થતા આસન
- રોજ યોગ કરવામાં આવે તો વાળ ખરવાની સમસ્યાને કંટ્રોલમાં રાખી શકાય
- યોગગુરુ ડોક્ટર ભરત ભૂષણે આપી માહિતી
ખોટા પ્રકારની લાઈફ સ્ટાઈલ અને અયોગ્ય ખોરાકને પગલે શરીરમાં વિટામિનની ઉણપ ઊભી થાય છે. પરિણામે વાળ ખરવા સહિતની સમસ્યા માથું ઉચકતી હોય છે. આજના મોટાભાગના યુવાનોમાં આ સમસ્યા જોવા મળે છે. ત્યારે વાળ ખરવાની સમસ્યાથી સ્ત્રી અને પુરુષ છુટકારો મેળવવા માટે અનેક પ્રકારની દવાઓ લેતા હોય છે તથા મોંઘા તેલ અને ક્રીમનો પણ ઉપયોગ કરતા હોય છે છતાં ફાયદો થતો નથી. પરંતુ જો રોજ યોગ કરવામાં આવે તો આ સમસ્યાને કંટ્રોલમાં રાખી શકાય છે. ત્યારે આવો જાણીએ ક્યાં યોગથી શુ થાય છે ફાયદો!
અધોમુખ આસન
યોગગુરુ ડોક્ટર ભરત ભૂષણના જણાવ્યા અનુસાર અધોમુખ આસનથી વાળનો સારો એવો વિકાસ થાય છે. આ આસન કરતી વેળાએ તમારું માથું નીચેની તરફ રહે છે. જેને લઈને માથામાં લોહીનો પ્રવાહ વધતા વાળનો પૂરતું પોષણ મળે છે. આથી વાળનો વિકાસ થાય છે આથી વાળ ખરવાની સમસ્યાને નિયંત્રણમાં રાખી શકાય છે.
ઉષ્ટ્રાસન આસન
ઉષ્ટ્રાસન આસન વાળ માટે ખૂબ જ ઉપયોગી સાબિત થઈ શકે છે. આ આસન દરરોજ કરવાથી વાળને ભરપૂર પોષણ મળે છે અને પૂરતા ઓક્સિજનની સપ્લાય થતી હોવાથી વાળ એકદમ મજબૂત પણ થાય છે. આ આસન કરતી વેળાએ ઘુંટણીએ બેસવામાં આવે છે. ત્યારબાદ હાથને હિપ્સ પર રાખવામાં આવે છે તથા ઘુંટણ અને ખંભા એક જ લાઈનમાં હોવા જોઈએ અને પગના તળિયા ઉપર તરફે હોવા જોઈએ. આ મુદ્રામાં શ્વાસ અંદરની તરફ ખેંચવામાં આવે છે અને કરોડરજ્જુને આગળ તરફ લઈ જવા પ્રયાસ કરવામાં આવે છે. આ દરમિયાન નાભી પર દબાણ અનુભવાવું જોઈએ.
ઉત્તાનાસન આસન
વાળના વિકાસ અને તેને ખરતા અટકાવવામાં સૌથી ફાયદાકારક ગણાતું ઉત્તાનાસન આસન કરવાથી વાળને મજબૂતી મળે છે. આ આસન કરતી વેળાએ માથું નીચે કરી અને માથાને પગ સુધી લાવવાનો પ્રયાસ કરવામાં આવે છે. આ દરમિયાન પીઠને વાળવામાં આવે છે. આવી મુદ્રામા લોહી માથા તરફ જતું હોવાથી પોષણ મળે છે. જેમાં વાળ અને ઓક્સિજન મળતું હોવાથી વાળનો વિકાસ થાય છે.
