- અલગ-અલગ સમાજની માંગણીથી કમળમાં 'વમળ'
- સરકાર એકને રિજે,તો બીજા ખીજે જેવો ઘડાયો ઘાટ
- અન્ય સમાજની પણ કેસ પાછા ખેંચવા માંગ
જેમ જેમ 2022ની વિધાનસભા ચૂંટણી નજીક આવી રહી છે તેમ તેમ રાજકીય પક્ષો હવે તમામ સમાજોને આકર્ષવાના પ્રયાસો કરી રહ્યા છે. તેવામાં ગુજરાતની ભાજપ સરકારે પાટીદારો પર થયેલા કેસોને પરત ખેંચવાની જેવી જ કવાયત શરૂ કરી કે હવે અન્ય સમાજના નેતાઓ પણ મેદાનમાં આવી રહ્યા છે. અને પોત-પોતાના સમાજ અને આંદોલનકારીઓ પર થયેલા કેસો પરત ખેંચવાની માગ કરી રહ્યા છે.
ગુજરાત વિધાનસભા ચૂંટણીની પહેલા પાટીદાર મતો અંકે કરવા માટે અત્યારથી રાજકીય કવાયત શરૂ થઈ ગઈ છે. રાજકોટમાં સીઆર.પાટીલની પાટીદાર કેસો પરત ખેંચવાની જાહેરાત અને ત્યાર બાદ ખોડલધામના પ્રમુખ નરેશ પટેલ સાથેની મુલાકાતથી ચર્ચાઓ તો શરૂ થઈ હતી જ. પરંતુ શુક્રવારે પાટીદાર અનામત આંદોલન મુદ્દે ભાજપના તમામ પાટીદાર સાંસદો ગાંધીનગર પહોંચી ગયા હતા. અને મુખ્યમંત્રી ભૂપેન્દ્ર પટેલ સાથે મુલાકાત કરી 2015માં પાટીદાર આંદોલનમાં થયેલા તમામ કેસો પરત ખેંચવા રજૂઆત કરી હતી. એટલું જ નહીં.પરંતુ આ મુલાકાતમાંથી બહાર આવતા જ સાંસદોએ ગંભીર ગુનાઓ સિવાયના કેસો પરત ખેંચાશે તેવા સંકેત પણ આપ્યા હતા.
પાટીદાર આંદોલનકારીઓના કેસ પરત ખેંચવાનો મામલો હવે ધીમે ધીમે પેચીદો બનતો હોય તેમ લાગી રહ્યું છે. કારણ કે, પાટીદાર આંદોલનકારીઓની સાથે અન્ય આંદોલનકારીઓના કેસ પરત ખેંચવા માટે ભાજપ, કોંગ્રેસના નેતાઓએ રજૂઆત કરતા ભરશિયાળે રાજકારણમાં ગરમાવો આવી ગયો છે. કોંગ્રેસના ધારાસભ્ય ઋત્વિક મકવાણા અને ભાજપના સાંસદ ભરતસિંહ ડાભીએ આ અંગે મુખ્યમંત્રીને પત્ર લખીને રજૂઆત કરી છે. તેમના મતે પાટીદાર સમાજના કેસો પરત ખેંચવામાં સરકાર હકારત્મક છે તે સારી વાત છે.પરંતુ અન્ય સમાજના આંદોલનમાં થયેલ કેસ પણ પરત ખેંચાવા જોઈએ.
મહત્વનું છે કે, પાટીદારની જેમ અન્ય સમાજે પણ પોતાની માંગણીને લઇને આંદોલન કર્યા છે. જેમાં કરણી સેના પરના કેસ, ઠાકોર સમાજ પરના કેસ, ભરતી મુદ્દે થયેલા આંદોલનના કેસ, ખેડૂત આંદોલનના કેસ અને આ સિવાય પણ અન્ય આંદોલનો દરમિયાન અનેક કેસ થયા છે. તેવામાં આ તમામ કેસો પરત ખેંચવાની વાત આવતા સરકાર સામે બકરું કાઢતા ઉંટ પેઠું હોય તેવો ઘાટ સર્જાયો છે ત્યારે જોવાનું એ રહેશે કે, એક સમાજને રિઝવવા માટે સરકાર અન્ય સમાજોને અવગણે છે કે, પછી તમામ સમાજના કેસો પરત ખેંચે છે.
'
