તમારા કામનું / જમીન પર સ્ટે લેવા કેટલો ખર્ચ? ક્યારે મળે, કયા ડોક્યુમેન્ટ જોઈએ અને આખી પ્રક્રિયા જાણો

જ્યારે કોઈ જમીન અંગે વિવાદ ચાલી રહ્યો હોય અને સામે પક્ષ તે જમીન પર ગેરકાયદે કબ્જો કરવાનો, બાંધકામ કરવાનો કે તેને વેચી દેવાનો પ્રયાસ કરે, ત્યારે કોર્ટમાંથી 'સ્ટે ઓર્ડર' (Stay Order) મેળવવો શ્રેષ્ઠ વિકલ્પ છે. સામાન્ય ભાષામાં તેને જમીન પર રોક લગાવવી કહેવાય છે. પટિયાલા કોર્ટના એડવોકેટ મહેમૂદ આલમ જણાવે છે કે સ્ટે ઓર્ડર એ અદાલતનો એવો વચગાળાનો આદેશ છે જેના દ્વારા કોઈ ચોક્કસ કામ પર અસ્થાયી રૂપે રોક લગાવી શકાય છે.

જમીન પર સ્ટે ક્યારે અને કેવી રીતે મળે?

કોર્ટે કેસના તથ્યો અને દસ્તાવેજોના આધારે નિર્ણય લેવાનો હોય છે. જો અરજદાર કોર્ટ સમક્ષ એ સાબિત કરી શકે કે જમીન પર તેનો કાયદેસરનો દાવો છે અને જો તાત્કાલિક રોક લગાવવામાં નહીં આવે તો તેને ગંભીર અને ભરપાઈ ન થઈ શકે તેવું નુકસાન થશે, તો કોર્ટ અંતરિમ રાહત આપે છે. સ્ટે મેળવવા માટે સૌથી પહેલા જમીન સંબંધિત તમામ અસલ દસ્તાવેજો જેવા કે રજિસ્ટ્રી, સેલ ડીડ, ખસરા-ખતૌની, જમાબંધી, નકશો અને કબ્જાના પુરાવા એકઠા કરવા પડે છે. ત્યારબાદ વકીલની મદદથી સંબંધિત અદાલતમાં મુખ્ય કેસની સાથે અંતરિમ રાહત અથવા અસ્થાયી રોક માટે અરજી દાખલ કરવામાં આવે છે. કોર્ટ પુરાવા જોઈને સામે પક્ષને નોટિસ જારી કરી શકે છે અથવા તાત્કાલિક સ્ટે આપી શકે છે.

જમીન પર સ્ટે લેવામાં કેટલો ખર્ચ થાય છે?

સ્ટે ઓર્ડર મેળવવાનો કોઈ ચોક્કસ કે નિશ્ચિત ખર્ચ હોતો નથી. કોર્ટ ફી અને વકીલની ફી દરેક કેસ મુજબ અલગ-અલગ હોય છે. કોર્ટ ફી રાજ્ય, અદાલત અને કેસના પ્રકાર પર આધાર રાખે છે. જ્યારે વકીલની ફી જમીનની કિંમત, વિવાદની જટિલતા અને સુનાવણીની સંખ્યા પર નિર્ભર કરે છે. આ ઉપરાંત સ્ટેમ્પ, ટાઈપિંગ, દસ્તાવેજ પ્રમાણીકરણ અને ફાઈલિંગનો ખર્ચ પણ થાય છે. તેથી ખર્ચ કેટલોક હજારથી લઈને જટિલ કેસમાં વધુ પણ હોઈ શકે છે.

શું વકીલ વગર સ્ટે મળી શકે?

કાયદાકીય રીતે કોઈપણ વ્યક્તિ પોતે પણ કોર્ટમાં પક્ષ રાખી શકે છે, પરંતુ જમીન સંબંધિત બાબતો દસ્તાવેજી અને કાનૂની રીતે જટિલ હોય છે. તેથી સ્થાનિક વકીલની સલાહ લેવી વધુ હિતાવહ છે.

આ પણ વાંચો : VIDEO : '3 વાગ્યે ચર્ચા શરુ કરીશ, દરેક સવાલના જવાબ આપવા તૈયાર છું', અમિત શાહનો વિપક્ષને પડકાર

સ્ટે મળ્યા પછી શું ધ્યાન રાખવું?

જો કોર્ટ સ્ટે ઓર્ડર આપે તો તેમાં સ્પષ્ટ લખેલું હોય છે કે કયા કામ પર રોક છે અને આ આદેશ ક્યાં સુધી અમલી રહેશે. જો સામેનો પક્ષ સ્ટે ઓર્ડરનો અનાદર કરે તો તેની સામે અદાલતમાં તિરસ્કારની અરજી કરી શકાય છે. સ્ટે એ કાયમી માલિકીનો હક્ક નથી પરંતુ કેસનો આખરી ચુકાદો ન આવે ત્યાં સુધી સ્થિતિ જાળવી રાખવાની વ્યવસ્થા છે. ખોટા પુરાવા આપીને સ્ટે મેળવવાનો પ્રયાસ ક્યારેય કરવો જોઈએ નહીં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ