- એમપીના ઈન્દોરમાં ચાલી રહ્યું છે વિચિત્ર કાફે
- ભડાશ કાફેમાં લોકો પૈસા ખર્ચીને કાઢી રહ્યાં છે હૈયાવરાળ
- વસ્તુઓની તોડફોડ પણ કરી શકો છો, ગાળાગાળાની પણ છૂટ
વિશ્વભરમાં વિચિત્ર કાફેની કોઈ કમી નથી. ભારતમાં પણ ઘણા અનોખા કાફે છે. આવો જ એક રસપ્રદ કાફે છે 'ભડસ કાફે' જે મધ્ય પ્રદેશના ઇન્દોર શહેરના ચંદ્રનગરમાં આવેલું છે. તેનું નામ સૂચવે છે કે અહીં શું મળશે? અહીં તમે પૈસા ખર્ચીને તમારા મનની ભડાશ કાઢી શકો છો અને જે માટે તમને વસ્તુઓ આપવામાં આવશે અને તમે લાકડી લઈને તેની તોડફોડ કરીને મનની હૈયાવરાળ ઠાલવી શકો અને હળવા થઈ શકો. એટલું જ નહી પરંતુ ભડાશ કાફેમાં તમે મોટા મોટા અવાજે ગાળો પણ બોલી શકો છો.
ગ્લાસ અને કપ તોડવા માટે 2 થી 5 રુપિયાનો ચાર્જ
આ કાફેમાં કાચના ગ્લાસ અને કપ તોડવા માટે તમારે 2થી 5 રૂપિયા ચૂકવવા પડશે. જ્યારે ખુરશી, ટીવી, લેપટોપ, કોમ્પ્યુટર, સીપીયુ, વોચ, વોશિંગ મશીન માટે થોડી વધુ કિંમત ચૂકવવી પડશે. છેવટે તો ગુસ્સો ઠાલવવાની કિંમત તો છે જ સાહેબ!
કાફેમાં સારુ પણ કરી શકો છો
આ કાફેમાં તમે કોફીના ઘૂંટડાથી તમારા મનપસંદ સંગીતનો આનંદ માણી શકો છો. આ સિવાય તમે મેડિટેશન રૂમમાં જઈને ધ્યાન કરી શકો છો. આ સમય દરમિયાન તમારાથી મોબાઈલ અને અન્ય ગેજેટ્સ દૂર રાખવામાં આવશે અને તમને પૂરતું એકાંત મળે તેની ખાતરી રાખવામાં આવશે. કાફે માલિક અતુલ મલિકરામે કહ્યું કે આ ભારતનું પહેલું 'ભડાશ કાફે' છે. લોકોને મોજા, હેલ્મેટ અને ટ્રેક સુટ પહેરાવીને તોડફોડ કરાવાયા છે.
વિદેશમાં તો ખૂબ પ્રખ્યાત છે એંગર રુમ
'ભડાસ કાફે'નો કોન્સેપ્ટ ભારતના લોકો માટે નવો હોઈ શકે પરંતુ આવા એંગર રૂમ લાંબા સમયથી વિદેશોમાં પ્રખ્યાત છે. લોકોમાં વધી રહેલા ડિપ્રેશન અને ગુસ્સાને જોતા પહેલો એગર રૂમ બનાવવાનો વિચાર અમેરિકાના ડોના એલેકઝાંડરને આવ્યો હતો. 2008માં, તેમણે $5ના બદલામાં તેમના ઓફિસના કર્મચારીઓને તેમના ઘરના ગેરેજમાં તોડફોડ કરવા આમંત્રણ આપ્યું હતું.
