ગુજરાત / ભુજમાં મહિલાની હત્યા કરી લાશ કૂવામાં ફેંકી દેવાઈ, દોરડાથી બહાર કાઢીને તપાસ હાથ ધરાઈ

કચ્છ જિલ્લામાં વધુ એક ચકચારી હત્યાનો બનાવ સામે આવતા સમગ્ર વિસ્તારમાં ચકચાર મચી ગઈ છે. ભુજ નજીક આવેલા વરનોરા ગામમાં એક મહિલાની નિર્મમ હત્યા કરી તેની લાશ કુવામાં ફેંકી દેવામાં આવી હોવાની ઘટના પ્રકાશમાં આવી છે. આ ઘટનાની જાણ થતાં જ સ્થાનિક લોકોમાં ભય અને આક્રોશનો માહોલ છવાઈ ગયો છે. શાંતિપ્રિય ગણાતા આ વિસ્તારમાં આવી ગંભીર ઘટના બનતા લોકોમાં સુરક્ષા બાબતે પ્રશ્નો ઉઠવા લાગ્યા છે.

પ્રાપ્ત માહિતી મુજબ, વરનોરા ગામના સીમ વિસ્તારમાં આવેલા એક જૂના કુવામાંથી દુર્ગંધ આવતા સ્થાનિકોએ શંકા વ્યક્ત કરી હતી. બાદમાં જ્યારે કુવામાં ઝાંખી કરી તો મહિલાની લાશ નજરે પડી હતી. ઘટનાની જાણ તાત્કાલિક પોલીસને કરવામાં આવી હતી. પોલીસે ઘટના સ્થળે પહોંચીને કુવામાંથી લાશ બહાર કાઢવાની કાર્યવાહી હાથ ધરી હતી. સમગ્ર ઓપરેશન દરમિયાન આસપાસના લોકોનો મોટો ટોળું એકત્રિત થયું હતું.

પોલીસ દ્વારા લાશને બહાર કાઢ્યા બાદ પંચનામું કરીને પોસ્ટમોર્ટમ માટે મોકલવામાં આવી છે. પ્રાથમિક તપાસમાં હત્યા કરવામાં આવી હોવાની શંકા વ્યક્ત કરવામાં આવી છે, કારણ કે મહિલાના શરીર પર ઈજાના નિશાન જોવા મળ્યા હોવાનું જાણવા મળ્યું છે. જોકે, હત્યા કયા કારણોસર અને કોણે કરી તે અંગે હજુ સુધી સત્તાવાર માહિતી જાહેર કરવામાં આવી નથી.

આ પણ વાંચોઃ કાતિલ ઠંડીનો ચમકારો, કચ્છમાં પ્રાથમિક શાળાઓના સમયમાં બદલાવ કરાયો

ઘટનાની ગંભીરતા જોતા પોલીસના ઉચ્ચ અધિકારીઓ પણ સ્થળ પર પહોંચ્યા હતા. ફોરેન્સિક ટીમને બોલાવી પુરાવા એકત્રિત કરવામાં આવી રહ્યા છે. આસપાસના વિસ્તારોમાં તપાસનો દોર શરૂ કરી દેવામાં આવ્યો છે અને સ્થાનિક લોકોની પૂછપરછ પણ હાથ ધરવામાં આવી રહી છે. પોલીસે હત્યાને લઈ દરેક સંભવિત પાસાં પરથી તપાસ શરૂ કરી હોવાનું જણાવ્યું છે. સ્થાનિક રહેવાસીઓના જણાવ્યા અનુસાર, વરનોરા અને આસપાસના ગામડાઓમાં અગાઉ ક્યારેય આવી ઘટના સામે આવી નથી. તેથી આ હત્યાના બનાવે સમગ્ર વિસ્તારમાં ભયનો માહોલ ઊભો કર્યો છે. લોકોમાં ચર્ચા છે કે મહિલાની ઓળખ અને તેની હત્યાના કારણો સામે આવ્યા બાદ જ સમગ્ર ઘટનાનો ખુલાસો થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ