National Film Awards / 72મા રાષ્ટ્રીય ફિલ્મ એવોર્ડમાં ગુજરાતનો ડંકો: આ ફિલ્મને મળ્યો ગુજરાતી ભાષાની બેસ્ટ ફિલ્મનો એવોર્ડ

72મા રાષ્ટ્રીય ફિલ્મ એવોર્ડ્સમાં ગુજરાતી સિનેમાને મોટી સિદ્ધિ મળી છે. ગુજરાતી ફિલ્મ 'મારણ'ને બેસ્ટ ગુજરાતી ફીચર ફિલ્મનો રાષ્ટ્રીય એવોર્ડ મળ્યો છે. દેશના સૌથી પ્રતિષ્ઠિત ફિલ્મ સન્માનમાં સ્થાન મેળવી 'મારણ'એ ગુજરાતી સિનેમાની ગુણવત્તા અને બદલાતા વિષયોની મજબૂત છાપ છોડી છે.

માહિતી અને પ્રસારણ મંત્રાલયે જાહેર કરેલા 72મા રાષ્ટ્રીય ફિલ્મ એવોર્ડ્સમાં વર્ષ 2024 દરમિયાન CBFC દ્વારા પ્રમાણિત થયેલી ફિલ્મોનું મૂલ્યાંકન કરવામાં આવ્યું હતું. તેમાં ગુજરાતી ભાષાની શ્રેષ્ઠ ફિલ્મ તરીકે 'મારણ'ની પસંદગી કરવામાં આવી છે.

શું છે 'મારણ'ની ખાસિયત?

'મારણ' એક સોશિયલ થ્રિલર છે, જે માત્ર મનોરંજન પૂરતી સીમિત નથી રહેતી, પરંતુ સમાજના ગંભીર અને સંવેદનશીલ મુદ્દાઓને સ્પર્શે છે. ખાસ કરીને મહિલાઓની અસુરક્ષા, કેદ જેવી માનસિકતા અને સામાજિક વાસ્તવિકતાઓને ફિલ્મમાં થ્રિલર અંદાજમાં રજૂ કરવામાં આવી છે. આ જ કારણ છે કે ફિલ્મને દેશ-વિદેશના ફિલ્મ મહોત્સવોમાં પણ પ્રશંસા મળી હતી.

અભિષેક જૈનની દમદાર વાપસી

'મારણ'નું દિગ્દર્શન જાણીતા ગુજરાતી ફિલ્મમેકર અભિષેક જૈને કર્યું છે. 'બે યાર' જેવી સફળ ફિલ્મ બાદ તેમણે લાંબા વિરામ પછી આ ફિલ્મ દ્વારા વાપસી કરી હતી. અભિષેક જૈને અગાઉ જણાવ્યું હતું કે 'મારણ' પરંપરાગત ગુજરાતી ફિલ્મોથી અલગ છે અને આંતરરાષ્ટ્રીય સ્તરની સ્ટોરીટેલિંગ ધરાવતી સોશિયલ થ્રિલર છે.

યશ સોની અને દીક્ષા જોશીની જોડી

ફિલ્મમાં યશ સોની અને દીક્ષા જોશી મુખ્ય ભૂમિકામાં જોવા મળે છે. બંને કલાકારોએ પોતાના સંવેદનશીલ અભિનયથી ફિલ્મને વધુ અસરકારક બનાવી છે. ગુજરાતી સિનેમાના નવા યુગના પ્રતિભાશાળી કલાકારો તરીકે બંનેએ આ ફિલ્મમાં નોંધપાત્ર કામ કર્યું છે.

રાષ્ટ્રીય એવોર્ડ પહેલાં આંતરરાષ્ટ્રીય મંચ પર પણ મળી હતી સફળતા

'મારણ'એ માત્ર ભારતમાં જ નહીં પરંતુ વિદેશમાં પણ પોતાની છાપ છોડી હતી. ફિલ્મને શિકાગો સાઉથ એશિયન ફિલ્મ ફેસ્ટિવલમાં Best Feature Film (Jury Award) મળ્યો હતો. તે સમયે પણ ફિલ્મની વિષયવસ્તુ અને પ્રસ્તુતિની વિશેષ પ્રશંસા થઈ હતી.

ગુજરાતી સિનેમા માટે ગૌરવની ક્ષણ

છેલ્લાં કેટલાક વર્ષોમાં ગુજરાતી ફિલ્મો માત્ર કોમેડી કે પારિવારિક મનોરંજન પૂરતી સીમિત રહી નથી. 'હેલ્લારો', 'ધ ગૂડ રોડ', 'ઢ', 'વશ' બાદ હવે 'મારણ' જેવી ફિલ્મો સાબિત કરી રહી છે કે ગુજરાતી સિનેમા વિષયવસ્તુ અને ટેક્નિકલ ગુણવત્તામાં પણ રાષ્ટ્રીય સ્તરે પોતાની આગવી ઓળખ બનાવી રહ્યો છે.

દેશની વિવિધ ભાષાઓની શ્રેષ્ઠ ફિલ્મો

ગુજરાતી: મારણ

હિન્દી: શ્રીકાંત

તામિલ: રાયાન

તેલુગુ: કમિટી કુર્રોલ્લુ

મલયાલમ: ફેમિનિચી ફાતિમા

કન્નડ: મિથ્યા

મરાઠી: મુકામ પોસ્ટ બોમ્બિલવાડી

બંગાળી: ચલચિત્ર એખોન

અસમિયા: જુઈફૂલ

ઓડિયા: લહરી

મણિપુરી: સુનિતા

કોંકણી: મોગ અસુમ

તુલુ: IMBU