મોરબી / જાન્યુઆરીથી માર્ચ વચ્ચે ગુજરાતમાં વહેલી ચૂંટણી યોજાવાનો કોંગ્રેસના તુષાર ચૌધરીનો દાવો

મોરબી: ગુજરાતના રાજકીય વર્તુળોમાં ચૂંટણીને લઈને ચર્ચાઓ વચ્ચે વિધાનસભામાં કોંગ્રેસ પક્ષના નેતા ડૉ. તુષાર ચૌધરીએ મોરબીમાં યોજાયેલી આક્રોશ સભામાં મોટું નિવેદન આપ્યું છે. તેમણે દાવો કર્યો છે કે રાજ્ય સરકાર વહેલી ચૂંટણી યોજવાની તૈયારીઓ કરી રહી છે અને આગામી વર્ષે જાન્યુઆરી, ફેબ્રુઆરી અથવા માર્ચ મહિનામાં ગુજરાતમાં ચૂંટણી યોજાઈ શકે છે.

ડૉ. તુષાર ચૌધરીએ સરકારની કામગીરી અને દાનત સામે સવાલો ઉઠાવતાં જણાવ્યું હતું કે સરકાર વહેલી ચૂંટણી યોજવાની દિશામાં આગળ વધી શકે છે. તેમણે આક્ષેપ કર્યો હતો કે સરકારની દાનત સારી નથી અને તે કોઈ મોટો રાજકીય દાવ રમવાની તૈયારીમાં છે.

‘સરકાર મોટો દાવ કરવા માગે છે, હું તમને ચેતવું છું’

મોરબીની આક્રોશ સભામાં સંબોધન કરતાં ડૉ. તુષાર ચૌધરીએ કાર્યકરો અને જનતાને સાવચેત રહેવાની અપીલ કરી હતી. તેમણે જણાવ્યું હતું કે સરકાર કોઈ મોટો દાવ કરવા માગે છે, તેથી સૌએ સજાગ રહેવાની જરૂર છે. તેમના આ નિવેદનથી ગુજરાતના રાજકારણમાં વહેલી ચૂંટણીની શક્યતાઓ અંગે ચર્ચા તેજ બની શકે છે.

ખેડૂતોના હિત માટે કોંગ્રેસે મૂકી માગણીઓ

આક્રોશ સભા દરમિયાન ડૉ. તુષાર ચૌધરીએ ખેડૂતોના પ્રશ્નો પણ ઉઠાવ્યા હતા. તેમણે જણાવ્યું હતું કે ખેડૂતોના હિત અને તેમની સમસ્યાઓના ઉકેલ માટે કોંગ્રેસ પક્ષ દ્વારા સરકાર સમક્ષ કેટલીક માગણીઓ રજૂ કરવામાં આવી છે.

આ પણ વાંચોઃ બુટલેગરોથી ગેંગસ્ટર સુધી SMCની કાર્યવાહી, પોણા બે વર્ષમાં ચાર વખત ફાયરિંગ કરવાની નોબત આવી!

કોંગ્રેસે ખેડૂતોના હિતને કેન્દ્રમાં રાખીને સરકાર પાસે યોગ્ય પગલાં ભરવાની માગ કરી છે. હવે સરકાર આ માગણીઓ અંગે કેવું વલણ અપનાવે છે અને વહેલી ચૂંટણી અંગેના દાવા પર રાજકીય સ્તરે શું પ્રતિક્રિયાઓ સામે આવે છે, તેના પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ