વિશ્વ / તિબેટમાં 7ની તીવ્રતાના ભૂકંપે મચાવી તબાહી, 16નાં મોત, 32 ઘાયલ અને 339 મકાનો ધરાશાયી

ગુરુવારે રાત્રે લોકો પોતાના ઘરોમાં હતા, ત્યારે અચાનક ધરતી ધ્રૂજવા લાગી અને જોતજોતામાં લોકો જીવ બચાવવા ઘરની બહાર દોડી આવ્યા. ક્યાંક મકાનો ધરાશાયી થવા લાગ્યાં તો ક્યાંક દીવાલોમાં મોટી તિરાડો પડી ગઈ. લોકોમાં એટલો ડર ફેલાયો કે કેટલાકે આખી રાત ઘરની બહાર અને રસ્તા પર પાર્ક કરેલી કારમાં આશરો લેવો પડ્યો. આ ભયાનક દૃશ્યો ચીનના તિબેટ ક્ષેત્રના છે, જ્યાં 7ની તીવ્રતાના શક્તિશાળી ભૂકંપે ભારે તબાહી મચાવી છે. આ કુદરતી આફતમાં અત્યાર સુધીમાં ઓછામાં ઓછા 16 લોકોનાં મોત થયા છે, જ્યારે 32 લોકો ઘાયલ થયા છે.

તિબેટમાં ભૂકંપથી 339 મકાનો ધરાશાયી

ચીનના તિબેટ ક્ષેત્રમાં ગુરુવારે આવેલા શક્તિશાળી ભૂકંપને કારણે ઉત્તરીય શહેર નાગકુમાં ભારે નુકસાન થયું છે. શહેરના મીડિયા કાર્યાલયે સ્થાનિક અધિકારીઓને ટાંકીને આપેલી માહિતી મુજબ, ભૂકંપના કારણે ઓછામાં ઓછા 339 મકાનો ધરાશાયી થયા છે. આ ઉપરાંત આસપાસના અનેક ગામડાઓમાં પણ મકાનોને નુકસાન પહોંચ્યું છે. ભૂકંપ એટલો શક્તિશાળી હતો કે લોકોમાં ભારે ગભરાટ ફેલાઈ ગયો હતો. અનેક પરિવારો પોતાના ઘરો છોડીને સુરક્ષિત સ્થળોએ પહોંચ્યા હતા.

16 લોકોનાં મોત, 11ની હાલત ગંભીર

આ શક્તિશાળી ભૂકંપમાં અત્યાર સુધીમાં ઓછામાં ઓછા 16 લોકોનાં મોત થયાના અહેવાલ છે, જ્યારે 32 લોકો ઘાયલ થયા છે. ઘાયલોમાંથી 11 લોકોની હાલત ગંભીર હોવાનું જાણવા મળ્યું છે, જ્યારે અન્ય 21 લોકોને સામાન્ય ઈજાઓ પહોંચી છે. ભૂકંપના કારણે અનેક પરિવારો મુશ્કેલીમાં મુકાયા છે. સ્થાનિક તંત્ર દ્વારા અસરગ્રસ્ત વિસ્તારોમાં બચાવ કામગીરી હાથ ધરવામાં આવી છે અને ઘાયલોને જરૂરી મદદ પહોંચાડવામાં આવી રહી છે.

7ની તીવ્રતાના ભૂકંપ બાદ નાના આંચકા

ચાઇના અર્થક્વેક નેટવર્ક્સ સેન્ટર (CENC)ના જણાવ્યા અનુસાર, સ્થાનિક સમય મુજબ ગુરુવારે રાત્રે 10:33 વાગ્યે ભૂકંપ આવ્યો હતો. રિક્ટર સ્કેલ પર તેની તીવ્રતા 7.0 નોંધાઈ હતી. ભૂકંપનું કેન્દ્રબિંદુ ઉત્તરી તિબેટના નાગકુ ક્ષેત્રમાં જમીનથી 10 કિલોમીટર નીચે હતું. આ વિસ્તાર સમુદ્ર સપાટીથી સરેરાશ 4,864 મીટરની ઊંચાઈ પર આવેલો છે. ભૂકંપનું કેન્દ્રબિંદુ તિબેટની રાજધાની લ્હાસાથી લગભગ 400 કિલોમીટર દૂર હોવાનું જાણવા મળ્યું છે. મુખ્ય ભૂકંપ બાદ આસપાસના વિસ્તારોમાં 3થી 4ની તીવ્રતાના અનેક નાના આંચકા પણ અનુભવાયા હતા.

જાન્યુઆરી 2024 પછીનો સૌથી શક્તિશાળી ભૂકંપ

મળતી માહિતી મુજબ, જાન્યુઆરી 2024 પછી ચીનમાં આવેલો આ સૌથી શક્તિશાળી ભૂકંપ છે. ભૂકંપના કારણે નાગકુ અને આસપાસના વિસ્તારોમાં ભારે નુકસાન થયું છે. રાજ્ય મીડિયાના અહેવાલ મુજબ, ભૂકંપના કેન્દ્રબિંદુ નજીક આવેલા એક ગામમાં બે લોકો ઘાયલ થયા હતા. આ ઉપરાંત આસપાસના ગામડાઓમાં અનેક મકાનોની દીવાલોમાં તિરાડો પડી ગઈ હતી. સતત નાના આંચકા અનુભવાતા લોકોમાં ભયનો માહોલ જોવા મળ્યો હતો.

ઘર છોડીને લોકો રસ્તા પર દોડી આવ્યા

ભૂકંપ બાદ સ્થાનિક રાજ્ય મીડિયા દ્વારા કેટલાક વીડિયો પણ જાહેર કરવામાં આવ્યા હતા. આ વીડિયોમાં ભૂકંપથી ગભરાયેલા લોકો પોતાના ઘરો છોડીને બહાર દોડી આવતા જોવા મળ્યા હતા. કેટલાક લોકો રસ્તા પર ઊભા રહ્યા હતા, જ્યારે અન્ય લોકોએ શેરીઓમાં પાર્ક કરેલી પોતાની કારમાં આશરો લીધો હતો. મકાનોને થયેલા નુકસાન અને ફરી ભૂકંપ આવવાની આશંકાને કારણે લોકો ઘરમાં પરત જતાં ડરી રહ્યા હતા.

આ પણ વાંચો : પ્રાણીઓમાં જોવા મળતો વાયરસ હવે માણસોમાં ફેલાયો, આ દેશમાં પહેલું મોત, જાણો WHOએ શું કહ્યું?

બચાવ કામગીરી શરૂ, બેઘર લોકો માટે તંબુ ગોઠવાયા

ભૂકંપ બાદ સ્થાનિક પોલીસ અને ફાયર વિભાગના કર્મચારીઓ દ્વારા બચાવ કામગીરી શરૂ કરવામાં આવી છે. અસરગ્રસ્ત વિસ્તારોમાં લોકોને સુરક્ષિત બહાર કાઢવા અને બેઘર થયેલા પરિવારોને કામચલાઉ આશ્રય આપવા માટે કામગીરી ચાલી રહી છે. બચાવ ટીમો દ્વારા તંબુઓ ગોઠવવામાં આવી રહ્યા છે, જેથી પોતાના ઘર ગુમાવનારા લોકોને રહેવાની વ્યવસ્થા મળી શકે. સેંકડો મકાનોને નુકસાન પહોંચ્યું હોવાથી સ્થાનિક તંત્ર સામે અસરગ્રસ્ત લોકોને મદદ પહોંચાડવાનો મોટો પડકાર ઊભો થયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ