ગુજરાત / લિવ-ઈનમાં રહી અલગ થયા બાદ દુ*ષ્કર્મનો ગુનો ન બને! ગુજરાત હાઈકોર્ટે મહિલાની અરજી ફગાવી પુરુષને નિર્દોષ છોડ્યો!

સાથે રહેવા માટે લેખિત કરાર કર્યો, થોડા સમય બાદ સંબંધનો અંત લાવવા માટે પણ કરાર કર્યો અને પછી યુવતીએ યુવક સામે લગ્નની લાલચ આપીને દુષ્કર્મ આચર્યાનો આરોપ મૂક્યો. એક સમયે પરસ્પર સંમતિથી શરૂ થયેલો સંબંધ આખરે કોર્ટ સુધી પહોંચ્યો. ત્યારે સવાલ એ ઊભો થયો કે શું લિવ-ઇનમાં રહ્યા બાદ સંબંધ તૂટી જાય તો દુષ્કર્મનો ગુનો બને? આ મામલે ગુજરાત હાઈકોર્ટે મહત્ત્વનો ચુકાદો આપ્યો છે. હાઈકોર્ટે ટ્રાયલ કોર્ટ દ્વારા આરોપીને નિર્દોષ છોડી મૂકવાના નિર્ણયમાં હસ્તક્ષેપ કરવાનો ઇનકાર કર્યો છે. જોકે, કોર્ટે એ પણ સ્પષ્ટ કર્યું છે કે માત્ર લેખિત કરાર હોવાથી દુષ્કર્મના આરોપને ખોટો માની શકાય નહીં.

શું હતો સમગ્ર મામલો?

આ કેસમાં એક યુવક અને યુવતી વચ્ચે સંબંધ હતો. બંનેએ પરસ્પર સંમતિથી સાથે રહેવાનો નિર્ણય લીધો હતો અને તે માટે લેખિત કરાર પણ કર્યો હતો. આ કરારના આધારે બંને લિવ-ઇન સંબંધમાં રહેતા હતા. જોકે, સમય જતાં બંને વચ્ચેનો સંબંધ સમાપ્ત થયો હતો. ત્યારબાદ બંનેએ અલગ રહેવા માટે પણ લેખિત કરાર કર્યો હતો. આમ, સાથે રહેવાની શરૂઆતથી લઈને સંબંધના અંત સુધી બંને વચ્ચે લેખિત કરારો કરવામાં આવ્યા હતા.

અલગ થયા બાદ યુવતીએ નોંધાવ્યો દુષ્કર્મનો કેસ

સંબંધ સમાપ્ત થયા બાદ યુવતીએ યુવક સામે ગંભીર આરોપો મૂક્યા હતા. યુવતીએ આક્ષેપ કર્યો હતો કે યુવકે લગ્ન કરવાનું વચન આપીને તેની સાથે શારીરિક સંબંધ બાંધ્યા હતા અને દુષ્કર્મ આચર્યું હતું. આ મામલો ટ્રાયલ કોર્ટ સુધી પહોંચ્યો હતો. ટ્રાયલ કોર્ટે બંને પક્ષોની રજૂઆતો અને ઉપલબ્ધ પુરાવાઓની તપાસ કર્યા બાદ યુવકને નિર્દોષ છોડી મૂક્યો હતો. જોકે, આ નિર્ણયને પડકારતી અપીલ ગુજરાત હાઈકોર્ટ સમક્ષ કરવામાં આવી હતી.

લેખિત કરારો અંગે હાઈકોર્ટે શું કહ્યું?

ગુજરાત હાઈકોર્ટે કેસની સુનાવણી દરમિયાન બંને પક્ષો વચ્ચે થયેલા લેખિત કરારોને પણ ધ્યાનમાં લીધા હતા. કોર્ટે નોંધ્યું હતું કે યુવક અને યુવતીએ સાથે રહેવા માટે સ્વેચ્છાએ કરાર કર્યો હતો અને ત્યારબાદ અલગ થવા માટે પણ લેખિત કરાર કર્યો હતો. આ કરારો ઉપરાંત અન્ય પુરાવાઓનું પણ મૂલ્યાંકન કરવામાં આવ્યું હતું. અદાલતે અવલોકન કર્યું કે જ્યારે બે પુખ્ત વ્યક્તિઓ પરસ્પર સંમતિથી સાથે રહે અને પછી સંબંધ સમાપ્ત કરે, ત્યારે શરૂઆતથી જ લગ્નનું ખોટું વચન આપવામાં આવ્યું હતું કે નહીં, તે પુરાવાના આધારે નક્કી કરવું જરૂરી છે.

લગ્ન ન થાય તો શું દુષ્કર્મનો ગુનો બને?

આ કેસમાં સૌથી મહત્ત્વનો પ્રશ્ન એ હતો કે યુવકે લગ્ન કરવાનું વચન આપ્યું ત્યારે ખરેખર લગ્ન કરવાનો ઇરાદો હતો કે નહીં? કાયદાકીય રીતે માત્ર લગ્ન ન થવાથી અથવા પ્રેમસંબંધ તૂટી જવાથી દરેક કિસ્સામાં દુષ્કર્મનો ગુનો સાબિત થતો નથી. પરંતુ જો પુરાવાથી સાબિત થાય કે યુવકનો શરૂઆતથી જ લગ્ન કરવાનો કોઈ ઇરાદો નહોતો અને તેણે માત્ર શારીરિક સંબંધ બાંધવા માટે લગ્નનું ખોટું વચન આપીને યુવતીની સંમતિ મેળવી હતી, તો કાયદાકીય રીતે મામલો અલગ બની શકે છે. આથી દરેક કેસમાં સંમતિ કેવી રીતે મેળવવામાં આવી હતી તે જાણવું જરૂરી છે.

ટ્રાયલ કોર્ટના નિર્ણયને હાઈકોર્ટે રાખ્યો યથાવત્

ગુજરાત હાઈકોર્ટે સમગ્ર કેસની હકીકતો, લેખિત કરારો અને ઉપલબ્ધ પુરાવાઓને ધ્યાનમાં લીધા બાદ ટ્રાયલ કોર્ટના નિર્ણયમાં હસ્તક્ષેપ કરવા માટે પૂરતાં કારણો ન હોવાનું માન્યું હતું. આથી હાઈકોર્ટે અપીલ ફગાવી દીધી હતી અને આરોપીને નિર્દોષ છોડી મૂકવાનો ટ્રાયલ કોર્ટનો નિર્ણય યથાવત્ રાખ્યો હતો. આ ચુકાદો કેસના ચોક્કસ સંજોગો અને પુરાવાઓના આધારે આપવામાં આવ્યો હતો.

આ પણ વાંચો : અદાણી ગેસે CNGના ભાવમાં ₹4નો વધારો કર્યો, અમદાવાદમાં હવે કેટલો થયો નવો ભાવ?

લિવ-ઇન સંબંધમાં રહેતા લોકો માટે ચુકાદો કેમ મહત્ત્વનો?

ગુજરાત હાઈકોર્ટનો આ ચુકાદો લિવ-ઇન સંબંધો, પરસ્પર સંમતિ અને લગ્નના ખોટા વચનના આરોપોને સમજવા માટે મહત્ત્વનો છે. જોકે, આ ચુકાદાનો અર્થ એવો નથી કે લિવ-ઇન સંબંધમાં લેખિત કરાર કરવાથી દુષ્કર્મનો ગુનો બની જ ન શકે. માત્ર કરારના આધારે કોઈપણ આરોપને ખોટો ગણાવી શકાય નહીં. દરેક કેસમાં સંબંધની શરૂઆત, સંમતિની પરિસ્થિતિ, લગ્નના વચન પાછળનો ઇરાદો અને ઉપલબ્ધ પુરાવાઓને ધ્યાનમાં લેવા જરૂરી છે. આ ચુકાદાથી સ્પષ્ટ થાય છે કે પરસ્પર સંમતિથી શરૂ થયેલો સંબંધ તૂટી જવો અને શરૂઆતથી જ છેતરપિંડીના ઇરાદાથી સંબંધ બાંધવો, બંને બાબતો કાયદાની નજરે અલગ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ