ગુજરાત / બુટલેગરોથી ગેંગસ્ટર સુધી SMCની કાર્યવાહી, પોણા બે વર્ષમાં ચાર વખત ફાયરિંગ કરવાની નોબત આવી!

અંધારી રાત, પુરઝડપે દોડતી દારૂ ભરેલી કાર અને પાછળ પડેલી પોલીસની ટીમ! અચાનક કાર પોલીસકર્મીઓ તરફ ધસી આવે છે અને વાતાવરણમાં ગોળીનો અવાજ ગુંજી ઊઠે છે. બુટલેગર્સને પકડવા નીકળેલા સ્ટેટ મોનિટરિંગ સેલ (SMC)ની ટીમ માટે આ કોઈ ફિલ્મી દૃશ્ય નહીં, પરંતુ મેદાન પરનો ખતરનાક પડકાર છે. અમદાવાદના શાહીબાગમાં રર ઓક્ટોબરે હવામાં એક રાઉન્ડ ફાયરિંગની ઘટના સામે આવ્યા બાદ ફરી સવાલ ઊઠ્યો છે કે દારૂના કાળા કારોબાર પાછળ કેટલું જોખમી નેટવર્ક સક્રિય છે? બીલીમોરાથી દાહોદ અને શામળાજી સુધીના ઓપરેશનમાં ક્યાંક સામસામે ગોળીબાર થયો તો ક્યાંક કસ્ટડીમાં રહેલા આરોપીને કાબૂમાં લેવા ફાયરિંગ કરવું પડ્યું. બુટલેગર્સને પકડવા જતી પોલીસ સામે જ્યારે ગોળીઓનો ગડગડાટ શરૂ થાય છે ત્યારે આ લડાઈ માત્ર દારૂની હેરાફેરી રોકવાની રહેતી નથી, પરંતુ પોલીસની સુરક્ષાનો પણ મોટો સવાલ બની જાય છે. પોણા બે વર્ષમાં સ્ટેટ મો‌િનટરિંગ સેલની ટીમને ઓપરેશન દરમિયાન ચાર વખત ફાયરિંગ કરવાની નોબત આવી છે.

શાહીબાગમાં એક રાઉન્ડ ફાયરિંગથી ખળભળાટ

રર ઓક્ટોબરે શાહીબાગથી એરપોર્ટ રોડ તરફ દારૂ ભરેલી ક્રેટા કારનો પીછો કરતી એસએમસીની ટીમ સરસ્વતીપાર્ક સોસાયટી પાસે પહોંચી હતી. પોલીસના જણાવ્યા પ્રમાણે કારમાં સવાર શખ્સોએ પોલીસ પર કાર ચઢાવી દેવાનો પ્રયાસ કર્યો હતો. પરિસ્થિતિને ધ્યાનમાં રાખીને પીઆઈ મિતેશ ત્રિવેદીની ટીમે હવામાં એક રાઉન્ડ ફાયરિંગ કર્યું હતું, જોકે કારમાં સવાર આરોપીઓ પોલીસને હાથતાળી આપીને ફરાર થઈ ગયા હતા. આ ઘટનાએ ફરી સવાલ ઊભો કર્યો છે કે દારૂની હેરાફેરી કરતા શખ્સોને પકડવા જતી પોલીસ સામે કેટલી જોખમી પરિસ્થિતિ સર્જાઈ શકે છે.

શામળાજીમાં પણ આરોપી ઘાયલ

માર્ચ-ર૦ર૬માં અરવલ્લી જિલ્લાના શામળાજી નજીક સુખલાલ ઉર્ફે શંકર ડાંગીને લઈ જતી વખતે ફાયરિંગ થયું હતું. પોલીસના જણાવ્યા પ્રમાણે આરોપીએ હાથકડીથી પોલીસકર્મી પર હુમલો કરી તેનું ગળું દબાવવાનો પ્રયાસ કર્યો હતો. આ દરમિયાન થયેલા ફાયરિંગમાં આરોપીના જમણા હાથમાં ગોળી વાગી હતી. આ બનાવે આરોપીઓને કસ્ટડીમાં લઈ જતી વખતે પોલીસની સુરક્ષાનો મુદ્દો ફરી ચર્ચામાં લાવ્યો હતો.

દાહોદમાં આરોપીને ગુજરાત લાવતી વખતે ફાયરિંગ

ડિસેમ્બર-ર૦રપમાં દારૂના કેસના આરોપી અશોક પંવાર ઉર્ફે બિશ્નોઈને આસામથી ગુજરાત લાવવામાં આવી રહ્યો હતો. આ દરમિયાન પોલીસકર્મીનું ગળું દબાવવાનો પ્રયાસ થયો હોવાના પોલીસના દાવા બાદ એસએમસીના પીઆઈ આર.જી. ખાંટે ફાયરિંગ કર્યું હતું. આ ઘટનામાં આરોપીને પગમાં ગોળી વાગી હતી. કસ્ટડીમાં રહેલા આરોપીને લઈ જતી વખતે પણ પોલીસને જોખમી પરિસ્થિતિનો સામનો કરવો પડ્યો હતો.

બીલીમોરામાં સામસામે ગોળીબાર

નવેમ્બર-ર૦રપમાં નવસારીના બીલીમોરામાં એસએમસીની ટીમ અને શંકાસ્પદ હથિયારધારીઓ વચ્ચે સામસામે ફાયરિંગ થયું હતું. આ ઘટનામાં યશસિંહ સુંદરસિંહ નામના આરોપીને પગમાં ગોળી વાગી હતી. પોલીસે ચાર આરોપીઓની ધરપકડ કરી હતી. તપાસ દરમિયાન ત્રણ પિસ્તોલ અને ર૭ કારતૂસ કબજે કરવામાં આવ્યાં હતાં. આ કાર્યવાહી માત્ર દારૂના દરોડા પૂરતી મર્યાદિત ન રહેતાં હથિયારો સાથે સંકળાયેલા ગુનાઈત નેટવર્ક સામેની કામગીરી તરીકે પણ ચર્ચામાં આવી હતી.

SMCનાં પાંચ ચર્ચિત ફાયરિંગ ઓપરેશન

• - શાહીબાગ, અમદાવાદ–રર ઓક્ટોબર, ર૦ર૬: દારૂ ભરેલી ક્રેટા કારનો પીછો કરતી વખતે હવામાં એક રાઉન્ડ ફાયરિંગ કરાયું. આરોપીઓ ફરાર થયા.
• - બીલીમોરા, નવેમ્બર-ર૦રપ: સામસામે ફાયરિંગમાં એક આરોપી ઘાયલ થયો. ચાર આરોપીઓ ઝડપાયા, ત્રણ પિસ્તોલ અને ર૭ કારતૂસ કબજે કરાયાં.
• - દાહોદ, ડિસેમ્બર-ર૦રપ: અશોક પંવારને આસામથી ગુજરાત લાવતી વખતે ફાયરિંગ થયું. આરોપીને પગમાં ગોળી વાગી.
• - શામળાજી, માર્ચ-ર૦ર૬: સુખલાલ ઉર્ફે શંકર ડાંગીના જમણા હાથમાં ગોળી વાગી.
• - શામળાજી-રતનપુર બોર્ડર, ર૩ ઓક્ટોબર, ર૦ર૧: વિદેશી દારૂ ભરેલી લક્ઝરી કાર રોકવા નાકાબંધી દરમિયાન પોલીસને કચડવાનો પ્રયાસ થયાની વિગતો સામે આવી હતી. સ્કોર્પિયોના ટાયરને નિશાન બનાવી ચાર રાઉન્ડ ફાયરિંગ કરાયું હતું.

આ પણ વાંચો : ટાઈગર શ્રોફ ફાયરિંગ કેસમાં મોટો ખુલાસો! મુંબઈ ક્રાઈમ બ્રાન્ચે સુરત રેલવે સ્ટેશન વિસ્તારમાંથી બંદૂક શોધી કાઢી!

ફાયરિંગ કરવા પાછળનાં કારણો

• - વાહનથી હુમલાનો પ્રયાસ: પોલીસના જણાવ્યા પ્રમાણે કેટલીક ઘટનાઓમાં પોલીસકર્મીઓ તરફ વાહન દોડાવવામાં આવ્યું હતું.
• - હાઈવે પર પીછો: દારૂ ભરેલાં વાહનો રોકવાના બદલે ભગાડવામાં આવે ત્યારે જોખમ વધે છે.
• - કસ્ટડીમાં હુમલો: આરોપીઓ દ્વારા પોલીસકર્મીઓ પર હુમલો કરવાના પ્રયાસના દાવા બાદ ફાયરિંગની ઘટનાઓ બની હતી.
• - હથિયારધારીઓ સાથે અથડામણ: બીલીમોરામાં સામસામે ફાયરિંગ થયું હતું.
• - આત્મરક્ષણ: કેટલીક ઘટનાઓમાં પોલીસના જણાવ્યા પ્રમાણે પોતાની સુરક્ષા અથવા આરોપીઓને કાબૂમાં લેવા ફાયરિંગ કરવામાં આવ્યું હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ