ગાંધીનગર / સ્કૂલમાં આચાર્યની મંજૂરી વગર બહારના લોકોની 'નો એન્ટ્રી', જાણો બીજા શું નિયમો, સરકારનો પરિપત્ર

શાળા સંચાલકો સામે આખરે શિક્ષણ વિભાગ ઝૂક્યું છે. શાળા સંચાલકોની માંગ આખરે સરકારે સ્વીકારી લીધી છે. શિક્ષણ વિભાગ દ્વારા શાળા પરિસરમાં પ્રવેશ પર મહત્વનો પરિપત્ર બહાર પાડવામાં આવ્યો છે. શાળા પરિસરમાં બિનઅધિકૃત વ્યક્તિઓની અવરજવર પર પ્રતિબંધ મૂકવામાં આવ્યો છે જોકે આચાર્યની મંજૂરી લેવી ફરજિયાત રહેશે. તે ઉપરાંત શાળામાં આવનાર દરેક મુલાકાતીએ પ્રવેશ કરતા પહેલા રજિસ્ટરમાં પોતાની વિગતો નોંધાવવી પડશે. પૂર્વ મંજૂરી વિના શાળામાં ફોટોગ્રાફી, વીડિયોગ્રાફી, ઇન્ટરવ્યુ કે લાઇવ સ્ટ્રીમિંગ કરવા પર પ્રતિબંધ મૂકવામાં આવ્યો છે. વર્ગખંડ કે રમતના મેદાનમાં જવા માટે પણ આચાર્યની લેખિત પરવાનગી ફરજિયાત બનાવાઈ છે. નિયમ ભંગ કરનાર સામે પોલીસ કાર્યવાહી સહિતની સૂચનાઓ સાથે પરિપત્ર જાહેર કરાયો છે.

શિક્ષક સંઘે કરી હતી માંગ

છેલ્લા કેટલાક સમયથી આમ આદમી પાર્ટીના નેતાઓ દ્વારા સ્કૂલોમાં જઈને ત્યાંની સ્થિતિ ચેક કરવામાં આવી રહી છે. તો કોંગ્રેસના પણ કેટલાંક નેતાઓ અમદાવાદ મ્યુનિસિપલ કોર્પોરેશનની સ્કૂલોમાં જઈને તપાસ કરીને ત્યાંની સ્થિતિ બહાર લાવી રહ્યા હતા. જે સમયે શિક્ષક સંઘ દ્વારા પત્ર લખીને શાળાઓમાં બિન અધિકૃત વ્યક્તિઓના પ્રવેશ પર પ્રતિબંધ મૂકવા માટે માંગ કરવામાં આવી હતી જે પછી શિક્ષણ વિભાગે આ પગલું ભર્યું હતું.

અધિકૃત સરકારી અધિકારીઓ સ્કૂલોમાં આવી શકશે

સ્કૂલોમાં બહારના લોકોના પ્રવેશ પર પ્રતિબંધ મૂકાયો છે પંરતુ સત્તાવાર ફરજ બજાવવા માટે નિયમસર અધિકૃત સરકારી અધિકારીઓને આ નિયમમાંથી બાકાત રખાયા છે.

વધુ વાંચો : સુસાઈડ નોટ લખી ભાવનગર ACB કોન્સ્ટેબલ ગુમ, મોબાઈલ-ચાવી મળ્યા, DYSP-PI પર ઊઘરાણીનો આક્ષેપ

બિનઅધિકૃત વ્યક્તિ સ્કૂલમાં ન જાય તો આચાર્યે શું કરવું?

શિક્ષણ વિભાગે સ્પષ્ટ કર્યું છે કે, કોઈ વ્યક્તિ પરવાનગી વિના સ્કૂલમાં પ્રવેશ કરે, સ્કૂલ પરિસર છોડવાનો ઇનકાર કરે, અનધિકૃત રીતે ફોટોગ્રાફી કે વીડિયોગ્રાફી કરવાનો પ્રયાસ કરે તો આચાર્યએ તાત્કાલિક સ્થાનિક પોલીસ અને સંબંધિત જિલ્લા શિક્ષણાધિકારી, જિલ્લા પ્રાથમિક શિક્ષણાધિકારી, શાસનાધિકારી અથવા તાલુકા પ્રાથમિક શિક્ષણાધિકારીને જાણ કરવાની રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ