સ્પોર્ટ્સ / ટીમ ઈન્ડિયામાંથી લાંબી રજા નક્કી? IPL 2027 પહેલાં હાર્દિક પંડ્યાની વાપસી મુશ્કેલ!

ભારતીય ક્રિકેટ ટીમના સ્ટાર ઓલરાઉન્ડર હાર્દિક પંડ્યાની વાપસી માટે હજુ લાંબી રાહ જોવી પડી શકે છે. પગના સ્નાયુમાં ઈજા થતાં તે હાલમાં બેંગલુરુના સેન્ટર ઑફ એક્સેલન્સમાં રિહેબિલિટેશનમાંથી પસાર થઈ રહ્યો છે. અહેવાલો મુજબ હાર્દિકની ફિટનેસ સુધારવાની પ્રક્રિયા લાંબી હોવાથી IPL 2027 પહેલાં તેની મેદાન પર વાપસી મુશ્કેલ બની શકે છે.

હાર્દિક પંડ્યાની ઈજાએ વધારી ટીમ ઈન્ડિયાની ચિંતા

હાર્દિક પંડ્યા હાલમાં પગના પિંડીના અંદરના ભાગમાં થયેલી સ્ટ્રેસ ઈજામાંથી સાજો થઈ રહ્યો છે. આ પહેલાં પણ તેને પીઠની સમસ્યા થઈ હતી અને સર્જરી કરાવવી પડી હતી. સતત ઈજાઓને કારણે તેની ફિટનેસ પર અસર પડી રહી છે. બેંગલુરુના સેન્ટર ઑફ એક્સલન્સમાં તેની રિકવરી પર ધ્યાન આપવામાં આવી રહ્યું છે. જોકે તે પુરી રીતે ફિટ થઈને ક્યારે મેદાન પર પાછો ફરશે તેની ચોક્કસ તારીખ હજુ નક્કી થઈ નથી.

ત્રણ અઠવાડિયા પછી શરૂ કરશે જોગિંગ

હાર્દિકની રિકવરી માટે તબક્કાવાર યોજના બનાવવામાં આવી છે. મળતી માહિતી પ્રમાણે તેને હજુ લગભગ ત્રણ અઠવાડિયા પછી જોગિંગ શરૂ કરવાની આશા છે. ત્યારબાદના આઠ અઠવાડિયા દરમિયાન તેની દોડવાની કસરત ધીમે ધીમે વધારવામાં આવશે. આ પ્રક્રિયા દરમિયાન તેના શરીર પર પડતા ભાર અને ફિટનેસ પર નજર રાખવામાં આવશે. જોગિંગ શરૂ કર્યા પછી પણ તેને મેચ રમવા માટે તૈયાર થતાં વધુ સમય લાગી શકે છે.

T20 વર્લ્ડ કપ ફાઇનલ બાદ મેદાનથી દૂર

હાર્દિક પંડ્યા છેલ્લે T20 વર્લ્ડ કપની ફાઇનલમાં ભારત તરફથી રમ્યો હતો. ન્યૂઝીલેન્ડ સામે અમદાવાદમાં રમાયેલી આ મેચમાં તેણે 13 બોલમાં 18 રન બનાવ્યા હતા અને ચાર ઓવરમાં એક વિકેટ પણ લીધી હતી. હાર્દિક બેટિંગ અને બોલિંગ બંનેમાં યોગદાન આપી શકે છે. આ જ કારણ છે કે ભારતીય ટીમમાં તેનું સ્થાન ખાસ છે. તેની ગેરહાજરીમાં ટીમના સંતુલન પર અસર પડી શકે છે.

આ પણ વાંચોઃ સંજુ સેમસનની જબરદસ્ત ફેનગિરી! રજનીકાંતની ‘જેલર 2’ જોવા માટે આખું સિનેમા હોલ કર્યું બુક

વનડે વર્લ્ડ કપની તૈયારીને પણ અસર થઈ શકે

ઓક્ટોબર 2027માં યોજાનારા વનડે વર્લ્ડ કપને ધ્યાનમાં રાખીને હાર્દિકની ફિટનેસ ભારતીય ટીમ માટે મહત્ત્વની બની છે. તે ઝડપી બોલિંગની સાથે ઉપયોગી બેટિંગ પણ કરી શકે છે. તેની ગેરહાજરીમાં નીતિશ કુમાર રેડ્ડી અને સૂર્યાંશ શેડગે જેવા ખેલાડીઓને તક મળી રહી છે. જોકે, હાર્દિક જેવો અનુભવ અને બંને વિભાગમાં યોગદાન આપતો ખેલાડી મળવો ટીમ માટે પડકારરૂપ છે. વર્લ્ડ કપ પહેલાં તે સંપૂર્ણ ફિટ થઈ જાય તે ભારતીય ટીમ માટે જરૂરી રહેશે.

IPL 2027 પહેલાં વાપસી શક્ય છે કે નહીં?

હાર્દિકની હાલની રિકવરીને જોતાં સૈયદ મુશ્તાક અલી ટ્રોફી અને વિજય હજારે ટ્રોફી જેવી ઘરેલુ સ્પર્ધાઓમાં રમવું મુશ્કેલ બની શકે છે. તેની ફિટનેસમાં સુધારો કેટલો ઝડપથી થાય છે તેના પર વાપસીનો સમય આધારિત રહેશે. IPL 2027 પહેલાં તે મેચ રમવા માટે ફિટ થઈ શકશે કે નહીં તે અત્યારે નિશ્ચિત નથી. જો રિકવરી યોજના પ્રમાણે આગળ વધે તો IPL તેની વાપસી માટે સંભવિત તક બની શકે છે. જોકે, અંતિમ નિર્ણય તેની તબીબી સ્થિતિ અને ફિટનેસના મૂલ્યાંકન બાદ જ લેવાશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ