નેશનલ / શિવા શર્મા હત્યા કેસ: નેપાળથી નાગપુર... 11 દિવસ સુધી પોલીસને ચકમો આપતી રહી શ્રદ્ધા દુબે, આ રીતે થઈ ધરપકડ

લખનઉના કારોબારી શિવા શર્માની શંકાસ્પદ મૃત્યુના માLલે મોડેલ અને સોશિયલ મીડિયા ઇન્ફ્લુએન્સર શ્રદ્ધા દુબે, તેની બહેન રશ્મિ અને ડ્રાઇવર તનવીરને મહારાષ્ટ્રના નાગપુરથી ઝડપી લેવામાં આવ્યા છે. 9 ઓક્ટોબરથી 20 ઓક્ટોબર સુધીની આ ફરાર સમયરેખા અને આ પ્રકરણ સાથે જોડાયેલા તમામ મહાસવાલો વિશે વિગતવાર જાણીએ.

લખનઉના ઉદ્યોગપતિ અને કેફે સંચાલક શિવા શર્માની સંદિગ્ધ મોત મામલે ફરાર ચાલી રહેલી મોડેલ અને સોશિયલ મીડિયા ઇન્ફ્લુએન્સર શ્રદ્ધા દુબેની 20 ઓક્ટોબર 2026ના રોજ મહારાષ્ટ્રના નાગપુરથી ધરપકડ કરવામાં આવી હતી. ઉત્તર પ્રદેશ એસટીએફ, લખનઉ પોલીસ અને નાગપુર પોલીસની સંયુક્ત કાર્યવાહી દરમિયાન શ્રદ્ધાની સાથે તેની બહેન રશ્મિ દુબે અને ડ્રાઇવર તનવીર અલી ઉર્ફે દાનિશ પણ પકડાઈ ગયા હતા. આ ત્રણેય વિરુદ્ધ લખનઉના હઝરતગંજ પોલીસ સ્ટેશનમાં શિવા શર્માની હત્યાના આરોપસર ગુનો નોંધાયેલો છે. આશરે 11 દિવસ સુધી પોલીસ ઉત્તર પ્રદેશથી લઈને નેપાળ સુધી તેમના સુરાગ મેળવવા માટે ખાખાખોળા કરતી રહી. આ દરમિયાન નેપાળમાં છુપાઈ રહેવા, લખનઉ પરત ફરવા, વકીલને મળવા અને આગ્રાના રસ્તે નાગપુર પહોંચવાના અહેવાલો સામે આવ્યા હતા.

શ્રદ્ધા દુબેની ફરાર અવસ્થા દરમિયાન પોલીસને અલગ-અલગ લોકેશનની માહિતીઓ મળતી રહી હતી. શરૂઆતમાં તેના નેપાળ ભાગી ગયા હોવાની જાણકારી સામે આવી, ત્યારબાદ તે ઉત્તર પ્રદેશ પરત ફરીને આગ્રા પહોંચી હોવાના સમાચાર મળ્યા. આ પછી 20 ઓક્ટોબરે નાગપુરના એક ફ્લેટમાંથી તેની ધરપકડ કરવામાં આવી હતી. પોલીસના જણાવ્યા અનુસાર, આરોપીઓની ગતિવિધિઓ અને આગ્રામાં ભાડે લેવાયેલી ટેક્સીમાંથી મળેલા પુરાવાઓએ તપાસને આગળ ધપાવવામાં મોટી મદદ કરી હતી. જો કે, આ 11 દિવસો દરમિયાન તેમના દરેક ઠેકાણા, મુસાફરીનો પૂરો રસ્તો અને નાગપુરમાં તેમને કોણે આશરો આપ્યો હતો, તેની સંપૂર્ણ માહિતી હજુ સત્તાવાર રીતે બહાર આવવાની બાકી છે.

9 ઓક્ટોબર 2026: શિવા શર્માની મોત બાદ ફરાર

તે સાંજ લખનઉના હઝરતગંજ વિસ્તારમાં આવેલા બાલુ અડ્ડા સ્થિત અવધ ગ્રીન અપાર્ટમેન્ટની ચોથા માળેથી નીચે પટકાવાના કારણે 28 વર્ષીય કારોબારી શિવા શર્મા ગંભીર રીતે ઘાયલ થયા હતા. તેમને કેજીએમયુ ટ્રોમા સેન્ટર લઈ જવામાં આવ્યા, જ્યાં રાત્રે આશરે 9 વાગ્યે તેમનું મોત નીપજ્યું હતું. ત્યારબાદ તેમની માતા રંજના શર્માએ શ્રદ્ધા દુબે અને અન્ય લોકો વિરુદ્ધ હત્યાનો ગંભીર આરોપ લગાવ્યો હતો. પોલીસે આ મામલે હત્યાનો ગુનો નોંધીને તપાસ શરૂ કરી હતી. તપાસ દરમિયાન શ્રદ્ધા, તેની બહેન રશ્મિ દુબે અને ડ્રાઇવર તનવીર અલી ઉર્ફે દાનિશની ગતિવિધિઓ પોલીસના રડાર પર આવી ગઈ હતી. પોલીસ તપાસ મુજબ આ ત્રણેય ઘટના બનતાની સાથે જ લખનઉ છોડીને નાસી છૂટ્યા હતા.

9-10 ઓક્ટોબર: લખનઉથી રૂપઈડીહા બોર્ડર અને પછી નેપાળ

મહિતી અનુસાર, શિવાના મોત બાદ શ્રદ્ધા દુબે પોતાની સ્કોર્પિયો કારમાં બહેન રશ્મિ અને ડ્રાઇવર તનવીર સાથે લખનઉથી રવાના થઈ હતી. તેમની ગાડી ચોક અને પક્કા પુલના રસ્તે સીતાપુર થઈને બહરાઈચ જિલ્લાના રૂપૈડીહા બોર્ડર સુધી પહોંચી હતી. 10 ઓક્ટોબરની સવારે આશરે 6:10 થી 6:20 વાગ્યાની વચ્ચે ગાડી સરહદ પાસે આવેલી કસ્ટમ ઓફિસની પાર્કિંગમાં ઊભેલી મળી આવી હતી. આ પછી પોલીસને આશંકા ગઈ કે ત્રણેય જણા ચાલીને સરહદ પાર કરીને નેપાળ જતા રહ્યા છે. બોર્ડર નજીક વાહન મળી આવ્યા બાદ તપાસ એજન્સીઓએ મોબાઈલ સર્વેલન્સ અને અન્ય ટેકનિકલ સુરાગના માધ્યમથી તેમની શોધખોળ વધુ તેજ બનાવી દીધી હતી.

10-15 ઓક્ટોબર: નેપાળમાં ક્યાં છુપાઈ હતી શ્રદ્ધા?

નેપાળ પહોંચ્યા બાદ શ્રદ્ધાના અસલી લોકેશનને લઈને અલગ-અલગ અહેવાલો સામે આવ્યા હતા. કેટલાક અહેવાલોમાં નેપાળના બાંકે અને સુરખેતનો ઉલ્લેખ કરવામાં આવ્યો હતો, જ્યારે અન્ય સમાચારોમાં પોખરામાં તેની ઉપસ્થિતિ હોવાની વાત કહેવામાં આવી હતી. પોલીસે આ માહિતીના આધારે તપાસ હાથ ધરી અને નેપાળ પોલીસનો સંપર્ક સાધ્યો હતો. પરંતુ આ તમામ જગ્યાઓ પર શ્રદ્ધા રોકાઈ હોવાની સ્વતંત્ર પુષ્ટિ થઈ શકી ન હતી, તેથી તેને તેના પ્રમાણભૂત ઠેકાણા માની શકાય નહીં. આ દરમિયાન પોલીસે શ્રદ્ધા, રશ્મિ અને તનવીરની ધરપકડ કરવા માટે ઇનામ જાહેર કર્યું હતું, જેને પાછળથી વધારીને 50 હજાર રૂપિયા કરી દેવામાં આવ્યું હતું.

વીડિયો જાહેર કરીને ખુદને ગણાવી બેકકસૂર

પોલીસની શોધખોળ વચ્ચે શ્રદ્ધા દુબેના કેટલાક વીડિયો સોશિયલ મીડિયા પર વાયરલ થયા હતા. આ વીડિયોમાં તેણે પોતાને નિર્દોષ ગણાવી હતી અને શિવા શર્માના મોતને હત્યાના બદલે આત્મહત્યા કરાર આપી હતી. શ્રદ્ધાનો દાવો હતો કે શિવા ભારે દેવા અને માનસિક તણાવથી પરેશાન હતો. તેણે એવી પણ માંગણી કરી હતી કે અપાર્ટમેન્ટના સીસીટીવી ફૂટેજ સાર્વજનિક કરવામાં આવે, જેથી ઘટનાનું સાચું સત્ય બહાર આવી શકે. જો કે, વીડિયોમાં દેખાતી જગ્યાઓથી તેના વાસ્તવિક લોકેશનની કોઈ પુષ્ટિ થઈ શકી ન હતી. પોલીસ આ વીડિયો અને તેની સાથે જોડાયેલા ડિજિટલ પુરાવાની ઊંડાણપૂર્વક તપાસ કરી રહી છે.

17-18 ઓક્ટોબર: નેપાળથી વાપસી અને વકીલ સાથે મુલાકાત

ફરાર અવસ્થા દરમિયાન શ્રદ્ધા નેપાળથી ફરીથી ઉત્તર પ્રદેશ પરત ફરી હોવાની માહિતી મળી. ઉપલબ્ધ જાણકારી મુજબ, તેણે મહારાજગંજ સરહદના રસ્તે ભારતમાં પ્રવેશ કર્યો અને ત્યારબાદ લખનઉ પહોંચી હતી. કેટલાક અહેવાલોમાં તેની ઓળખ છુપાવવા માટે બુરખો પહેરીને મુસાફરી કર્યાનો ઉલ્લેખ પણ કરવામાં આવ્યો છે. 18 ઓક્ટોબરે લખનઉ હાઈકોર્ટ પરિસરમાં વકીલોને મળવા અને કાનૂની દસ્તાવેજો પર સહી કરવાના અહેવાલો પણ સામે આવ્યા હતા. જો કે, તેની વાપસીનો ચોક્કસ સરહદી માર્ગ અને સમગ્ર પ્રવાસની સત્તાવાર પુષ્ટિ હજુ સુધી થઈ નથી. દરમિયાન આ મામલાની તપાસમાં બેદરકારી દાખવવા બદલ કેટલાક પોલીસ અધિકારીઓ સામે પણ શિસ્તભંગની કાર્યવાહી કરવામાં આવી હતી.

19 ઓક્ટોબર: આગ્રાથી સહારનપુર!

લખનઉમાં વકીલ સાથે મુલાકાત કર્યા બાદ શ્રદ્ધાના આગ્રા પહોંચવાના સમાચાર આવ્યા. અહેવાલો અનુસાર, તેણે લખનઉ-આગ્રા એક્સપ્રેસવેનો રસ્તો પકડ્યો હતો અને આગ્રાની એક હોટલમાં રોકાઈ હતી. માહિતી મુજબ, શ્રદ્ધા પોતાની બહેન સાથે આગ્રાની ઓમ પેલેસ હોટલ પહોંચી હતી અને હોટલમાં તેની એન્ટ્રી દેવરાજ યાદવ નામના વ્યક્તિ દ્વારા કરાવવામાં આવી હતી. અહેવાલમાં એવું પણ જણાવવામાં આવ્યું કે તે આશરે 24 કલાક સુધી હોટલના રૂમમાં રહી હતી. આ દરમિયાન તેનું લોકેશન શોધવું પોલીસ માટે એક મોટો પડકાર બની રહ્યો હતો. ત્યારબાદ તેના પશ્ચિમ ઉત્તર પ્રદેશના સહારનપુર તરફ જવાના અહેવાલો પણ સામે આવ્યા હતા.

20 ઓક્ટોબર: આગ્રાથી નાગપુર સુધી પહોંચવાનો સુરાગ

આગ્રા બાદ શ્રદ્ધા, તેની બહેન અને ડ્રાઇવરના નાગપુર પહોંચવાની જાણકારી સામે આવી. શરૂઆતના અહેવાલો મુજબ, આરોપીઓએ આગ્રાથી વિમાનના માધ્યમથી નાગપુરની યાત્રા કરી હતી. જો કે, તેઓ કઈ ફ્લાઇટથી ગયા, ટિકિટ કોણે બુક કરી અને નાગપુરમાં ફ્લેટની વ્યવસ્થા કોણે કરી હતી, તેનો કોઈ વિગતવાર સત્તાવાર અહેવાલ સામે આવ્યો નથી. તપાસ એજન્સીઓને આગ્રામાં ભાડે લેવાયેલી ટેક્સીમાંથી મહત્વના સુરાગ મળ્યા હતા, જેના આધારે પોલીસ નાગપુર સુધી પહોંચી શકી. ટેકનિકલ ઇનપુટ્સ અને અન્ય જાણકારીઓની મદદથી યુપી એસટીએફ અને લખનઉ પોલીસે નાગપુર પોલીસ સાથે મળીને સંયુક્ત ઓપરેશન પાર પાડ્યું હતું.

20 ઓક્ટોબરે નાગપુરના એક ફ્લેટ પર કરવામાં આવેલી સંયુક્ત કાર્યવાહી દરમિયાન શ્રદ્ધા દુબે, તેની બહેન રશ્મિ દુબે અને ડ્રાઇવર તનવીર અલી ઉર્ફે દાનિશની ધરપકડ કરી લેવામાં આવી. યુપી એસટીએફ અને લખનઉ પોલીસની આ કાર્યવાહીમાં નાગપુર પોલીસે પણ ભરપૂર સહયોગ આપ્યો હતો. આ સાથે જ આશરે 11 દિવસથી ચાલી રહેલી ભાગદોડ અને શોધખોળનો અંત આવ્યો. હવે તપાસ દરમિયાન આરોપીઓની પૂછપરછ કરીને એ જાણવાનો પ્રયાસ કરવામાં આવશે કે તેઓ નેપાળથી ભારત ક્યારે અને કયા રસ્તે પાછા ફર્યા, આગ્રાથી નાગપુર સુધી કેવી રીતે પહોંચ્યા અને ફરાર થયા દરમિયાન તેમને કોણે-કોણે મદદ પહોંચાડી હતી.

પોલીસને કઈ રીતે ચકમો આપતી રહી શ્રદ્ધા?

શ્રદ્ધાના ફરાર રહેવા પાછળ સૌથી મોટું પાસું અલગ-અલગ શહેરોમાંથી સામે આવેલા સુરાગ રહ્યા છે. શરૂઆતમાં પોલીસને નેપાળમાં તેના છુપાયેલા હોવાની માહિતી મળી, ત્યારબાદ તે ઉત્તર પ્રદેશ પરત ફરીને લખનઉમાં વકીલને મળી હોવાના સમાચાર આવ્યા. આ પછી આગ્રાની હોટલ અને ટેક્સી સાથે જોડાયેલા પુરાવાઓએ તપાસને નાગપુર સુધી પહોંચાડવામાં મદદ કરી. મીડિયા રિપોર્ટ્સમાં એવું પણ સામે આવ્યું કે શ્રદ્ધા સતત પોતાના લોકેશનો બદલી રહી હતી. જો કે, તે હજુ સ્પષ્ટ નથી કે દરેક પડાવ પર તેને કોણે મદદ કરી અને પોલીસની ગતિવિધિઓની આગોતરી માહિતી તેને કઈ રીતે મળતી રહેતી હતી. આ તમામ સવાલોના જવાબો ઊંડાણપૂર્વકની તપાસ અને આરોપીઓની સઘન પૂછપરછ બાદ જ બહાર આવી શકશે.

શું છે શિવા શર્માની મોતના મામલાની હકીકત?

લખનઉના અલીગંજ સ્થિત કપૂરથલા વિસ્તારના નિવાસી શિવા શર્મા ચિકનનો વેપાર અને કેફે સંચાલન સાથે સંકળાયેલા હતા. તે મોડેલ અને સોશિયલ મીડિયા ઇન્ફ્લુએન્સર શ્રદ્ધા દુબે સાથે લિવ-ઇન રિલેશનશિપમાં રહેતા હતા. 9 ઓક્ટોબરના રોજ હઝરતગંજ સ્થિત બાલુ અડ્ડા વિસ્તારમાં આવેલા અવધ ગ્રીન અપાર્ટમેન્ટની ચોથા માળેથી નીચે પટકાવાના કારણે તેમનું રહસ્યમય સંજોગોમાં મોત થયું હતું. શિવાની માતા રંજના શર્માની ફરિયાદના આધારે પોલીસે શ્રદ્ધા, તેની બહેન રશ્મિ અને અન્ય લોકો વિરુદ્ધ હત્યાનો ગુનો નોંધ્યો છે. મૃતકના પરિવારજનોનો ગંભીર આરોપ છે કે શિવાને પહેલા માનસિક અને શારીરિક રીતે પ્રતાડિત કરવામાં આવ્યા અને પછી ચોથા માળેથી નીચે ધક્કો આપીને ફેંકી દેવામાં આવ્યા હતા.

વધુ વાંચો : VIDEO : સાડી પહેરીને IPS અંકિતા શર્માએ ચલાવી AK-47, વાયરલ થયો ધમાકેદાર વીડિયો

પોસ્ટમોર્ટમ દરમિયાન શિવાના શરીર પર આશરે 11 જેટલી ઈજાઓ હોવાનો ઉલ્લેખ કરવામાં આવ્યો હોવાનું પણ સામે આવ્યું છે. પરિવારે શ્રદ્ધા પર મારઝૂડ કરવા અને જાનથી મારી નાખવાની ધમકીઓ આપવાના આક્ષેપો કર્યા છે. બીજી બાજુ, શ્રદ્ધાએ પોતાના વિડિયો મારફતે દાવો કર્યો હતો કે શિવા ભારે દેવા અને માનસિક તણાવથી ગ્રસ્ત હતો અને તેણે કોઈની હત્યા નહીં પરંતુ આત્મહત્યા કરી છે. તેણે સીસીટીવી ફૂટેજની ન્યાયિક તપાસ કરવાની માંગ પણ કરી હતી. હાલ પોલીસ મોબાઈલ ચેટ, કોલ ડિટેઈલ્સ, ઓડિયો ક્લિપ્સ, સીસીટીવી ફૂટેજ અને મેડિકલ રિપોર્ટ સહિતના તમામ પુરાવાઓની ગંભીરતાથી તપાસ કરી રહી છે. આ મોત હત્યા હતી કે આત્મહત્યા, તેનો અંતિમ નિર્ણય પોલીસ તપાસ અને અદાલત જ નક્કી કરશે, કારણ કે માત્ર ધરપકડ થવાથી કોઈ આરોપી સાબિત થઈ જતું નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ