વિશ્વ / હિન્દુ દીકરીઓ પર અત્યાચારના મુદ્દે UNમાં ભારતે પાકિસ્તાનને ઘેર્યું, જાણો શું કહ્યું ?

વિશ્વના સૌથી મોટા આંતરરાષ્ટ્રીય મંચ પર જ્યારે પાકિસ્તાને ભારતને લઘુમતીઓના અધિકારો અંગે પાઠ ભણાવવાનો પ્રયાસ કર્યો, ત્યારે ભારતે એવો જવાબ આપ્યો કે પાકિસ્તાનના પોતાના રેકોર્ડ પર જ સવાલો ઊભા થઈ ગયા. સંયુક્ત રાષ્ટ્ર મહાસભા (UNGA)ની ત્રીજી સમિતિમાં પાકિસ્તાને ભારતની આંતરિક બાબતોનો મુદ્દો ઉઠાવ્યો હતો. જોકે ભારતે પાકિસ્તાનના આરોપોને ફગાવીને તેને પોતાના દેશમાં લઘુમતીઓની સ્થિતિ પર ધ્યાન આપવાની સલાહ આપી હતી. ભારતે સ્પષ્ટ કર્યું કે લઘુમતીઓના અધિકારોનું રક્ષણ કરવું દરેક દેશની પોતાની જવાબદારી છે અને કોઈપણ દેશે બીજા દેશની આંતરિક બાબતોમાં દખલ કરવી જોઈએ નહીં.

સંયુક્ત રાષ્ટ્રમાં ભારતનું પ્રતિનિધિત્વ કરતા પ્રથમ સચિવ રઘુ પુરીએ પાકિસ્તાનને આકરો જવાબ આપ્યો હતો. તેમણે જણાવ્યું કે ભારત વિશ્વના સૌથી મોટા બહુધાર્મિક, બહુભાષી અને વિવિધ સંસ્કૃતિઓ ધરાવતા દેશોમાંનો એક છે. ભારતમાં અલગ અલગ ધર્મ, ભાષા અને સંસ્કૃતિના લોકો સદીઓથી સાથે રહે છે અને આ વિવિધતા ભારતીય સભ્યતાનો મહત્વનો ભાગ છે. ભારતીય બંધારણમાં ધાર્મિક અને ભાષાકીય લઘુમતીઓના અધિકારોનું રક્ષણ કરવા માટે મજબૂત જોગવાઈઓ કરવામાં આવી છે. તેમણે ભારપૂર્વક જણાવ્યું કે દરેક દેશે પોતાના કાયદા અને બંધારણ મુજબ લઘુમતીઓના અધિકારોની સુરક્ષા કરવાની જવાબદારી નિભાવવી જોઈએ.

આંતરરાષ્ટ્રીય મંચનો ઉપયોગ ભારત વિરુદ્ધ ખોટો પ્રચાર

પાકિસ્તાન પર નિશાન સાધતા રઘુ પુરીએ આરોપ લગાવ્યો કે પાકિસ્તાની પ્રતિનિધિમંડળ સંયુક્ત રાષ્ટ્ર જેવા આંતરરાષ્ટ્રીય મંચનો ઉપયોગ ભારત વિરુદ્ધ ખોટો પ્રચાર કરવા માટે કરી રહ્યું છે. તેમણે પાકિસ્તાનની નબળી પડતી અર્થવ્યવસ્થા, કાયદો અને વ્યવસ્થાની સ્થિતિ તેમજ માનવાધિકાર ઉલ્લંઘનના મુદ્દાઓ ઉઠાવ્યા હતા. પાકિસ્તાનમાં હિન્દુઓ સહિત ધાર્મિક લઘુમતીઓ સામે થતા અત્યાચાર અંગે પણ લાંબા સમયથી સવાલો ઊભા થઈ રહ્યા છે. ખાસ કરીને હિન્દુ યુવતીઓના કથિત અપહરણ, બળજબરીથી ધર્મ પરિવર્તન અને લગ્નની ઘટનાઓને લઈને ચિંતા વ્યક્ત કરવામાં આવી છે. પાકિસ્તાનના પંજાબ પ્રાંતના પૂર્વ ગવર્નર સલમાન તાસીરની વર્ષ 2011માં ઈશનિંદા કાયદાનો વિરોધ કરવા બદલ હત્યા કરવામાં આવી હતી. આ ઘટનાએ પણ પાકિસ્તાનમાં ધાર્મિક અસહિષ્ણુતાનો મુદ્દો ચર્ચામાં લાવ્યો હતો.

આ અંગે ભારતના વલણમાં કોઈ ફેરફાર થયો

જમ્મુ-કાશ્મીરના મુદ્દે પણ ભારતે પોતાનું વલણ સ્પષ્ટ કર્યું હતું. રઘુ પુરીએ જણાવ્યું કે જમ્મુ-કાશ્મીર ભારતનો અભિન્ન અને અવિભાજ્ય ભાગ છે અને આ અંગે ભારતના વલણમાં કોઈ ફેરફાર થયો નથી. ભારતે કહ્યું કે હવે એકમાત્ર મુદ્દો પાકિસ્તાનના ગેરકાયદેસર કબજા હેઠળ રહેલા ભારતીય પ્રદેશને મુક્ત કરાવવાનો છે. ભારતે પાકિસ્તાનને અન્ય દેશોની આંતરિક બાબતોમાં દખલ કરવાને બદલે પોતાના દેશમાં માનવાધિકાર, લઘુમતીઓની સુરક્ષા અને કાયદો-વ્યવસ્થાની સ્થિતિ સુધારવા પર ધ્યાન આપવાનો સંદેશ આપ્યો હતો. સંયુક્ત રાષ્ટ્રના મંચ પર ભારતે પાકિસ્તાન દ્વારા ઉઠાવવામાં આવતા કાશ્મીરના મુદ્દાનો ફરી એકવાર વિરોધ કર્યો હતો.

ધાર્મિક સ્વતંત્રતા અને માનવાધિકારના મુદ્દે જવાબ આપ્યો

આ અગાઉ પણ સંયુક્ત રાષ્ટ્રમાં ભારતે પાકિસ્તાનને ધાર્મિક સ્વતંત્રતા અને માનવાધિકારના મુદ્દે જવાબ આપ્યો હતો. ભારતના પ્રથમ સચિવ ભાવિકા મંગલાનંદને સ્થળાંતર કરનારાઓના માનવાધિકાર અંગે યુએનના વિશેષ સંવાદદાતાના અહેવાલ સામે વાંધો ઉઠાવ્યો હતો. તેમણે અહેવાલ તૈયાર કરવાની પદ્ધતિ પર સવાલ કરતા જણાવ્યું હતું કે તેમાં કોવિડ-19 મહામારી દરમિયાન થયેલી ભૂલો માટે માત્ર ગ્લોબલ સાઉથ એટલે કે વિકાસશીલ દેશોને જવાબદાર ઠેરવવામાં આવ્યા હોય તેવું લાગે છે. બીજી તરફ વિકસિત દેશોમાં મહામારી દરમિયાન સર્જાયેલી ગંભીર પરિસ્થિતિઓ અને ત્યાં થયેલી ભૂલોની પૂરતી નોંધ લેવામાં આવી નથી. તેમણે આવા અહેવાલોમાં તમામ દેશો માટે સમાન માપદંડ રાખવાની જરૂરિયાત પર ભાર મૂક્યો હતો.

આ પણ વાંચો : રિયાધ અને દમ્મામની ફ્લાઈટ્સ દિવાળી સુધી રદ, મિડલ ઈસ્ટમાં તણાવને પગલે એર ઈન્ડિયાનો નિર્ણય

આતંકવાદના મુદ્દે પણ ભારતે આંતરરાષ્ટ્રીય સમુદાયને મહત્વનો સંદેશ આપ્યો હતો. ભાવિકા મંગલાનંદને કેટલાક માનવાધિકાર હિમાયતીઓના વલણની ટીકા કરતા જણાવ્યું હતું કે આતંકવાદીઓના અધિકારોની વાત કરતી વખતે નિર્દોષ પીડિતો અને તેમના પરિવારોની વેદનાને ભૂલી જવી જોઈએ નહીં. તેમણે આતંકવાદને આશ્રય આપતા દેશોના બેવડા વલણ સામે સવાલ ઉઠાવ્યા હતા. ભારતે સ્પષ્ટ કર્યું કે માનવાધિકારના નામે આતંકવાદને યોગ્ય ઠેરવવાનો પ્રયાસ સ્વીકારી શકાય નહીં. આતંકવાદનો ભોગ બનેલા નિર્દોષ લોકો અને તેમના પરિવારોને ન્યાય મળે તે આંતરરાષ્ટ્રીય સમુદાયની પ્રાથમિકતા હોવી જોઈએ. આ રીતે ભારતે સંયુક્ત રાષ્ટ્રના મંચ પરથી લઘુમતી અધિકારો, કાશ્મીર અને આતંકવાદ જેવા મુદ્દાઓ પર પોતાનું વલણ મજબૂતીથી રજૂ કર્યું હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ