સ્થાનિક સ્વરાજ્ય ચૂંટણી / આજે રાજ્યમાં મતદાન, એક ક્લિકમાં જાણો કઈ બેઠકો પર થશે મતદાન અને કઈ જાહેર થઈ બિનહરીફ!

Gujarat Local Body Election: રાજ્યમાં આજે સ્થાનિક સ્વરાજ્યની ચૂંટણીનો મહાપર્વ ઉજવાઈ રહ્યો છે. મનપા, નગરપાલિકા, જિલ્લા પંચાયત અને તાલુકા પંચાયત માટે મતદાન સવારે 7 વાગ્યાથી સાંજે 6 વાગ્યા સુધી યોજાશે. સમગ્ર રાજ્યમાં મતદારોમાં ઉત્સાહ જોવા મળી રહ્યો છે અને લોકો પોતાના મતાધિકારનો ઉપયોગ કરવા માટે મતદાન મથકો તરફ આગળ વધી રહ્યા છે. ગરમીને ધ્યાનમાં રાખીને સવારથી જ મતદાતાઓ મત્ત આપવા માટે પહોંચ્યા છે. આ ચૂંટણી સ્થાનિક સ્તરે વિકાસ અને શાસન માટે ખૂબ જ મહત્વપૂર્ણ માનવામાં આવે છે, જેના કારણે દરેક નાગરિક માટે મતદાન કરવું જરૂરી બને છે.

મનપા અને નગરપાલિકાની ચૂંટણીની વિગતો

રાજ્યમાં કુલ 15 મનપા અને 84 નગરપાલિકામાં મતદાન યોજાઈ રહ્યું છે. મનપાની 261 વોર્ડની 1001 બેઠકો માટે મતદાન થશે. જેમાં 3145 ઉમેદવારો મેદાનમાં છે. તેમાં 43 બેઠકો પહેલેથી જ બિનહરીફ જાહેર થઈ ચૂકી છે. બીજી તરફ 84 નગરપાલિકાની 603 વોર્ડમાં 2239 બેઠકો માટે મતદાન યોજાશે. આ નગરપાલિકાઓમાં કુલ 5441 ઉમેદવારો ચૂંટણી લડી રહ્યા છે. નોંધનીય છે કે 656 વોર્ડમાંથી 53 વોર્ડ સંપૂર્ણ બિનહરીફ જાહેર થયા છે અને કુલ 385 બેઠકો પહેલેથી જ બિનહરીફ જાહેર થઈ ગઈ છે. આ સાથે 11 નગરપાલિકાની 13 બેઠકો માટે પેટાચૂંટણી પણ યોજાઈ રહી છે. જેમાં 21 ઉમેદવારો મેદાનમાં છે.

ચૂંટણીનું લાઈવ કવરેજ જોવા માટે નીચે આપેલી લિન્ક પર ક્લિક કરો.

જિલ્લા પંચાયત અને તાલુકા પંચાયતની ચૂંટણી

જિલ્લા અને તાલુકા સ્તરે પણ ચૂંટણીનું મહત્વ ઓછું નથી. રાજ્યની 34 જિલ્લા પંચાયતોની 1038 બેઠકો માટે મતદાન યોજાશે. જેમાં 3059 ઉમેદવારો મેદાનમાં છે. આમાંથી 52 બેઠકો બિનહરીફ જાહેર થઈ છે. તેમજ 260 તાલુકા પંચાયતોની 4976 બેઠકો માટે મતદાન થશે. જેમાં 13871 ઉમેદવારો ચૂંટણી લડી રહ્યા છે. તાલુકા પંચાયતની 252 બેઠકો બિનહરીફ જાહેર થઈ છે. કુલ મળીને રાજ્યમાં 9263 બેઠકો માટે 25537 ઉમેદવારો મેદાનમાં છે. જ્યારે 736 બેઠકો અગાઉથી બિનહરીફ જાહેર થઈ ચૂકી છે.

મતદાન વ્યવસ્થા અને સુરક્ષા વ્યવસ્થા મજબૂત

આ ચૂંટણીને ધ્યાનમાં રાખીને રાજ્યમાં કુલ 48,450 મતદાન મથકો બનાવવામાં આવ્યા છે. તેમાં 14,275 મથકો સંવેદનશીલ અને 2,196 મથકો અતિ સંવેદનશીલ તરીકે ઓળખવામાં આવ્યા છે. મતદાન પ્રક્રિયા શાંતિપૂર્ણ અને નિષ્પક્ષ રીતે પૂરી થાય તે માટે 92,583 પોલીસ, જીઆરડી અને હોમગાર્ડના જવાનો તૈનાત કરવામાં આવ્યા છે. ઉપરાંત, 2,64,715 પોલિંગ સ્ટાફ આ કામગીરીમાં જોડાયેલા છે. મતદાન માટે 1,22,951 બેલેટ યુનિટ (BU) અને 1,08,188 કંટ્રોલ યુનિટ (CU) મશીનોનો ઉપયોગ કરવામાં આવી રહ્યો છે.

આ પણ વાંચો: રાજકોટમાં વૃદ્ધા પર ST બસ ફરી વળી, રોડ ક્રોસ કરવા જતાં અડફેટે લીધા, બંને ટાયર ફરી વળ્યા

મોટી સંખ્યામાં મતદારો કરશે મતાધિકારનો ઉપયોગ

આ ચૂંટણીમાં રાજ્યના કુલ 4 કરોડ 8 લાખ 16 હજાર 713 મતદારો પોતાના મતાધિકારનો ઉપયોગ કરશે તેવી અપેક્ષા છે. ગામથી લઈને શહેર સુધી લોકોમાં ચૂંટણીને લઈને ઉત્સાહ જોવા મળી રહ્યો છે. ચૂંટણી પ્રજાસત્તાકનો મહત્ત્વનો તહેવાર છે અને દરેક નાગરિક માટે પોતાની પસંદગીનો પ્રતિનિધિ પસંદ કરવાની તક છે. મતદારોને અપીલ કરવામાં આવી રહી છે કે તેઓ મતદાન મથકે જઈને અવશ્ય મતદાન કરે અને લોકશાહી મજબૂત બનાવવામાં પોતાનો ફાળો આપે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ