માવઠાનો માર / કેરી સહિત શક્કર ટેટીનો વળ્યો સોંથ, કમોસમી વરસાદે ફેરવી ખેતી પાકની 'પથારી', ખેડૂતો બન્યા લાચાર

બનાસકાંઠામાં પડેલા કમોસમી વરસાદથી ખેડૂતોને મોટાપાયે નુકસાન થયું છે. માવઠાને કારણે વિવિધ પાકો સાથે આંબાઓ પરની કેરીના પાકને પણ નુકસાન પહોંચ્યું છે. તો ટેટીના પાકને પણ મોટું નુકસાન થયું છે.

પાલનપુરમાં 500 જેટલા આંબાઓ પરની કેરીઓ ખરી

વરસાદ સાથે ભારે પવન ફૂંકાતા બનાસકાંઠાના પાલનપુરમાં 500 જેટલા આંબાઓ પરની કેરીઓ ખરી પડી છે. જેને કારણે આંબાવાડીના ઈજારેદારને લાખો રૂપિયાનું નુકસાન થયું છે. વિશાલ પટની અને તેમના પરિવારે આશરે 8 લાખ રૂપિયામાં આંબાવાડી ઈજારા પર રાખી હતી. આંબા પરની કેરીઓથી 15 લાખ રૂપિયા જેટલી આવક થવાની તેમને આશા હતી. પરંતુ ભારે પવન સાથે ખાબકેલા કમોસમી વરસાદે તેમની ચિંતા વધારી દીધી છે.

આ પણ વાંચો: અરવલ્લીના વિજ્ઞાનના શિક્ષકે કેરીની 35 જાતના છોડ વિકસાવ્યા, લાખ્ખો ખેડૂતો માટે બન્યા પ્રેરણાનો સ્ત્રોત

ટેટીના પાકમાં સોંથ વળ્યો

બનાસકાંઠામાં કમોસમી વરસાદથી ખેતી પાકમાં મોટા પાયે નુકસાન થયું છે. ટેટીના પાકને મોટું નુકસાન થયું છે. એક ખેડૂતે 18 વીઘા જમીનમાં વાવેલી ટેટીઓ બગડી ગઈ છે. તો ક્યાંક વરસાદને કારણે શક્કર ટેટી બગડવા લાગી છે, ત્યારે ખેડૂતને 8 લાખ રૂપિયાથી વધુના નુકસાનનો અંદાજ છે. સર્વે કરાવીને સરકાર વળતર અપાવે તેવી ખેડૂતોની માગ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ