VIDEO / ગુજરાતમાં ધોધમાર વરસાદ, જૂનાગઢ જળબંબાકાર, સોમનાથ-દ્વારકા હાઈવે થયો બંધ

રાજ્યમાં આજે સવારે 6થી 10 વાગ્યા દરમિયાન 48 તાલુકાઓમાં 1 મિમીથી લઈને 1 ઇંચ સુધીનો સામાન્ય વરસાદ નોંધાયો છે. હવામાન વિભાગે આજે ભારેથી અતિભારે વરસાદની આગાહી સાથે 6 જિલ્લામાં રેડ એલર્ટ, 8 જિલ્લામાં ઓરેન્જ એલર્ટ અને 6 જિલ્લામાં યલો એલર્ટ જાહેર કર્યું છે. જ્યારે બાકીના જિલ્લાઓમાં હળવાથી મધ્યમ વરસાદની સંભાવના વ્યક્ત કરવામાં આવી છે.

માછીમારોને દરિયો ન ખેડવાની સૂચના

આગાહીને ધ્યાનમાં રાખીને 7 જુલાઈ સુધી માછીમારોને દરિયો ન ખેડવાની સૂચના આપવામાં આવી છે. રાજ્યમાં અત્યાર સુધી સરેરાશ 13.27 ટકા વરસાદ નોંધાયો છે. ગત 24 કલાકમાં 14 તાલુકાઓમાં 5થી 10 ઇંચ, 85 તાલુકાઓમાં 1થી 5 ઇંચ અને 118 તાલુકાઓમાં 1 ઇંચ કરતાં ઓછો વરસાદ નોંધાયો છે. દક્ષિણ ગુજરાતમાં સિઝનનો સૌથી વધુ 17.11 ટકા વરસાદ નોંધાયો છે, જ્યારે સૌરાષ્ટ્રમાં 15.38 ટકા, પૂર્વ-મધ્ય ગુજરાતમાં 10.87 ટકા, ઉત્તર ગુજરાતમાં 7.79 ટકા અને કચ્છમાં માત્ર 0.40 ટકા વરસાદ નોંધાયો છે. જૂનાગઢના માંગરોળ તાલુકામાં માત્ર ત્રણ દિવસમાં જ સિઝનના 103 ટકા જેટલો વરસાદ નોંધાતા સમગ્ર સિઝનનું સરેરાશ પૂર્ણ થઈ ગયું છે.

સુરતમાં ભારે વરસાદના કારણે નુકસાન

સુરત જિલ્લાના ગ્રામ્ય વિસ્તારોમાં ભારે વરસાદના કારણે ભારે નુકસાન થયું છે. અરેઠના બૌધાન ગામે ધોધમાર વરસાદના કારણે રસ્તાનું ધોવાણ થયું છે. વાવ્યા ખાડી પર બનાવવામાં આવેલું ડાયવર્ઝન પાણીના જોરદાર પ્રવાહમાં ધોવાઈ ગયું છે. ડાયવર્ઝન ધોવાઈ જતાં બારડોલી, અરેઠ અને માંડવીને જોડતો મુખ્ય માર્ગ બંધ થઈ ગયો છે. જેના કારણે બારડોલી જવા માટે સ્થાનિક લોકોને અંદાજે 25 કિલોમીટરનો વધારાનો ફેરો મારવો પડી રહ્યો છે. છેલ્લા ઘણા સમયથી બૌધાન ગામે હાઈ બેરલ બ્રિજનું કામ ચાલી રહ્યું હોવાથી આ ડાયવર્ઝન બનાવવામાં આવ્યું હતું.

દ્વારકા-સોમનાથ હાઇવે વરસાદમાં ધોવાઈ

જૂનાગઢના માંગરોળ તાલુકામાં પણ ભારે વરસાદે નુકસાન પહોંચાડ્યું છે. દ્વારકા-સોમનાથ હાઇવે વરસાદમાં ધોવાઈ ગયો છે. નોળી નદી પરનો બ્રિજ ધોવાઈ જતાં રસ્તો બંધ કરવામાં આવ્યો છે. હુસેનાબાદ નજીક રસ્તાનું પણ ધોવાણ થતાં અનેક વાહનચાલકો રસ્તામાં અટવાઈ ગયા હતા. ભારે વરસાદના કારણે રસ્તાઓને વ્યાપક નુકસાન પહોંચ્યું હોવાનું સામે આવ્યું છે.

જાફરાબાદમાં દરિયો તોફાની બન્યો

અમરેલી જિલ્લાના જાફરાબાદમાં દરિયો તોફાની બન્યો છે. દરિયામાં ભારે કરંટ જોવા મળી રહ્યો છે અને અંદાજે 15 ફૂટ સુધીના મોજા ઉછળ્યા છે. સાવચેતીના ભાગરૂપે જાફરાબાદ બંદર પર 3 નંબરનું સિગ્નલ લગાવવામાં આવ્યું છે. હવામાન વિભાગની આગાહીને ધ્યાનમાં રાખીને માછીમારોને દરિયામાં ન જવાની સૂચના આપવામાં આવી છે.

તાપીનો કોઝ-વે પણ ઓવરફ્લો થયો

બીજી તરફ ભારે વરસાદના કારણે તાપીનો કોઝ-વે પણ ઓવરફ્લો થયો છે. સિઝનના પ્રથમ જ વરસાદમાં કોઝ-વેની સપાટી ભયજનક 6 મીટરની મર્યાદા વટાવીને 6.82 મીટર સુધી પહોંચી છે. તાપી નદીમાં નવા નીર આવતા આ સ્થિતિ સર્જાઈ છે.

ભારે વરસાદના કારણે કુદરતી સૌંદર્ય ખીલી ઉઠ્યું

તાપી જિલ્લામાં ભારે વરસાદના કારણે કુદરતી સૌંદર્ય ખીલી ઉઠ્યું છે. સોનગઢના ચીમેર ગામે ચીમેર ધોધ સક્રિય બનતા પહાડ પરથી વહેતા પાણીનો સુંદર ધોધ જોવા મળી રહ્યો છે. ધોધના મનમોહક દ્રશ્યો જોવા માટે સુરત, તાપી અને ડાંગ સહિતના વિસ્તારોમાંથી મોટી સંખ્યામાં સહેલાણીઓ ઉમટી રહ્યા છે.

તમામ તાલુકાઓમાં સારો વરસાદ નોંધાયો

ભાવનગર જિલ્લાના તમામ તાલુકાઓમાં સારો વરસાદ નોંધાયો છે. સૌથી વધુ વલ્લભીપુર તાલુકામાં 1.77 ઇંચ વરસાદ નોંધાયો છે. ઉમરાળામાં 1.73 ઇંચ, પાલિતાણામાં 1.54 ઇંચ, સિહોરમાં 1.22 ઇંચ અને ભાવનગર શહેરમાં 1.10 ઇંચ વરસાદ નોંધાયો છે.

આ પણ વાંચો : સુરતમાં ધોધમાર વરસાદની આગાહી, વહીવટી તંત્ર બન્યું સજ્જ, તહેનાત કરાઈ NDRFની ટીમ

બીજી તરફ પાટણ શહેર અને જિલ્લામાં વીજળીના કડાકા-ભડાકા સાથે ભારે વરસાદ વરસ્યો હતો. અનાવાડા, માતરવાડી, ગોલાપુર, રાણુજ સહિતના ગ્રામ્ય વિસ્તારોમાં પણ સારો વરસાદ નોંધાયો હતો

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ