VIDEO / ગુજરાતમાં ભારે વરસાદનો કહેર, બે ડેમ ઓવરફ્લો, સુરતમાં શાળાઓ બંધ, અમરેલીમાં ટ્રેન રદ

ગુજરાતમાં મેઘરાજ જોરદાર બેટિંગ કરી રહ્યા છે, છેલ્લા 24 કલાકમાં 225 તાલુકામાં વરસાદ નોંધાયો છે. ત્યારે અનેક જિલ્લાઓમાં જનજીવન પ્રભાવિત થયું છે. ક્યાંક ડેમ ઓવરફ્લો થયા છે તો ક્યાંક શાળાઓમાં રજા, ટ્રેજ સેવા પર અસર જોવા મળી છે. અનેક ગામોમાં એલર્ટ આપવામાં આવ્યું છે.

ભાવનગરમાં શેત્રુંજી ડેમ ઓવરફ્લો, અનેક ગામોમાં એલર્ટ

ભારે વરસાદના કારણે ભાવનગરની જીવાદોરી સમાન શેત્રુંજી ડેમ ઓવરફ્લો થયો છે. વહેલી સવારે ડેમના 59 દરવાજા એક ફૂટ સુધી ખોલવામાં આવ્યા, જેના કારણે ડેમમાંથી 9 હજાર 440 ક્યૂસેક પાણી છોડવામાં આવ્યું છે. ડેમમાંથી પાણી છોડાતા નીચાણવાળા વિસ્તારોમાં આવેલા ગામોમાં એલર્ટ જાહેર કરવામાં આવ્યું છે. ખાસ કરીને પાણીતાણા તાલુકાના 5 ગામો અને તળાજા તાલુકાના 12 ગામોને સાવચેત રહેવા સૂચના આપવામાં આવી છે. તંત્રએ લોકોને નદી અને નીચાણવાળા વિસ્તારોની નજીક ન જવા અપીલ કરી છે.

તાપીના ડોસવાડા વિયર ડેમમાંથી પાણી છોડાયું

તાપીના સોનગઢમાં આવેલો ડોસવાડા વિયર ડેમ પણ ઓવરફ્લો થયો છે. હાલમાં ડેમ ઉપરથી 2.4 સેમી પાણી વહી રહ્યું છે, જ્યારે ડેમમાંથી 57.91 ક્યૂસેક પાણી છોડવામાં આવ્યું છે. પાણી છોડાતા નીચાણવાળા 17 ગામોમાં એલર્ટ જાહેર કરવામાં આવ્યું છે. સ્થાનિક તંત્રએ લોકોને સાવચેતી રાખવા અને નદીના પટમાં ન જવા અપીલ કરી છે.

સુરતમાં ભારે વરસાદને કારણે શાળાઓમાં રજા જાહેર

સુરત શહેરમાં સતત ભારે વરસાદને કારણે શહેરની તમામ શાળાઓમાં રજા જાહેર કરવામાં આવી છે. ગ્રામ્ય વિસ્તારમાં રજા જાહેર કરવાની સત્તા સંબંધિત શાળાના આચાર્યોને સોંપવામાં આવી છે. ભારે વરસાદને કારણે અનેક શાળાઓ બહાર પાણી ભરાઈ ગયા હતા અને કેટલીક જગ્યાએ ફાયર વિભાગની મદદથી વિદ્યાર્થીઓને સુરક્ષિત સ્થળે પહોંચાડવા માટે રેસ્ક્યૂ કામગીરી કરવી પડી હતી. વિદ્યાર્થીઓની સલામતીને ધ્યાનમાં રાખીને જિલ્લા શિક્ષણ વિભાગે આ મહત્વપૂર્ણ નિર્ણય લીધો છે. આજે પણ હવામાન વિભાગે સુરત સહિતના વિસ્તારોમાં ભારે વરસાદની આગાહી કરી છે.

અમરેલીમાં બાઈક તણાયું, ટ્રેન સેવા પણ પ્રભાવિત

અમરેલી જિલ્લામાં ભારે વરસાદના કારણે અનેક ઘટનાઓ સામે આવી છે. ધજડી ગામમાં ઉપરવાસમાં પડેલા વરસાદના કારણે આવેલા પૂરમાં એક બાઈક તણાઈ જવાનો વીડિયો સોશિયલ મીડિયામાં વાયરલ થયો છે. સદનસીબે બાઈક ચાલકનો આબાદ બચાવ થયો હતો અને કોઈ જાનહાનિ થઈ નથી. ગઈકાલે બપોરે સ્થાનિક લોકોએ તણાયેલું બાઈક બહાર કાઢ્યું હતું. બીજી તરફ લીલીયાના હરિપર ગામે રેલવે ટ્રેક પર પાણી ભરાઈ જતા ટ્રેન સેવા પ્રભાવિત થઈ છે. પાણી ભરાવાના કારણે પીપાવાવથી મહુવા જતી ટ્રેન રદ કરવામાં આવી છે. રેલવે તંત્રએ જણાવ્યું છે કે ટ્રેક પરથી પાણી ઓસર્યા બાદ સેવા ફરી શરૂ કરવામાં આવશે.

ભરૂચ અને નવસારીમાં વરસાદનો કહેર યથાવત

ભરૂચ જિલ્લામાં મેઘરાજાએ તોફાની બેટિંગ કરી છે. શહેર તેમજ ગ્રામ્ય વિસ્તારોમાં ધોધમાર વરસાદ વરસતા અનેક રસ્તાઓ પર પાણી ભરાઈ ગયા છે. નીચાણવાળા વિસ્તારોમાં વરસાદી પાણી ઘૂસી જતાં લોકોને ભારે હાલાકીનો સામનો કરવો પડી રહ્યો છે. તંત્રએ લોકોને બિનજરૂરી મુસાફરી ટાળવા અપીલ કરી છે. બીજી તરફ નવસારી જિલ્લામાં સતત છઠ્ઠા દિવસે પણ વરસાદ યથાવત રહ્યો છે. જિલ્લાના તમામ તાલુકાઓમાં સાર્વત્રિક વરસાદ નોંધાયો છે. ખેરગામમાં છેલ્લા 24 કલાક દરમિયાન 5 ઇંચ વરસાદ નોંધાયો છે, જેના કારણે નદીઓના જળસ્તરમાં સતત વધારો થઈ રહ્યો છે.

આ પણ વાંચો : ગુજરાત પોલીસના અનેક અધિકારીઓ બન્યા સાયબર હુમલાનો શિકાર? ટેલિગ્રામથી આપમેળે મોકલાઈ અશ્લીલ લિંક્સ

225 તાલુકામાં વરસાદ, વાપીમાં સૌથી વધુ 8.58 ઇંચ

ગુજરાતમાં છેલ્લા 24 કલાક દરમિયાન 225 તાલુકામાં વરસાદ નોંધાયો છે. સૌથી વધુ વાપીમાં 8.58 ઇંચ વરસાદ નોંધાયો છે. ત્યારબાદ કામરેજમાં 6.46 ઇંચ, પારડીમાં 6.34 ઇંચ, ઉમરગામમાં 6.26 ઇંચ અને કપરાડામાં 5.79 ઇંચ વરસાદ નોંધાયો છે. સુરત શહેરમાં 5.39 ઇંચ, વલસાડમાં 5.28 ઇંચ, લાઠીમાં 4.61 ઇંચ, ભાવનગરમાં 4.49 ઇંચ, સિહોરમાં 4.45 ઇંચ, બાબરામાં 4.37 ઇંચ, અમરેલીમાં 4.25 ઇંચ અને રાધનપુરમાં 4.21 ઇંચ વરસાદ નોંધાયો છે. સતત વરસી રહેલા વરસાદને કારણે રાજ્યના અનેક વિસ્તારોમાં જનજીવન પ્રભાવિત થયું છે, જ્યારે હવામાન વિભાગે આગામી દિવસોમાં પણ ભારે વરસાદની શક્યતા વ્યક્ત કરી હોવાથી તંત્ર દ્વારા લોકોને સતર્ક રહેવાની અપીલ કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ