કાર્યવાહી / આણંદના જંત્રાલ ગામના મહિલા સરપંચને કરાયા પદભ્રષ્ટ, મામલો લાખોની ગેરરીતિનો

Anand News: આણંદ જિલ્લાના જંત્રાલ ગ્રામ પંચાયતમાં ગેરરીતિના મામલે મોટી કાર્યવાહી થઈ છે. ગ્રામ પંચાયતના મહિલા સરપંચ દક્ષાબેન પરમારને તેમના પદ પરથી હટાવી દેવામાં આવ્યા છે. વિકાસ કામોના નામે લગભગ 4 લાખ 88 હજાર રૂપિયાની ચુકવણી કરવામાં આવી હતી.

આ રકમ ક્રિષ્ના ટ્રેડર્સ નામની એજન્સીને બે અલગ-અલગ ચેક દ્વારા આપવામાં આવી હોવાનું સામે આવ્યું છે. આ ચુકવણી સામાન્ય સભામાં એજન્સીની પસંદગી કર્યા વગર જ કરાઈ હોવાનો ગંભીર આક્ષેપ છે. તપાસ દરમિયાન એ વાત પણ બહાર આવી છે કે ક્રિષ્ના ટ્રેડર્સના માલિક સરપંચ દક્ષાબેન પરમારના પુત્રવધૂ છે.

આ મામલે તાલુકા પંચાયત દ્વારા તાત્કાલિક કાર્યવાહી કરવામાં આવી હતી. ગ્રામ પંચાયતના તમામ રેકોર્ડ જપ્ત કરવામાં આવ્યા અને વિગતવાર તપાસ હાથ ધરાઈ. તપાસ દરમિયાન સરપંચ દક્ષાબેન પરમારે આ બાબતોની કબુલાત કરી હતી અને તેમનું નિવેદન પણ નોંધવામાં આવ્યું હતું.

આ પણ વાંચોઃ ''ઠેંગણા-દોઢ ફૂટીયા ઉત્તર ગુજરાતમાં...'', વિક્રમ ઠાકોરને ઠાકોર સેનાના સભ્યનો ખુલ્લો પડકાર

આ તમામ પુરાવા અને કબુલાતને આધારે તાલુકા પંચાયતે ગુજરાત પંચાયત અધિનિયમની સંબંધિત કલમો હેઠળ સરપંચને પદ પરથી હટાવવાનો આદેશ જારી કર્યો છે. હવે જંત્રાલ ગ્રામ પંચાયતનો ચાર્જ ઉપ સરપંચ ઈશ્વરભાઈ ઠાકોરને સોંપવામાં આવશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ