અરેરાટી / CCTV: રસ્તા વચ્ચોવચ બેઠેલા ગાયોના ધણ સાથે બાઇકસવારની ધડાકાભેર ટક્કર થતા મોત, સ્થાનિકો ભડક્યાં

Bike Accident CCTV : રાજ્યમાં ફરી એકવાર રખડતાં પશુને કારણે અકસ્માતની ઘટના સામે આવી છે. વિગતો મુજબ સાણંદ-બાવળા રોડ પર રખડતા પશુના કારણે સર્જાયેલા ગંભીર અકસ્માતમાં એક યુવકનું ઘટનાસ્થળે જ કરૂણ મોત થયું છે. પીંપણ ગામ નજીક બનેલી આ ઘટનાના CCTV દ્રશ્યો સામે આવતા સમગ્ર વિસ્તારમાં ચકચાર મચી ગઈ છે. આ તરફ ઘટનાની જાણ થતાં મૃતકોના પરિજનો શોકમગ્ન બન્યા છે.

શું છે સમગ્ર મામલો ?

પ્રાથમિક વિગતો મુજબ એક બાઈકસવાર યુવક પૂરપાટ ઝડપે સાણંદ-બાવળા રોડ પરથી પસાર થઈ રહ્યો હતો. તે દરમિયાન રસ્તાની વચ્ચે બેઠેલા રખડતા પશુના ધણ સાથે બાઈક ધડાકાભેર અથડાઈ હતી. ટક્કર એટલી જોરદાર હતી કે યુવકને ગંભીર ઇજાઓ પહોંચી અને તેનું સ્થળ પર જ મોત નીપજ્યું.

આ સમગ્ર ઘટના નજીકમાં લગાવવામાં આવેલા CCTV કેમેરામાં કેદ થઈ ગઈ છે. અકસ્માતના દ્રશ્યો સામે આવ્યા બાદ સ્થાનિકોમાં ભારે રોષ ફેલાયો છે. લોકોનું કહેવું છે કે રખડતા પશુના કારણે આ વિસ્તારમાં અગાઉ પણ અનેક અકસ્માતો સર્જાયા છે, છતાં સમસ્યાના કાયમી ઉકેલ માટે અસરકારક પગલાં લેવામાં આવતા નથી.

આ પણ વાંચો : હવેથી પ્રવાસીઓ બોટમાં નાસ્તો નહીં લઈ જઇ શકે, હાઈકોર્ટનો પ્રતિબંધ

યુવકના અકાળ અવસાનથી તેના પરિવારમાં શોકનો માહોલ છવાયો છે, જ્યારે સમગ્ર પંથકમાં અરેરાટી વ્યાપી ગઈ છે. સ્થાનિકોએ તંત્ર સમક્ષ રખડતા ઢોરને તાત્કાલિક પકડવાની, પશુ માલિકો સામે કડક કાર્યવાહી કરવાની અને મુખ્ય માર્ગો પર પશુઓના ત્રાસને રોકવા માટે અસરકારક વ્યવસ્થા ઊભી કરવાની માંગ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ