દુર્ઘટના / ખેડામાં શાર્પ ટર્ન પર કાર પલટી, ધસમસતા પાણીમાં તણાઈ; અમદાવાદના 4 યુવકોનાં મોત

Ahmedabad Rain Kheda Car Accident : જિલ્લામાં ભારે વરસાદ વચ્ચે એક ગોઝારી દુર્ઘટનામાં અમદાવાદના 4 યુવકોનાં મોત થતાં અરેરાટી ફેલાઈ છે. માતર-ખેડા હાઈવે પરથી મોતીપુરા તરફ જતા રસ્તા પર અંધારામાં શાર્પ ટર્ન લેતી વખતે અર્ટિગા કાર ચાલકે કાબૂ ગુમાવ્યો હતો. જોતજોતામાં કાર પલટી મારી ગરનાળાના ધસમસતા પાણીના પ્રવાહમાં ખાબકી હતી. કારમાં કુલ 6 લોકો સવાર હતા, જેમાંથી 4 યુવકોનાં મોત થયાં છે, જ્યારે 2 લોકોને સ્થાનિકોની મદદથી બચાવી લેવામાં આવ્યા છે.

અંધારું અને ધોધમાર વરસાદ વચ્ચે કાર પાણીના વહેણમાં ખાબકી

મળતી માહિતી મુજબ, અમદાવાદ પાસિંગની અર્ટિગા કારમાં સવાર લોકો અમદાવાદ તરફથી માતર-ખેડા હાઈવે થઈ મોતીપુરા તરફ જઈ રહ્યા હતા. દરમિયાન ભારે વરસાદ અને અંધારાના કારણે રસ્તા પર આવેલા શાર્પ ટર્ન પર કારચાલકે કાબૂ ગુમાવ્યો હતો. કાર અચાનક પલટી મારીને ગરનાળાના ધસમસતા પાણીના વહેણમાં તણાઈ ગઈ હતી.

ઘટનાની જાણ થતાં આસપાસના વિસ્તારમાં દોડધામ મચી ગઈ હતી. સ્થાનિક લોકો પણ મદદ માટે ઘટનાસ્થળે પહોંચી ગયા હતા.

ફાયર બ્રિગેડ સહિતનો કાફલો ઘટનાસ્થળે દોડી આવ્યો

ઘટનાની જાણ થતાં ખેડા ફાયર બ્રિગેડની ટીમ સહિત વહીવટી અને પોલીસ અધિકારીઓનો કાફલો ઘટનાસ્થળે પહોંચ્યો હતો. SDM સૂરજ બારોટ, માતરના ધારાસભ્ય કલ્પેશ પરમાર, SP વિજય પટેલ, DySP અને મામલતદાર સહિતના અધિકારીઓએ ઘટનાસ્થળે પહોંચીને સમગ્ર રેસ્ક્યૂ કામગીરીની દેખરેખ કરી હતી.

ફાયર બ્રિગેડની ટીમે ભારે જહેમત બાદ કારને પાણીમાંથી બહાર કાઢી હતી. જોકે, કારમાં સવાર 6 લોકોમાંથી 4 યુવકોનાં મોત થયાં હતાં. જ્યારે 2 લોકોને જીવિત બચાવી લેવામાં આવ્યા હતા. ઈજાગ્રસ્ત બંનેને તાત્કાલિક સારવાર માટે ખેડા સિવિલ હોસ્પિટલ ખસેડવામાં આવ્યા છે.

મૃતકોમાં અમદાવાદના 4 યુવકોનો સમાવેશ

આ ગોઝારી દુર્ઘટનામાં મૃત્યુ પામેલા યુવકોની ઓળખ આ પ્રમાણે થઈ છે:

• રાજ સંજયભાઈ રાઠોડ (26) – હાટકેશ્વર, અમરાઈવાડી, અમદાવાદ
• બિરેન્દ્રસિંહ શેખાવત (26) – મૂળ રાજસ્થાન, હાલ CTM, અમદાવાદ
• મુસ્તકીમ રાજપૂત (19) – રખિયાલ, અમદાવાદ
• મયુરભાઈ મહેશભાઈ પંચાલ (34) – ન્યૂ મણિનગર, અમદાવાદ

મૃતકોના મૃતદેહોને પંચનામું કરી પોસ્ટમોર્ટમ માટે ખેડા સિવિલ હોસ્પિટલ ખસેડવામાં આવ્યા છે.

બે યુવકો સારવાર હેઠળ

દુર્ઘટનામાં બચાવી લેવાયેલા બંને ઈજાગ્રસ્તોને સારવાર માટે હોસ્પિટલમાં ખસેડવામાં આવ્યા છે. તેમની ઓળખ ધર્મેન્દ્રસિંહ કુલદીપસિંહ ગીલ (38), રહે. હાટકેશ્વર, અમરાઈવાડી, અમદાવાદ અને મુકેશભાઈ ચૌહાણ (32), રહે. હાટકેશ્વર, અમરાઈવાડી, અમદાવાદ તરીકે થઈ છે.

આ પણ વાંચો : રાજ્યમાં વરસાદી સ્થિતિ પર CM ભૂપેન્દ્ર પટેલની મોડી રાત્રે સમીક્ષા બેઠક, તંત્રને હાઈ એલર્ટ પર રહેવા સૂચના

ચાર પરિવારમાં શોકનો માહોલ

ભારે વરસાદ વચ્ચે બનેલી આ ગોઝારી દુર્ઘટનામાં અમદાવાદના 4 યુવકોનાં મોત થતાં તેમના પરિવારોમાં શોકનું મોજું ફરી વળ્યું છે. બીજી તરફ, સ્થાનિક પોલીસ દ્વારા સમગ્ર મામલે કાયદેસરની કાર્યવાહી હાથ ધરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ