રાહત / નહીં રડાવે ડૂંગળી ! ટામેટા બાદ હવે સસ્તામાં ડૂંગળી વેચશે સરકાર, કાલથી 25 રુપિયે કિલો મળશે

• લોકોને મોંઘવારીમાંથી રાહત આપવા સરકાર હંમેશા જહેમતશીલ
• લોકોને સસ્તા ભાવે ડુંગળી મળે તે દિશામાં સરકારના પ્રયાસ
• આવતીકાલથી જ રાહત ભાવે ડુંગળીનું વેચાણ

સામાન્ય લોકોને મોંઘવારીમાંથી રાહત આપવા સરકાર હંમેશા જહેમતશીલ રહે છે. જેના ભાગરૂપે તાજેતરમાં જ સસ્તા દરે ટમેટા ઉપલબ્ધ કરાવ્યા બાદ હવે સરકાર ડુંગળી પણ લોકોને સસ્તામાં મળે તે માટે પ્રયાસ કરી રહી છે. જે અંતર્ગત લોકોને 25 રૂપિયા પ્રતિ કિલોના ભાવે ડુંગળી આપવામાં આવશે. 21 ઓગસ્ટ સોમવાર એટલે કે આવતીકાલથી જ રાહત ભાવે ડુંગળીનું વેચાણ શરૂ કરી દેવામાં આવશે. આ વેચાણ સહકારી એજન્સી નેશનલ કોઓપરેટિવ કન્ઝ્યુમર્સ ફેડરેશન ઓફ ઇન્ડિયા લિમિટેડ દ્વારા કરવામાં આવશે.

ટમેટા બાદ હવે ડુંગળીના ભાવ વધારે જોવા મળી રહ્યા છે
નોંધનીય છે કે વધતા ભાવને પગલે શનિવારે સરકારે ડુંગળીની નિકાસ પર પ્રતિબંધ લગાવવાની જાહેરાત કરી હતી. ડુંગળીની નિકાસ પર 40 ટકા થી વધારે ડ્યુટી લાદવાનો કેન્દ્ર સરકાર દ્વારા  નિર્ણય કરાયો છે અને નિકાસ પરનો આ પ્રતિબંધ 31 ડિસેમ્બર સુધી અમલમાં રાખવામાં આવે તેવું જણાવાયું છે. ભાવ વધારાને અંકુશમાં રાખવાના ભાગરૂપે આ પગલું લેવાયુ હોવાનું જાણવા મળી રહ્યું છે. ટમેટા બાદ હવે ડુંગળીના ભાવ વધારે જોવા મળી રહ્યા છે. જેને લઈને સામાન્ય માણસને સમસ્યા ભોગવવાનો વારો આવી રહ્યો છે. 

બફર સ્ટોકની મર્યાદા વધારાય 
આથી આગામી મહિનાઓમાં તહેવારની સિઝનને ધ્યાને લઈ લોકોને મોંઘવારીમાંથી રાહત આપવા માટે સરકાર તાત્કાલિક નિર્ણય લઈ રહી છે.બીજી બાજુ વધતા ભાવને નિયંત્રણ કરવા માટે સરકાર તેના બફર સ્ટોકની મર્યાદા જે ત્રણ લાખ મેટ્રિક ટન નક્કી કરવામાં આવી હતી. તેમાં બદલાવ કરી ખરીદી પૂર્ણ થયા બાદ તે વધારી પાંચ લાખ મેટ્રિક ટન કરાઈ છે. આ સ્ટોકમાંથી ડુંગળી બજારમાં મોકલવાનું પણ સરકાર દ્વારા શરૂ કરાયું છે.