વૈશ્વિક મંદી / અમેરિકા, યુરોપ અને ચીનમાં લાગશે મંદીનો માર, ગ્લોબલ ઈકોનોમીના થશે ભૂંડાં હાલ

• વર્ષ 2023 વૈશ્વિક વૃદ્ધિની દૃષ્ટિએ મુશ્કેલ
• અમેરિકા, યુરોપ અને ચીનમાં મંદી જોવા મળશે
• રશિયા-યુક્રેન યુદ્ધ અને કોરોના રહેશે મુખ્ય પરિબળ

ઇન્ટરનેશનલ મોનેટરી ફંડ (IMF)ના વડા ક્રિસ્ટાલિના જ્યોર્જીએવાએ અમેરિકા, યુરોપ અને ચીનમાં મંદીનો સંકેત આપ્યો છે. તેમણે કહ્યું કે વર્ષ 2023 વૈશ્વિક વૃદ્ધિની દૃષ્ટિએ મુશ્કેલ રહેવાનું છે. અમેરિકા, યુરોપ અને ચીનમાં આર્થિક ગતિવિધિઓ નબળી જણાય છે. IMFના મેનેજિંગ ડિરેક્ટર ક્રિસ્ટાલિના જ્યોર્જિવાએ CBS રવિવારના સવારના સમાચાર કાર્યક્રમ 'ફેસ ધ નેશન'માં કહ્યું- 'નવું વર્ષ આપણે પાછળ છોડેલા વર્ષ કરતાં વધુ મુશ્કેલ હશે. કારણ કે ત્રણેય મોટી અર્થવ્યવસ્થાઓ અમેરિકા, યુરોપિયન યુનિયન અને ચીન એકસાથે ધીમી ગતિએ આગળ વધી રહ્યા છે.

શા માટે દબાણ વધ્યું?
ઑક્ટોબર 2022માં, IMFએ 2023માં વૈશ્વિક આર્થિક વૃદ્ધિના અંદાજમાં ઘટાડો કર્યો હતો. રશિયા-યુક્રેન યુદ્ધ વચ્ચે ચાલી રહેલી ખેંચતાણ, વધતી જતી મોંઘવારીનું દબાણ અને યુએસ ફેડરલ રિઝર્વ બેન્ક જેવી કેન્દ્રીય બેન્કોના વ્યાજદરમાં વધારાને કારણે દબાણ વધ્યું છે.

કોવિડના લીધે ચીનની દોડમાં બ્રેક
ચીનમાં કોવિડના કારણે સ્થિતિ ફરી એકવાર વણસી ગઈ છે. ચીને તેની અર્થવ્યવસ્થાને ફરીથી આગળ ધપાવવાનું શરૂ કર્યું છે, પરંતુ કોવિડના વધતા જતા કેસ મુશ્કેલીમાં વધારો કરી રહ્યા છે. ચીને તેની ઝીરો-કોવિડ પોલિસી બદલી છે. નીતિમાં ફેરફાર બાદ ચીનના રાષ્ટ્રપતિ શી જિનપિંગે શનિવારે પોતાના નવા વર્ષના સંબોધનમાં વધુ પ્રયત્નો અને એકતાનું આહ્વાન કર્યું હતું. 

આગામી કેટલાક મહિના ચીન માટે મુશ્કેલ
જ્યોર્જિવાએ કહ્યું- '40 વર્ષમાં પહેલીવાર 2022માં ચીનનો વિકાસ વૈશ્વિક વૃદ્ધિની બરાબર અથવા તેનાથી ઓછો થઈ શકે છે.' આ સિવાય કોવિડના વધતા જતા કેસ આગામી મહિનાઓમાં ચીનના વિકાસને વધુ અસર કરશે. તેણે કહ્યું- 'હું ગયા અઠવાડિયે ચીનના એક શહેરમાં બાયો બબલમાં હતો. ત્યાં, કોવિડના શૂન્ય કેસ હતા. પરંતુ લોકો મુસાફરી શરૂ કરતાની સાથે જ પરિસ્થિતિ બદલાઈ જશે. જ્યોર્જિવાએ કહ્યું કે આગામી કેટલાક મહિના ચીન માટે મુશ્કેલ છે. આનાથી ચીનના વિકાસ પર નકારાત્મક અસર પડશે અને સાથે જ વૈશ્વિક વિકાસ પર પણ અસર પડશે.

યુએસ લેબર માર્કેટ મજબૂત
જ્યોર્જિવાએ કહ્યું કે અમેરિકન અર્થતંત્ર અલગ છે. જો કે, તે કોન્ટ્રેકશનથી બચી શકે છે. યુએસ અર્થતંત્ર વિશ્વની એક તૃતીયાંશ અર્થવ્યવસ્થાને પ્રભાવિત કરી શકે છે. તેમણે કહ્યું કે 'અમેરિકા સૌથી વધુ ફ્લેક્સિબલ છે. તે મંદીમાંથી બચી શકે છે. અમે જોઈ રહ્યા છીએ કે તેનું લેબર માર્કેટ ખૂબ જ મજબૂત છે.

જોખમના સંકેતો
વ્યાજદર અંગે ફેડરલ રિઝર્વનું આક્રમક વલણ જોખમના સંકેતો દર્શાવે છે. જેના કારણે અમેરિકાના વિકાસમાં અવરોધ આવી શકે છે. 2022 પૂરું થતાંની સાથે જ મોંઘવારી તેની ટોચને પાર કરવાના સંકેત દેખાઈ રહી છે. ફુગાવાને નીચો લાવવા માટે ફેડને લાંબા સમય સુધી વ્યાજદર કડક રાખવા પડશે.