ગુજરાત / જગત મંદિર દ્વારકાધીશના પરિસરનો વીડિયો વાયરલ થતા મંદિરની સુરક્ષા સામે સવાલ

દ્વારકામાં આવેલા દ્વારકાધીશ જગત મંદિરને લઈને એક ગંભીર ઘટના સામે આવી છે. મંદિરની અંદરનો એક વીડિયો સોશિયલ મીડિયા પર વાયરલ થતાં મંદિરની સુરક્ષા વ્યવસ્થા અને નિયમોના પાલનને લઈને અનેક સવાલો ઊભા થયા છે. મંદિર પ્રશાસન દ્વારા બનાવવામાં આવેલા સુરક્ષાના નિયમો હોવા છતાં પ્રતિબંધિત વિસ્તારમાંથી અંદરનો વીડિયો કેવી રીતે બનાવવામાં આવ્યો તે મુદ્દો હાલ ચર્ચામાં આવ્યો છે.

દ્વારકાધીશ જગત મંદિર દેશભરમાં શ્રદ્ધાનું મોટું કેન્દ્ર છે. અહીં દર્શન માટે મોટી સંખ્યામાં ભક્તો પહોંચે છે. ભક્તોની સુરક્ષા અને મંદિરની વ્યવસ્થા જળવાઈ રહે તે માટે મંદિર પરિસરમાં કેટલાક કડક નિયમો લાગુ કરવામાં આવ્યા છે. તેમાં જગત મંદિરની અંદર મોબાઈલ ફોન લઈ જવા પર પણ કડક પ્રતિબંધ છે. આમ છતાં મંદિરની અંદરથી વીડિયો શૂટ કરવામાં આવ્યો અને ત્યારબાદ તેને સોશિયલ મીડિયા પર વાયરલ કરવામાં આવ્યો. વીડિયો સામે આવ્યા બાદ મંદિર પ્રશાસનના નિયમોને લઈને સવાલો ઊભા થયા છે. પ્રતિબંધિત વિસ્તારમાં મોબાઈલ ફોન પહોંચ્યો કેવી રીતે અને ત્યાંથી વીડિયો બનાવવાની મંજૂરી કોણે આપી તે અંગે પણ લોકો સવાલ કરી રહ્યા છે.

વ્યૂઝ મેળવવા માટે વીડિયો બનાવ્યો હોવાનો આક્ષેપ

વાયરલ થયેલા વીડિયોને લઈને એવી ચર્ચા છે કે સોશિયલ મીડિયા પર વધુ વ્યૂઝ મેળવવા માટે મંદિરની અંદરનો વીડિયો બનાવવામાં આવ્યો અને તેને વાયરલ કરવામાં આવ્યો. મંદિર પ્રશાસન દ્વારા જ્યાં વીડિયો બનાવવા પર પ્રતિબંધ છે, ત્યાંથી વીડિયો બનાવવામાં આવતા નિયમોની ખુલ્લેઆમ અવગણના થઈ હોવાના સવાલો ઉઠી રહ્યા છે. મંદિરની અંદર મીડિયા કવરેજ કરવા પર પણ પ્રતિબંધ હોવાની વાત સામે આવી છે. ત્યારે સામાન્ય વ્યક્તિને મંદિરના પ્રતિબંધિત વિસ્તારમાં મોબાઈલ સાથે પ્રવેશ કેવી રીતે મળ્યો અને વીડિયો બનાવવાની પરવાનગી કોણે આપી તે સૌથી મોટો સવાલ છે.

મંદિર પ્રશાસનની કામગીરી સામે પણ સવાલ

આ ઘટનાથી માત્ર વીડિયો બનાવનાર વ્યક્તિ સામે જ નહીં, પરંતુ મંદિરની સુરક્ષા વ્યવસ્થા સામે પણ સવાલો ઊભા થયા છે. જો મંદિરની અંદર મોબાઈલ લઈ જવા પર કડક પ્રતિબંધ છે તો મોબાઈલ ફોન અંદર પહોંચ્યો કેવી રીતે? જો કોઈ વ્યક્તિએ નિયમોનું ઉલ્લંઘન કરીને વીડિયો બનાવ્યો હોય તો સુરક્ષા કર્મચારીઓની નજર તેના પર કેમ ન પડી? આવા અનેક સવાલો હાલ ચર્ચામાં છે. પ્રતિબંધિત વિસ્તારમાંથી વીડિયો બનાવીને તેને સોશિયલ મીડિયા પર વાયરલ કરવો મંદિરના સુરક્ષા નિયમોને પડકારતી ગંભીર ઘટના તરીકે જોવામાં આવી રહી છે. વીડિયો વાયરલ થયા બાદ હવે મંદિર પ્રશાસન દ્વારા આ મામલે શું કાર્યવાહી કરવામાં આવે છે તેના પર સૌની નજર રહેશે.

આ પણ વાંચો : સુમુલ ડેરીએ વધાર્યા દૂધના ભાવ, પશુદાણમાં પણ મોંઘું થયું, જાણો કિલો ફેટ દીઠે રકમ

જગત મંદિરની સુરક્ષા સાથે જોડાયેલા નિયમોનું પાલન કરાવવાની જવાબદારી મહત્વની છે. આવી ઘટના ફરી ન બને અને મંદિરની અંદરની સુરક્ષા વ્યવસ્થા જળવાઈ રહે તે માટે કડક પગલાં લેવામાં આવે તેવી માંગ પણ ઉઠી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ