જેઓ 31 જુલાઈ, 2024 ની સમયમર્યાદામાં આવકવેરા રિટર્ન ફાઇલ કરે છે, તેમને જૂની ટેક્સ સિસ્ટમનો લાભ મળશે, આ પછી નવી ટેક્સ વ્યવસ્થા જે ડિફોલ્ટ સિસ્ટમમાં છે એ અમલમાં આવશે.
Share
નાણાકીય વર્ષ 2023-24 કે આકારણી વર્ષ 2024-25 માટે આવકવેરા રિટર્ન ફાઇલ કરનારા કરદાતાઓ જો જૂની ટેક્સ સિસ્ટમ અપનાવીને ITR ફાઈલ કરવા માગે છે તેમણે 31મી જુલાઈ સુધીમાં રિટર્ન ફાઈલ કરવાનું રહેશે. જો તમે આમ કરવામાં નિષ્ફળ થશો તો તમને જૂની સિસ્ટમનો લાભ નહીં મળે અને આવકવેરાની ગણતરી નવી સિસ્ટમના આધારે કરવામાં આવશે.
આકારણી વર્ષ 2024-25 માટે આવકવેરા રિટર્ન ભરવાનું 1 એપ્રિલ, 2024થી શરૂ થયું છે. જેમાં ITR ફાઈલ કરવાના નિયમોમાં મોટો ફેરફાર કરવામાં આવ્યો છે. આ હેઠળ, ફક્ત તે જ કરદાતાઓ જેઓ દંડ ભર્યા વિના 31 જુલાઈ, 2024 ની સમયમર્યાદામાં આવકવેરા રિટર્ન ફાઇલ કરે છે, તેમને જૂની ટેક્સ સિસ્ટમનો લાભ આપવામાં આવશે. આ પછી નવા ટેક્સ રિજિમ ડિફોલ્ટ સિસ્ટમ અમલમાં આવશે.
નોંધનીય છે કે 31 જુલાઈની અંતિમ તારીખ પછી, કરદાતાઓને દંડ સાથે વિલંબિત ITR ફાઈલ કરવાની તક આપવામાં આવે છે. તેની છેલ્લી તારીખ 31મી ડિસેમ્બર છે. જો કોઈ કરદાતા આ સમયગાળા દરમિયાન ITR ફાઇલ કરે છે, તો તેના પર નવી કર વ્યવસ્થા મુજબ આવકવેરો ચૂકવવાપાત્ર થશે. તેને જૂની સિસ્ટમમાં ઉપલબ્ધ કરમુક્તિ અને અન્ય કપાતનો લાભ નહીં મળે. તેનાથી બચવા માટે ટેક્સ નિષ્ણાતોએ 31 જુલાઈ સુધીમાં રિટર્ન ફાઈલ કરવાની સલાહ આપી છે.
ટેક્સ સિસ્ટમની પસંદગી મહત્વપૂર્ણ છે
આવકવેરા કાયદા અનુસાર, નવી કર વ્યવસ્થા એ ડિફોલ્ટ સિસ્ટમ છે એટલે કે તે કરદાતા માટે પહેલેથી જ લાગુ છે. જો કોઈ પગારદાર કરદાતા જૂના કર વ્યવસ્થામાં સ્વિચ કરવા માંગે છે, તો તેણે નવા નાણાકીય વર્ષની શરૂઆતમાં તેના એમ્પ્લોયરને આ અંગે જાણ કરવી પડશે. જો તે આવું નહીં કરે, તો તે આપમેળે નવી કર વ્યવસ્થા હેઠળ આવશે અને તેના હેઠળ નિર્ધારિત આવકવેરા સ્લેબના આધારે તેના પગારમાંથી ટેક્સ કાપવામાં આવશે. આવકવેરા રિફંડનો દાવો કરવા માટે તેઓએ આગામી નાણાકીય વર્ષ સુધી રાહ જોવી પડશે.
