- ઈતિહાસના સૌથી મોટા આર્થિક સંકટનો સામનો કરી રહ્યું છે પાકિસ્તાન
- પાકિસ્તાનમાં સતત વધી રહી છે ગરીબોની સંખ્યા
- વિશ્વ બેંકે પાકિસ્તાનને ચેતવણી આપી
Pakistan Poverty Rate : ઈતિહાસના સૌથી મોટા આર્થિક સંકટનો સામનો કરી રહેલા પાકિસ્તાનમાં હજુ પણ સ્થિતિ સુધરી રહી નથી. વાત જાણે એમ છે કે, પાકિસ્તાનમાં ગરીબોની સંખ્યા સતત વધી રહી છે. વિશ્વ બેંકે પાકિસ્તાનને ચેતવણી આપી છે કે, ગત નાણાકીય વર્ષમાં પાકિસ્તાનમાં ગરીબીનો દર વધીને 39.4 ટકા થઈ ગયો છે. અત્યંત નબળી આર્થિક સ્થિતિને કારણે દેશના 1.25 કરોડથી વધુ લોકો ગરીબીમાં ધકેલાઈ ગયા છે.
વર્લ્ડ બેંક દ્વારા રજૂ કરાયેલ પાકિસ્તાનની ગરીબીના આંકડા પરથી અંદાજ લગાવી શકાય છે કે, દેશવાસીઓની શું હાલત છે. પાકિસ્તાનમાં એક વર્ષમાં ગરીબી 34.2 ટકાથી વધીને 39.4 ટકા થઈ ગઈ છે. આ સાથે દેશમાં વધુ 1.25 કરોડ લોકો ગરીબી રેખા નીચે આવ્યા બાદ પાકિસ્તાનમાં ગરીબીથી પીડિત લોકોની સંખ્યા વધીને 9.5 કરોડ થઈ ગઈ છે.
પાકિસ્તાનનું આર્થિક મોડલ નિષ્ફળ
વર્લ્ડ બેંકે પાકિસ્તાનમાં આવનારી સરકાર માટે તૈયાર કરવામાં આવેલ ડ્રાફ્ટ પોલિસીનું અનાવરણ કર્યું છે અને તેને સુધારવા માટે યોગ્ય પગલાં લેવાની સલાહ પણ આપી છે. વૈશ્વિક સંસ્થાએ કહ્યું છે કે, દેશે નાણાકીય સ્થિરતા હાંસલ કરવા માટે તાત્કાલિક પગલાં લેવાની જરૂર છે. વિશ્વ બેંકના પાકિસ્તાન માટેના મુખ્ય અર્થશાસ્ત્રી ટોબિઆસ હકનું કહેવું છે કે, પાકિસ્તાનનું આર્થિક મોડલ હવે ગરીબી ઘટાડતું નથી અને સમકક્ષ દેશોની સરખામણીએ અહીં જીવનધોરણ સતત ઘટી રહ્યું છે.
વિશ્વ બેંકે ચેતવણી આપી
પાકિસ્તાનની વર્તમાન સ્થિતિ પર ચિંતા વ્યક્ત કરતા વિશ્વ બેંકે તેના અહેવાલમાં ચેતવણી આપી છે કે, દેશને નાણાકીય સ્થિરતા માટે જે પગલાં લેવાની જરૂર છે તેમાં કૃષિ અને રિયલ એસ્ટેટ પર કર લાદવાની સાથે સાથે નકામા ખર્ચમાં ઘટાડો કરવાનો સમાવેશ થાય છે. ટોબિઆસ હક તેમણે કહ્યું કે, પાકિસ્તાન ગંભીર આર્થિક અને માનવ વિકાસ સંકટનો સામનો કરી રહ્યું છે અને તે એવા તબક્કે છે જ્યાં મોટા નીતિગત ફેરફારોની જરૂર છે. તેમણે કહ્યું કે, વિશ્વ બેંક પાકિસ્તાનની આજની આર્થિક સ્થિતિને લઈને ખૂબ જ ચિંતિત છે.
પાકિસ્તાન ફસાઈ રહ્યું છે ગરીબીની જાળમાં
વિગતો મુજબ પાકિસ્તાન ઝડપથી ગરીબીની જાળમાં ફસાઈ રહ્યું છે, જે પહેલાથી જ આર્થિક રીતે ત્રસ્ત પાકિસ્તાન માટે મોટું સંકટ પેદા કરી શકે છે. નોંધનીય છે કે. દેશમાં દરરોજ 3.65 યુએસ ડોલરની આવકના સ્તરને ગરીબી રેખા ગણવામાં આવે છે. વિશ્વ બેંકની નોંધ મુજબ પાકિસ્તાન પાસે જીડીપીના 22 ટકા જેટલો કર વસૂલવાની ક્ષમતા છે પરંતુ તેનો વર્તમાન ગુણોત્તર માત્ર 10.2 ટકા છે, જે અડધાથી વધુનો તફાવત દર્શાવે છે.
